Editorial

Delhi Thurawn suo hnih, kar liem tah le chu hmasak, haiah khan Vengbuk Thlirna column ei inchuon thar a. Tiemtu thenkhatin tha an ti thu an hung hril a, a mi sukphur thar hle. DHWA le HSA thangruol a area visit nei ani lai khan vengbuk tinah Delhi Thurawn chungchang khawm hrillang ani ve hlak a.

Kha rasuok kha ani el dim; tulai chu tiemtu tieng a inthawk khawm a feedback le suggestion hai ei dawng zeu zeu tah a. “DT hi Editorial Board hai khat a an sukhring ding le an suk hrat ding ang chau a ngaina lungril a um am anta aw” ei ti vawng vawngna lungril kha a sawng hle a, thil lawm um tak anih.

            A chunga ei tarlang, Vengbuk Thlirna column hi Pu Lalchungsiem Thlawngate in a hung suggest a, ei tangkai pui seng beisei in hung bawzui nghal anih. A bul tanna ding khawm a ama vek hin sample ding angin an vengbuk Mehrauli chanchin tawi fel takin a hung ziek bawk a. A chunga lawmthu ei hril thar anih. Hieng ang a thurawn inpe tawn a hma ei lak ani chun DT hi article, tawngbau le chanchin lawrkhawm el ni lo in a telpuia ei sawr lem thei dan um pei a tih ti chu ringhla a um naw kher el. Thil dang dang khawm belsa dinga tha a ei hriet a um chun iengtik lai khawm ei lawmlut hle zing anih ti ei hriet thar nuom a um bawk.

            Ei khaw thlir khawm ei suksei pei nuom a um a. Tam tak hin chu thuoitu ding khawm ei thlang chawt ringawt a, an mawphurna an tlak am, an ngaisak am ti khawm ei uksak chuong lem nawh. Hma sawn pei ei nuom si chun thuoitu ding khawm tlin le tha a ei ngai hai thlang ei ta; iengtin am kal an pen ti khawm ei ngaiven ding anih. Chun, an mi thuoina tieng tieng chu phur takin ei zui bawk ding anih. Chu chu ei thaw makmaw anih. Chu chu ei pei si naw chun ei hmakhuo ding chu inkho hle’ng a tih. DT khawm a buoipuituha’n sawl ve em emin an hung buoipui a, uove-auve khawm ti loa an ning ning ei inning tir el chun hma sawn bek bek ngai naw nih.

            Chuleiin, ngaituo thar ei tiu. Thuoitu mawphurna iem ana? Mipui mawphurna iem ana? Nang i mawphurna iem ana? Lu pakhat a inthawk ringawt nek chun lu tam taka inthawk a suok chu belchieng a dawl lem chawk hlak. Abikin, inchuklaihai kha inngaituo thar ei tiu. Thangruol hi hratna chau ni lo in, bengvarna khawm ani si a.

[DT 5/6]