Lawrkhawm

@@ HSA Jt. Hqrs., Delhi in DU registration Help Desk buotsai dinga a lo rel chu tha takin a zo thei a lawm a um. A tum thumna June 8 um dinga ti kha June 7 a sawnhnai ani a. Amiruokchu, student iemani zat a la submit hman lo an um leiin June 8 khawm khan ei thuoituhai chun an la va bawzui nawk a
. Inpak an um takzet. Kum dang angin tukum chu student thar an tam naw hle a. HSA member DU a registration thaw thar ei hriet thei po chu mi 15 bawr vel an nih. College tha tak tak an hung chang tawl ngei ei beisei.

@@ Chanchin ei lo dawng danin North Delhi a khawsa mek Nk. Rose-el Rothangmawi Khojol chu Indian School of Mines Entrance Exam ah hlawtlingna a chang a. All India ah 49-na a kai phak anih. Hi bakah hin Indian Institute of Technology a inchuk thei ding khawma Entrance Exam a lo fethleng tah niin thu ei lo dawng bawk. Ei member hieng ang hlawtlingna chang phak ei um hi lawm a um takzet. Ei lawmpui hle anih. Hmatieng peia khawm hlawtlingna insang lem hung chang pei dingin ditsakna ei inhlan nghal bawk anih.

@@ Zani, June 11, 2011, tuk khan Upa Thangchunghnung Sanate chun an chengna in Parbungah muol a mi lo liemsan tah. Ama hi HSA, Jt. Hqrs., Delhi a President ni lai zing Tv. James Pusing Sanate pa anih. Kum 92 a upa ni ta in hun iemani chen a inthawk khan a hriselna a that tawk naw lei a tho har pei ta lo ani a. Hi le inzawm hin ei President khawm Delhi suoksanin thla hmasak lai khan Parbung tieng a lo fe ta reng anih. Ei tuorpui takzet.

@@ June 6, 2011 khan ICDP, RPC-NEI, Parbung huoihawtna in Parbungah World Environment Day hmang ani a, thingkak 300 vel phunna nei anih.

@@ June 11 khan Delhi Hmar Welfare Association chun Dwarka Cemetry ah fee iemani sungin an lo va’n zieklut tah. Tuta inthawk chu ei member thi le mang tuok, Delhi tlanga vuiliem el ngai dam an lo um chang khawm kha hma neka remchang lemin ei insawngbawl pei thei ta ding anih. Lawm a um hle a, ei thuoituhai hmalakna inpak a um takzet.

@@ Tuta kar liem tah khan HSA, Delhi Treasurer Nk. Esther L.Hmar khawm dam takin Delhi a lo hung chuongkai nawk tah. Ama hi insung tulna lei a hang inzin suok zawk anih.

@@ Delhi lai a Hmar el nilo, hnam dang nunghakhai chen khawm nal nawk zuol a lo chei hlaktu Nk. Lali Inbuon, Beautician, khawm tuta kar liem ta vek khan Delhi a lo hung chuongkai ve nawk tah. A hung tlung ri an hriet le inruolin nunghak iemani zat (nupui thenkhat thangsain) chu an invak sieu ni’n chanchin ei lo dawng.

@@ June 17, Friday zan khin Thalai Inkhawm um nawk a ta, Pastor Lalsiesang in Pathien thucha hrilna hun hmang a tih. Ei Pastorin BD a hung zo hnunga Thalai inkhawma a thuhril nawk phutna ding ani leiin ngaithla seng dingin ei in ditsak hle. Conductor-Tv. James Milienropui; Tantu-Nk. Dorothy Lalneizo; Special No.-Nk. Sandra Darsingpui le Nk. Talitha Lalruotmawi. Inkhawm hun le hmun chu a pangngai, NTBC Inkhawmna basement ah 8:30 pm a tan ning a tih. Mitin hi in khawmna a thang ding hin ei fiel.

@@ Nk. Esther Ruolngul D/o Pu John Ruolngul chu tukum Seisen International School, Tokyo a inthawk Class-XII lo zo ve tah. Aggregate in 92% a hmu phak bakah subject thenkhata lem chu full mark khawm a hmu phak hiel a. Subject po po a hin 86%-100% a hmu phak vawng anih. Ei lawmpui takzet.

@@ Delhi a lo um ve hlak Upa Ruolkhumlien Buhril, IAS le Pu John K.Sellate, IAAS hai khawm Joint Secretary in Delhi a an lo hung transfer thar ve ve tah. Hi baka hin Pu David Hrangate chu National SC/ST Financial Development Corporation ah Chief Manager sin zawm dingin a hung transfer bawk. Chanchin ei lo dawng danin an ni pathum hi Delhi a hung chuongkai seng ta anih. Ei officer Delhi a hung insawn thar nawk hai hi DT chun a lo lawmlut takzet.

@@ DHWA Adviser Pu L.Keivom chu Frank Landymore le a sunghai inzinpuiin June 11 khan Tuithaphai tieng a lo pan nawk tah. June 17, Zirtawpni khin Delhi a hung chuongkai nawk hman beisei anih.

[DT 12/06]