Berampu Thra

Lal Remsiem

            Hun iemani chena inthok khan ‘BERAMPU THRA’ ti hi ka lungrilah a um a, ka ngaituona a kam zing a. Ienga kei hi Berampu khom ni lo, mani Company-a sinthaw ve ringot, hieng taka ‘Berampu thra’ ti thu ka hang invoi el hi ka ti lungril a, inkei dei ka tum hràm hrâm a. Sienkhom, a zuol deu deu a, ziek suok dingin a hung inlang nawk a. Tu lai lem chu ka kawng nat leiin Doctor-in zal trok trok a, tho khoma minit 30 bak inthrung

lo dinga a mi ti ka ni a. Chuleiin, hi sermon tawite khom hi ziek ngaina a um naw tluk a nih.  Amiruokchu, “Khumah bokkhup pum bekin i ziek thei naw ding maw?” ti angin ka lungrilah zawna a hung um non tlut tlut leiin, kawng na sá sàin khuma bok pumin ka  ziek a nih.

           John 10:3 a chun, “A beramhaiin a rawl an hriet a, a beramhai chu an hmingin a ko seng a” ti ei hmu a. “Beramhaiin an pu rawl an hriet a” a ti hi ka ngaituoa. Mihriem khom hin an rawla inthok ei hriet thei nal hai hi chu ei hriet hnê hlè tina a nih. Voi khat voi hni chauh rawl ei hriet hi chu ei inchik hman tak tak ngai nawh.  Beram nawk nghal, ran laia ran bengvar pawla hril khom ni loin an pu rawl an hriet nal thei chun an puin enkol le ching hnein a biek rawn hle tina a nih.

           Awle, eini Berampuhai hi teh, ei beramhan ei rawl an hriet am?  Ei ko ei ko khoma ka pu rawl a nih ti an mi hriet hran thei ta naw el chun a va poi awm de aw?  Ei beramhai lai ei um ngun am?  An harsatna ei hriet am?  Ei trongtraipek hlak am?  Lam indik nawa an fe chang ei thruoi kir hlak am? An naw leh, malsawmna, vangneina, hlawtlingna, lawmna an nei changin ei lawmpui hlak am?

Mi pakhatin a hril ka hriet zing chu, “Traphai trappui chu awl tak a nih, lawmhai lawmpui ruok chu intak tak a nih, ei thîk deu rùn el chu tie!” a ti a.  A awm angreng hle. An leh ei berampuhai hi teh hienga hin ei thrang sa ve am aw?  Ei thrang sa ve chun thil poi tak ning a tih.  Beramhai chu an nat chang um a ta, lam indik naw an hraw chang khom um a tih. Chuonga an lo petek chang chun theida a, hnàm a, ensan el lova ngaina tak le duot taka kan a, ei inpawlpui a, lampui indik ei kawkhmu chun ei thruoi kir thei nawk hlak a nih.

           “Beramhai chu an hming sengin a ko a”. a ti a.  Baibula beram inhmang tekhinthu kha ei hriet seng a.  Berampu chun beram zakhat a nei a, chu laia pakhat chu a’n hmang a.  Iemani kong zawnga ngai chun ngaisak lo el khom awm tak a nih.  A’n huot bik èm a, thu a awi naw bik leia inhmang a na, a cháng chàng chang raw se, hang ti el khom ol tak a nih.  Sienkhom, Berampu chun a ti awzawng nawh. Rawl kara hai, trênbarama hai a hmu hma khat a zong ngat ngat el a nih kha.  A tawp a tawpa chuh a hmu a, a hlim êm èm a, a liengkoah inchuonin a hung kirpui a, “Mi lawmpui ro, ka beram inhmang kha ka hmu nawk tah”, a ti a ni khah.

Eini berampuhai hi teh?  Ei kohranah beram ieng zat am an inhmang a?  Thralaihai lai ieng zat am lampui inhmang an um a? Thrahmahai lai ieng zat am tlan hmang an um a?  A’n hmang zat khom ei hriet naw am a nih?  Annawleh a’n hmanghai chu zongin, ei hmu pha thruoi kir dingin iengtin am hma ei lak a?

