-Tv. Jehova Khawbung
South Extension hi Delhi a ding chun hmun inhawi pawl ve chu la ning a tih. A hmun le hmang anhawi em em. Tienlaia muslim hai lo um na ve ani a. Tienlaia an i bawl building khawm hmu thei ding iemanizat a la um. South Extension hi Delhi a ding chun commercial area pakhat ani ve a. Hieng branded thuomnaw company dang danga mi khawm hmu thei a tam hle. Ring road in Part-I le Part-II in a the hrana. Einihai rawi um khawmna tak chu Part-II, Masjid Moth hi anih. South Extension area sunga
lamlien hai khawm hi a lienin anhawi. Building le building inkar (gully) hai khawm car awl eta thlan lutna thei ani a. Motor neihai tading khawm a parking thu ah harsatna iengkhawm a um nawh.
Ring Road inlawn thang I ni lem chun transportation khawm anhawi a. Khawlai zuk suok vat hai khawm a awlsam pha. Eini rawi umbumna tak Masjid Moth anthawk lem chu Ring Road hi ke in minute nga lam vel chau ani a. Hieng Noida, Lajpat Nagar, Dhaula Kuan, India Gate, Saket, Munirka, Vasant Vihar le Delhi sunga hmun hrang hrang haia bus fe dinghai chu South Extension bus stand hi an hraw ve vawng a. Nitina College kai hai tadingin a remchang em em. Damnaw inrik chang khawm AIIMS, Safdarjung Hospital le Vardhman Mahavir Hospital hai hun tawitea tlung vat vat thei ani bawk.
South Extension hi hnam dang unau Naga, Meitei le Nepali hai khawm an um ve nuoi. Eini mi tak hi chu kar hla rak rak lo a khawsa in tuhin member sawmli bawr vel ei um. South Extension a hin Nu le Pa le um chu vawisun ni chen hin ei la um naw. A tlangpuiin unau um khawm ei ni deu tak. Percentage zawng a chu Delhi sung vengbuk a nunghak le tlangval tamna tak ning atih. South Extension a um a tam lem hi sinthawna nei ei ni a. Student khawm iemanizat ei um. Inrinni zan dar 9:30 hin in tinah, a hmatiemin vengbuk inkhawm nei hlak ani va a. Vengbuk Chairperson, Secretary le Treasurer hai chu Nk. Varthienghlim Changsan, Nk. Chawnglienmawi Joute le Nk. Stephanie Lalduhawmi Pudaite hai an nih. Chun, Area Co-ordinator hai chu Tv. Joel Pudaite, Tv. Jehova Khawbung le Nk. Neiphakim Joute hai an nih.
South Extension hi Residential area pakhat ani ve a. Vai mi hausa an tam em em. Zan sawt hnung hin Delhi Police hai in Patrolling hai neiin an enkai hne hle. Chuleiin, zana insuol, inhal buoi hai a suktlawm pha hle. South Extension a in umhai hi an bawl dan an ang tawl naw a. Amiruokchu, bathroom hi chu a sung tienga um ani deu vawng. In hluo man hai khawm area danghai le anthlau bek bek nawh. One room, two room, three room, four room sethai le kitchen separate hai chu a then inman deu a hluo thei anih. Area danghai ang thoin, ina tui put hi a tha bek nawh. Amiruokchu, pump a sie ani ngawt naw chun chuong lawm lawm chun tui thu ah harsatna a um chuong nawh. Hmeruo hai khawm Thursday market zan hin a rate pangngai neka tlawma inchawk thei anih. Thursday market zan hin hmeruo el niloin bur le bel le second hand thuomhnawhai khawm hmu ding a tam hle.
No comments:
Post a Comment