Lawrkhawm

@@ May 25, Nilaini khan Department of Music & Youth Affairs, HCFD chun 256, Sector-1, RK Puram-ah Pastor Lalsiesang Joute’n UBS, Pune a inthawk BD zo lawmpuina le; May 30 a BD inchuk ding a Pune tieng liem suk ve nawk ta ding Pastor Lalditsak Inbuon le Tv. Zarzolien Infimate inthlana hun an hmang. Hi inkhawm program hi Thalai Chairman Tv. Jessai L.Shakum

in a vawng a, lawmpui le inthla a umhai bakah Thalai thuoitu mi dang dang a inthawk thuhril tawi ngaithlak ani a. BD inchuk a fe dinghai tading bika tawngtaina le ruoi inhlanna hun Pastor Lalsiesang Joute’n a hmang thung a. Chawhnung tieng ruoi inhnik tak el kil tlang anih. Thalai Secretary Tv. Zarzolien Infimate a um ta naw ding leiin bufak khawp hin charge inhlanna hun hmang zawm nghal ani a. Tv. William R.Darngon chu Secretary ding a charge inhlan ani bakah Assistant Secretary thar dingin Tv. Emmanuel Ramngailien Lungtau thlang ani bawk.

@@ Kar liem ta khan Central Board of Secondary Education chun Class-XII result a lo puong tah. Chanchin ei hriet thei dan china ei member hlawtlingna changhai chu Nk. Chinrimawi, Nk. Marina Varte, Tv. Venson C. Varte le Tv. HK Robullien hai an nih. Hieng ang hlawtlingna changtuhai po po hi HSA Delhi Jt. Hqrs. Chun a lawmpui takzet. Hma tieng peia khawm hlawtlingna insang lem la hung chang pei dingin ditsakna ei inhlan nghal bawk anih.

@@ Zani May 28 khan Pastor Lalditsak Inah HCFD Executive Meeting nei ani a. Ei Building Project le HCFD thawktuhai pay bakah thu pawimaw tak tak iemani zat zet ngaituo tlang anih. Chun, Pastor Lalditsak le Tv. Zarzolien Infimate hai inthlana’n sunbu kil tlang nghal ani bawk.

@@ May 28, Saturday khan HSA Jt. Hqrs. Delhi chun Delhi University Registration Help Desk DU North Campus ah an va buotsai a. Hi hi tukum session thar a ding a Help Desk an buotsai vawikhatna anih. Registration hun hi June 8 chen la hawng ning a ta HSA chun June 4 & 8 ah Help Desk hi la buotsai nawk a tih. Thu chieng lem indawn nuomtuhai chun Education Secy. Nk. Dorothy Lalneizo (+919899038612), Education Asst. Secy. Nk. Hazel Pakhuongte (+919811979011) le Finance Secy. Tv. Zacharia Varte (+919711721497) contact thei anih.

@@ Pu Vanlalmuon Joute khawm a u pa naupa’n a lo boral sanna le inzawmin kar liem ta khan Tuithaphai tieng a lo hang suok ve a. Vawisun, May 29 chawhnung tieng khan damtakin Delhi a lo hung chuongkai nawk tah. Lusun tuortuhai ei tuor pui takzet.

@@ Tuta kar liem tah sung khan ei member damnaw hriet ding an um zeu zeu a. Nk. Elizabeth Sungte, Nk. Jesilia Mangneikim, Nk. Thlirnawnmawi Puruolte, Tv. Phlegon, Pu Lalkhawnvar Shakum le Tv. Joseph Lalrofel hai chu natna chi hrang hrang leiin tuol suok pei lo a an um thu ei lo dawng. Tuhin chu that tieng an hung pan pei ta a lawm a um hle. Na inrik taluo an ni tawl naw a, Damdawiin lut khawm an um nawh. Sik le sa inlumlet vel lei hin damnaw a tam; mitin fimkhur seng ei tiu. Abikin inchuklai exam nei mek hai lem chu fak le dawn thu a khawm fimkhur nawk zuol ei tiu.

@@ June 2, 2011 zan dar 8:30 khin Munirka vengbuk inkhawmna um nawk a ta, a hmun ding chu Nk. Betsy Mawii In ning a tih. Vengbuk thuoituhai in mitin hi inkhawmna a thang ding hin fielna an hung siem nghal anih.

@@ HSA Delhi President lo ni hlak Tv. David L.Lungtau khawm tulna leiin tuta kar liem khan Delhi a hung chuongkai ve nawl el. Ieng chen cham ding a hung am ani ti chu ei la hriet bik hri naw anih.

@@ Friday Zan 8:30 pm in Thalai inkhawm Munirka ah um nawk a tih. Topical Study um nawk a ta; Chapter 23 inchuk ning a tih. Conductor-Tv. Lala Buhril; Tantu-Nk. Jenny Joute; Special No.-Tv. William R.Darngon; Subject Thuoitu-Tv. David L.Lungtau

@@ Liem tah haptakar hmasak khan HSA Delhi Treasurer Nk. Esther Lalramhuol nu, Pi Ramsiempui le sang Nkte. Grace Joute hai chu hun tawite sung chawl malam a sunghai kan dingin Delhi an lo hung inzin a. Kar thar khin Tuithaphai panin Delhi lo suoksan nawk tang an tih.

@@ Tulai hin Hmar Biel lampui NH-150 chu HYA General Hqrs. in Bulldozar a nawr tha in  siemthatna sin an thaw mek ni’n ei thu dawngna chun a hril.

@@ Tulai tak hin Hmar Biel, abikin, Parbung khuo le a se vel a naupanghai lai hartharna mak tak el a tlung mek. Khuo hrang hrang ah hai khin tawngtaina le rawngbawlna naupanghai in nasa tak in an nei hlak ni’n ei thu dawngna chun a hril. School tin in Prayer Mountain a hai tawngtairuolna hun dam hmang in an um a. Thenkhat lem chun khawvar thak a tawngtaina hun dam an hmang bawk. May 26 lem khan chu naupang 40 ruolin bawkkhup a invak a tawngtaiin khawlaidung an fang thu ei lo dawng bawk.

@@ Tulai hnai hin Community Health Center, Parbung chu a hma po po nek a tha lem in a hung function ve tah. Khaw dang dang anthawkin damnaw inenkawl an um zing bakah kar liem ta sung khawm khan mi 200 chuong lai in medical check-up an nei. Tuta MO sin chel mek Zachinthang Simte chu a Biel mipui ha’n an inpak hle. Nurse duty khawm umzingin sin nasa takin an thaw mek a, kha hma met khawm khan Medical Camp dam buotsai in a lo um tah anih. Hieng ang a mani sin ringum tak a thaw nuom mi ei ram sung a an hung um ta pei hi ei lawmpui takzet anih.

(DT May 29)