MY PAR-SO-NAL-I-TY? -Episode III

-E.Ramngailien Lungtau

Chuonga lungsie taka ka um lai chun, ka ngaiven kar hlak chanchin chu an mi hung hril tah a. “Rosy’n nau a nei tah ie!!!” tiin Engi chun a mi hung sms a. Rosy nau hih tu nau am a na ti khom ka la hriet naw a. A ngo am a hang, am mit ping ti tak ngiel khom ka hriet der si noh. Ni danga ka hriet chak nek hman khan tu zet hin chu iengkim hriet ka nuom ta hle el a. Voikhat chu hang kan reng reng ka tih ka ti lungril leiin Rosy umna chu zong dawk nghal

ka tum tah a. Delhi-ah chu a um ngei ka ring a, a pasal le tha taka naute nei an ni khom ka nuom pui hle. HSA/DHWA thuoitu hai kuomah intlun el lang an mi thangpui thei lem di’m aw? ka ti vong vong a. Anachu, muolpho ka lau uoi leiin ‘one man inquiry commission’ kan din lem tah a nih.

Delhi HSA'n a siem zo chau, “Delhi Hmar Telephone Directory” chu ka hmang tangkai ta zêk el. Delhi tlangval lai chu touch screen mobile phone nei hmasa pawl ni dingin kan ring. China mobile phone nei hmasa pawl tak niin kan hriet. Memory card khom 256 MB chau a la ni nghe nghe. Ka mobile phone a hin mi hming le an mobile number 1000 neka tam an save thei a. Vodafone sim card-ah 300 vel an save thei bok a. A rengin 1300 vel an save thei tina a nih. Chu zat vel vang chu mi contact number ka phone-ah nei langkhom ka hmangai bek bek, indopui-3na um ta thut sien la khom ka ngaiven hmasatak ding, Rosy mobile phone number ruok chu ka nei ta si nawh. Directory-a chun vel tam ka zong a. Hi lekhabu hi a hming chun telephone directory chu a ni a, Address book khom a nih. Chu el khelah, Delhi Hmar mipui census khom ni awm tak a nih. Ka tading chun a remchang hle. “Hi ‘Tinreng lekhabu’ a hin khaw’m hei zong tha nawk ka tih” tiin vel 7 lai top ka zong a. Telephone directory ni bok, Delhi Hmar Census bu ni ang reng bok; Ei directory hi chu ka tangkaipui namen noh. Chunga lungzing taka sunkhuo zankhuo ka’n tawi el lai chun Rosy biek theina ding awm chu ka hmu dok tah a. ka lawm hle el. Mi sawm vel ka phone kuol zo hnung chun, Rosy umna chu ka hung hriet tah khong khong a. “Eureka! Eureka!” tiin ka khek suok naw chau a nih. Ka enchimlo, ka vapuolte, rawlthum deu khom a ka biek phal ngai lo chu Bapu Vihar lai khieng ami lo lawi san hi a lo ni zing el. An in panna lamtluong chu Google-Earth ah ngun takin ka zong a. Ieng ni naw langkhom pa mawl sathlie el chu ka ni bik naw khom lo ni ta rawi naw nim; a fe dan ding chu harsa lo takin ka zuk hriet nghal el tah a. Anachu, ka hrietthiem naw chu Rosy umna address hi sawrkar quarter a ni si a. Ieng ti kong zawnga Bapu Vihar lai a um thei am ning a ta ti chun ka lungril a hamzing kher el.

