Lawrkhawm

@@ Nk. Roslyn Rochanmawi Buhril chu Gastra Intestinal Infection leiin hun iemani chen zet natna khumah a lo zal ta a. Aruna Asas Ali Hospital ah admit niin chawlkar khat vel chu an lo in enkawl tah anih. A hung dam fel vat ei beisei

. Tawngtaina’n lo san zing ei tiu.

@@ Delhi University hnuoia undergraduate exam neihai chu a tam lemin an lo zo fel tah. Tuta kar liem tah sung khan mi thahnem tak chu chawl hmang dingin an khuo le veng tieng an lo suok tawl ta bawk. Mi tam tak, chawl a suok ve lo dinghai chu lungleng taka hun hmang mek khawm an um nuol ni awmin chanchin ei lo dawng.

@@ Tulna thenkhat leia Tuithaphai tieng a hang inzin zawk Pu L.Keivom khawm June 17, Zirtawpni zan khan damtakin Delhi a lo hung chuongkai ve nawk tah. Tuta tuma a hang inzin hi chawlkar khat vel a hang thang anih.

@@ June 17, Zirtawpni zan vek khan HSA, Delhi President le Adviser khawm lo ni ta hlak Tv. David Buhril khawm Delhi a lo hung chuongkai ve ta bawk. Ieng chen am a cham ding ti ruok chu ei hriet thei hri naw a. Tuhin a sanghai chengna Malka Ganj, North Delhi ah a khawsa ve mek anih.

@@ June 16, Ningani zan khan Delhi Hmar Welfare Association chun meeting an nei a. Hi huna hin member thar dinga an lakluthai lawmlutna ruoi khawm an kil tlang nghal bawk. Chun tukum 2011 a Sikpui Ruoi/Kut chu December 3 (tentative) a hmang dingin an rel. Member dinga laklut thar hai po po ei lawmpui takzet a. Mi hung entawn tlak a hnam rawngbawltu hung ni pei dingin ditsakna ei inhlan nghal bawk anih.

@@ Chawlkar khat liem tah khan Childrens’ Home, Saikot a lo seilien ve Tv. James Ruolsangkhum chu an chengna Munirka, New Delhi hmunah a lo boral tah. Ama hi DHWA member ni naw sienkhawm ei thuoituhai chun thei ang ang a sawmdawlin an lo buoipui thu ei lo dawng. Lusun tuortuhai ei sunpui takzet.

@@ June 15 khan Delhi University first Cut-0ff list a lo suok nawk ta a. HSA member registration thaw thar iemani zat chun college khawm an lo hmu fel ve ta anih. Ei lawmpui takzet. Hlawtlingna chang ngei dinga nasa taka thang la pei dingin ditsakna ei inhlan nghal bawk anih.

@@ Zani, June 18 khan Pu Timothy Shakum inah HCFD Executive Meeting nei ani a. Building Committee thar ding khawm siem fel ani thu ei lo dawng. Hi baka hin HCFD thawktuhai pay khawm revised ani bawk.

@@ Zani, June 18 khan Kathuria Public School Football Ground, Vasant Kunj ah Spiderman XI le X-Men XI hai chun ‘The Ultimate Summer Heat Football Match’ an inkhel a. X-Men XI hai chun 6-2 in Spiderman XI hai chu an lo hneban tah anih. Thlirtu mipuihai mit a tlai hle thu ei lo dawng.

@@ Vawisun, June 19, inkhawm tin char hin Tv. Lalneilien Inbuon, Music Secretary, inah Department of Music & Youth Affairs, HCFD meeting um a tih. Committee Member po po kim taka thang seng dingin Chairman, Tv. Jessai L.Shakum in inhriettirna a hung siem anih.

@@ Hung tlung ding June 24, Friday zan khin Thalai Inkhawm a um nawk ding a ni a, mitin inkhawm seng dingin ei in fiel thar a nih. Hi zan hi English Worship Service ding ani leiin ei ruol le pai Hmar tawng hrelohai khawm inkhawm dingin hung fiel seng tum ei tiu. Conductor-Mr. Samuel L.Khawbung; Short Sharing-Ms. Sary Buongpui; Special No.-Mr. Michael Joute; Message-Ms. Daisy Darngawn.

[DT 19/6]