MY-PAR-SO-NAL-I-TY?

(sunzawmna)

                                             -E.Ramngailien Lungtau

Hun iemani chen hnung chun Rosy nau nei chu a hung hun tah a. Asan hre der loin, iengtin deuin am ani chun, a nau nei ding chu ka lo phur ve èm ém el a. Naute chu hmu ka chak a, a hmel ngei hei hmu thei; a pom bek hei pom lang, a being hei fawp lang ka ti ngoi ngoi el tah a. A nu a sùn a ni vei chun naute chu a hmel khom a tha ka zuk ring a. A nun ruok chun a nu sùn naw sien ka nuom hlie hlie

.

September 13, zantieng dar 4:30 a ni chun “Rosy’n nau a nei” ti chu an mi hung hril ta ngei a. “Anachu, Rosy chu a chau taluo, khawmuol a hriet naw a, darkar 6 vel ani tah, a la tho har pei der noh” tiin a ruolhai chun sms hmangin an mi hung hril lom lom a. 3G video calling hei thaw chu ka chak khop el a. Amiruokchu, Rosy mobile phone hlakin snake game chau naw chu a support si noh.

Rosy mizie ka hriet chieng khop el a. A Fak-le-dawn, a fe-le-lutna hlakhai chu changkang èm ém sien khom, Rosy hi technology tieng chu an hnuoi khop el a. Touch screen chu hrillo, mobile a tawk thei tok a nih. Hriet bek bek hlak nei ve lo. SIM card le ATM card khom a hriet karthlak naw kha a ni a. I phone ah Bluetooth I nei? Tia ka hei indon lem khan chu, a hriet naw taluo kha; “HCFD album hla hai kha mp3 formatin I nei chun ka va dit ve de, Bluetoothin mi hung thawn ta. I phone-ah Bluetooth a um an naw?” tia ka hei indawn chun. “Bluetooth chu ka nei ngei, anachu balance ka nei ta le, ka thawn thei naw ding che” tiin a mi dawn a. Tumkhat lem kha chu second-hand thin dingin Nike Showroom-ah a lo lut nok a, a’n tirdok inrang ie! Saptong nawk thung hi chuh; a tiem nal naw ang huoin a lam nal zek el a. Saptawnga mi a biek reng rengin a thil hril, a tamlem chu ka hrietthiem ngai naw a. Mobile phone-a saptonga mi a hei biek lem hin chu a thil hril ka hriet zeu zeu chau lem ta hlak. Khovel changkangna-thlipui chun a mut leng dawr dawr niin ka hriet tak hlak. Thuomhnaw inhme lo a nei ngai noh. A figar-in a zir el bakah a hák hàk chu, tulai takah, a fashion a hung ni nawk pei leiin inhme naw hrim hrim a nei thei ngai noh. Rosy nuomsa’t zawng chu KFC, Mc Donalds a fe, DT cinema-a movie thar thar en hman pei dam hi a ni a. Hlasak inhnik le music tienga inhnikna nei ni bar lo; hlapawla aAIR a thang hlak khom ni bok lo hin Concert reng reng ah a fe hman vong hlak a. A huou huou a halelluia pui a, Biekin-a mi an tongtai chang ti nuom ngai mang lo hin ruol ha’n lengpar dinga an hung fiel chang olrongin ‘Amen’ a ti nawk loi hlak si. Eini mi laia khawsak an khor hle a. A thlatlum naw reng bok. A chiepui hai nekin rong inlar mihai a ngaisang lem a. A ngo le a dum a ngaina em em tlat hlak. Asan ka hriet bik noh! Kan don hun hun chu kan buoizuol hun a ni pei hlak leiin kan don ta ngai naw hrim hrim a.

Rosy hin khawvel a paw naw hle a chu ka lungril hi chu a paw hliel hliel hlak ni’n ka hriet. Iengleia hienga ka lungril a lak bek bek el thei am a na ka ti chang, a dawnna keiah ka hmu zo ngai si noh. Lengdang nau lo pai ta sien khom ka hmangaina hroul chu zaikhat khom a lan chat chuong noh. Ka hmangai hin tang dang mi lo bel san ta sienkhom, harsatna a tuok a, lungngaina khur-ah a thlak chang, thina varuom a hraw chang, ka lung hi a ver ril thei a, ka thlarau chau ni loin ka taksa’n a tuor zuol nawk hlak. Rosy laka ka chan siet zie chu ka hriet a. Chieng taka banga inziek tah ni sien khom, a chanchin mol chun ka nadâr a ver hne nawk hlak a nih.

 (la sunzawm pei ding...)