Rosy ruoltha tak, Engi chu JNU-ah koin ka thil hriet thar hai chu ka hril vong tah a. Chunga ka hei hril mol mol chun ka ring naw ting daiin “Rosy pasal mobile phone number chu ka nei ran an nawm, nang ka ngaituo em lei chein ka pek nuom dal che a ni kha. Rosy hi chu theinghil el thei la chu ka va ti de aw!?” tiin a mi hril ta phong a. “Iengkim mi hril el ta’m. ka lung nat ding mi ngaituo naw roh, lengtul eiin ti nuom el ta hih” ti a ka hei ngen chun, iengkim chunga iengkim el chu a mi hril tah a. Ka tap ta ngawng ngawng a. (huoi-hah, pa hi chu a lo intak deu a ni hih)

December, 2008-a veng ka hang suok kar khan Rosy chu tlangval pakhatin titak deuin a lo leng hlak a. Hi tlagval hih ‘eligible bachelor’ deu chu a ni awm a, nunghak hai ngaiven khom a hlaw hle a nih. Ngaiven hlaw tlangval ta ding chun dit tlangtheina a nei a. Ama hih Delhi-a hung thar chau, sawrkar sin nei thar a ni a. A hming hei ziek lang khom hih a phuo hlie hlie a chu ka ziek lang der naw ding a nih. Tiemtu-hai mi lo hrethiem el in la ka nuom. Ministry of Tribal Research and Development (MoTR&D), Govt. of India hnuoia Assistant sin thaw dinga Delhi khawpui-a hung a ni a. Anni hai ang sawrkar sin nei chu an luck ding reng khom a ni a. Nunghak hmeltha tak tak khom leng ngam an ta. Nupui-papui then khat hai lem chun an nau nunghak-hai ta dingin an lo ngaizawng pui ve rak rak el khom ka ring a. “Ieng leia ka hmangai tak Rosy kher kher a mi lakpek el am ning a ta?” tiin ka ngaituona a pot fan nasa khop el a. Rosy hlak chu a hmel hei en ringot chun inlang nal ve puot sienkhom belchieng dawl bek bek a lo ni si noh. Pawl 12 khom open-a zo ve kha a ni a. Khawvel khawsakna konga khom ruol hnung hnot zing zing hlak a nih. A pasal hin a hmangai tak tak naw chun iem a chang pei ding ti ngaituona chun ka sip liem em em tah a. (Ami’n an hril lemang der thiem nunrawng hmeltha chu lo ni ve sienkhom hmangaina indiktak chun chuong po po chu a hmu khum khel tlat si. Val buong hih ka lo buoi nawk hlak chu a nih)

Tlumte thlir a ka lo thlir inrinni a hung tlung meu chun kei khom ka hun awl lai tak a ni bok leiin Bapu Vihar tieng pan dingin ka 150cc Red Pulsar Bike chu ka nawt fai hleu hleu a. Ka taksa’n phur hle sienkhom ka lungril ruok chuh tumlawi lera zakuo boa in zep ang tho niin kan hriet. “Khawhem, val hin ka chang chang va chang ta de ning” ti’n turni-chartang hnuoiah Japan ral lien laia ral hmatawng ding ni awm mangkheng chun ka tlan phei ta hlep hlep a. Rosy pasal (a hming ei hril nuom der naw kha) hai thawkna hih Ministry thar deu a ni leiin quarter khom an bawl thar hlok a la ni a. An thiengin a hmun le hmang khom a zalen hle. Gate tuola chun ka ngir chat tah a. Security guard pakhat chun, “Kya hua, Sir Jee?” tiin a mi lo indawn thlitlai nghal a. “Z-TB/65 ka, dil ka baat hai” tiin zuk lut el ka tum chun “Pocket mein kya hai, sir” a hung ti nawk khanglang a. Ka hnungtieng mansa ka zuk dap takluo chun ka lungsen vortawp laia Rosy pasal hlap hlum na ding ti a ser-nga tubau ka pai chu ka lo la fen pei hi a lo nih a. Chu tubau chu lain gate a chun kan tung tah a.

Rosy hai building chu sawng 7-na ani leiin lift chun kan tawl tung a. An door bell-ah ka kutchal innghata ka zuk hmet tum char chun ka lungril-ah ‘hi lai hin ieng am beisei i la nei a ni a?’ ti a mi selkaltu um ni awm then hin ka hriet a. Ka buoi zuol sau el.


[DT 19/6]