          “Beramhai chu an hming sengin a ko a” ti a ni a.  Beram za chu an hming a hriet seng a nih. A va hang thra de aw! An inhriet chiengin an inpawl hnê hlè tina a nih.  Ei kohran senga berampuhai, inngaituo veng ei tiu khai.  A bikin thralaihai hi kohran tina hin member za bak ei ni ka ring nawh.  Ei berampuhan an hmingin an ko thei seng am aw?  Ko thei seng hai sien, hre chieng hle hai sien, beramhan an pu rawl hre chieng bok hai sien chu a va thra awm de aw! Beram pakhat inhmang, a puin poiti taluo a, a hmu hmakhat a zong angin, biek in khom pan nachang hre ta lo, suolna khura tla, lam inhmanghai popo hi thlarau lainatna neiin, invoiin, zong hai sien la, beram huonah hung thruoi khom hai sien la, piengtharna indik tak an nei theina dingin lampui indik kawkhmu hai sien chu ei ram kohran hin hma a va hang sawn nasa ding de aw! 

           Ka hmu ve dan chun, ei ram kohran thruoitu pastor le upahai hin, khieng a chunga ei hril ang khi chu ei hlat ta hlè niin ka hriet.  Zu inrui hmang, Drug ngolvei le suolna chi hrang hranga intanghai chu ei pastor le upahai hin biek tina khom an tin ta naw a, Jeriko panna lampuia suomhmang tuok, thidanga zal, thiempuhaiin thrangpui ta neka an hèl lem ang el khan, an intuok chang khomin hmel hriet lo angin an fe pêl el a nih.  An nauhai chen khom chuong ang mihai chu be lo ding le pawl lo dingin an infui hlak.  Hieng nek hin, laina tak le hmangai takin pawl hai sien, sandamna huongah thruoi lut tumin an nuom zawng thawpui hai sienla chu, berampu sin an thaw tak tak ning a tih. 

            Thrangtharhai nuom zawng hi pastor-hai le upahaiin an hrietpui a trûl  takzet a nih.  Kha hmaa ei inthruoi dan ringot kha chu a fe ta naw a nih.  Ei kohran member hai hi hre chieng hle inla, lampui dang an pet ding, an inhmang ding inlau em em inla, an lo inhmang pal a ni khomin, zongin thruoi kir nawk nghal inla chu ei ram kohranin nasa takin hmasawn a tih.  Ei pa Pathien khom nasa takin lawm a ta, mal mi sawm ngei a tih. Sienkhom, tuta ei ngirhmun hi chu Pathien malsawm tlak khom ei ni nawh. Berampuhaiin an beramhai chawm lovin, an beramhaiin berampuhai an chawm ei beisiei letling ta lem khom a hoi khop el.  Ei ram le kohran ngirhmun hieng lawm lawma a tlak siet el tah hi hieng lei khom hi lo ni rawi naw nim.

           Ni khat chu tlangval ruolin thil poi an thaw a, namen lovin an buoi a, jail-a lut pha hiel khom an um a.  Ka hang hriet chun poi ka ti hle a, ka lungril a na a, mi mal lem chun ka hriet ngai khom an ni tawl chuong nawh.  Sienkhom ei tlangvalhai, ei kohran member-hai laia mi an ni tlat leiin theitawpa thrangpui kha ka zuk nuom nghal el a. Ka thaw thei a tlawm a, sienkhom lungril tam tak ka seng a, ka thei tawk ka thaw bok a. Chuonga ka buoipui kuol vel lai chun, pastor pakhatin “Buoipui buoipui naw rawh, misuol ruol, zurui ruol, buoipui buoipui ding an ni nawh,” a ti a, ka lungril a sukna em em a.  Kei chun “Pastor-haiin hieng tlangval zuruihai in ngaisak naw hi in indik naw a nih, mi dang nek hmanin in ngaisak lem ding a nih” tiin ka don a.  Kohran thruoituhai hin lampui inhmanghai hi theida ena en a, be nuom loa nghatsan el lovin, biek a, buoipui a, pawlnel a, thlem a, biek inah, sandamna huongah hung thruoi lut tum seng lem ei tiu khai.

(7^th July 2006)

 [DT 5/6]