Lawrkhawm

@@ June 21 khan HSA Jt. Hqrs., Aizawl hmalakna in Manipur le Mizoram in fe pawna lam pawimaw tak, NH-150 ngirhmun chungchangah Mizoram Chief Minister Pu Lalthanhawla inhmupui a nih. Hi highway hi inchuklaihai le sumdawng mihai

tading a pawimaw tak el ni si in, a zawmtu tak Tuivai leilak chu kum 15 liem ta lai khan tuilienin a lo suksiet ta a nih. Tuivai leilak siemna sin fe mek hi a hrat nawk zuol theina dinga hma hung la thar dingin CM Pu Lalthanhawla kawlah memorandum thelut a nih.

@@ June 19, Pathienni zan khan Department of Music & Youth Affairs, HCFD chun meeting an nei. Hi meeting a hin tukum 2011 a Thalai Conference le inzawma thil pawimaw dang dang hai hril tlang a nih. Program kimchang taka induong zo a la ni naw leiin tu hri hin chu ei lan suo thei naw a, sukfel ani phat leh inruolsiekna ding item hai leh la hung insuo a ni ding a nih.

 

@@ Ruonglevaisuo Film Society in a buotsai, “TLANGRAM NUN’ ti chu Delhi lai khawm inchawk thei dingin a lo hung tlung nawk tah. Hi film hi documentary ang deu a siem a ni a, tlangram a ei chi le kuonghai khawsak relbawl dan chi hrang hrang, fak le dawn zawngna, thalai le naupanghai nun dan chen khawm an suklang nuol. Director chu Pu Chunga niin Pu Lawia produce a ni thung. Tlangram khawsak I mit ngei a hmu ve I nuom chun en ngei ngei chi ning a tih. Tv. Robert L.Khawbung (+919911685934) kawlah cheng 150 a inchawk thei zing a nih.

@@ Tv. H.Johnson Hmar chu tulna dang dang lei a Delhi a chawlkar hni vel a cham hnungin June 24, Zirtawpni khan Tuithaphai tieng panin a lo liem nawk tah.

@@ Zani, June 25 khan JNU Ground ah X-Men XI (HSA Jr.) le Siam Sin Pawl Pi (SSPP) hai chun football match an inkhel. Hi inkhel hi inang tawk vieu hai sienkhawm a tawpah chu SSPP hin X-Men XI hai chu 2-1 in an lo hneban tah a nih. Inkheltuhai an thang nasa a, thlirtu mipui mit a tlai hle niin ei chanchin dawngna chun a hril.

@@ Vawizan inkhawm tin char hin HSA Office, 16 E, CGH Complex, Vasant Vihar ah HSA meeting um a tih. Member po po kim taka thang seng dingin Secretary Nk. Thlirnawnmawi Puruolte chun inhriettirna a siem. HSA Freshers’ Social Meet 2011 chungchang ngaituo tlang ning a tih.

@@ Kar thar July 1, 2011 khin Munirka hmunah Thalai Inkhawm um nawk a tih. Topical Study nei ning a ta, tuta tum hin South Extension thalaihai in chanvo bik chang an tih. Chanvo bik changtuhai chu:- Conductor-Tv. Jehova Khawbung; Tantu-Nk. Chawnglienmawi; Special No.-Nk. Lalrimawi Sungte; Topical Study Thuoitu-Tv. Jessai L.Shakum. Mitin inkhawm dinga fiel ei nih. Zan dar 8:30 a program tan ning a tih.

[DT 26/6]