Lawrkhawm

@@ Chanchin ei hriet thei chinah Nk. Jesilia Mangneikim ti lo chuh, DT suo hmasak a ei insuo, ei member damnawhai kha that tieng an hung pan pei tah. Lawm a um takzet. Hieng lai zing hin ei Val-upa Pu Lalthuoisuok Pudaite, Munirka

a khawsa mek chu Chawlni hmasak a inthawk khan Blood Sugar insang leiin tho har hlei thei lo in a lo um ve thung a, pawi ei ti hle. A hung dam that vat ei beisei.

                                          

@@ HSA Jt. Hqrs., Delhi Treasurer Nk. Esther L.Hmar chu tulna leiin May 31 tuk khan Delhi suoksan in Tuithaphai tieng a hang inzin. Ama ruol hin Delhi a hapta kar hni vel cham a hung inzin a Nu le a sangnu khawm an lo suok ve nawk ta bawk. Nk. Esther hi kar thar khin Delhi a hung tlung hman nawk beisei anih.

@@ HCFD Thalai Pawl thuoitu, Vice-Chairman ani lai zing a tulna dang lei a Tuithaphai tienga lo insawn nawk tah, Tv. H.Johnson Hmar chu CPF (Assistant Commandant) Written Exam a hlawtlingna a chang thu ei lo dawng. Tuhin PET le Personal Interview a la hmasuon ding anih. A hlawtlingna hi DT chun a lawmpui hle a; hmabakah khawm hlawtlingna chang zawm pei dingin ditsakna ei inhlan nghal bawk anih.

@@ UBS, Pune a BD inchuk ding a fe ei Pastor Lalditsak Inbuon le Tv. Zarzolien Infimate hai chu May 31, Thawlenni tuk khan damtakin an inchukna ding hmun an lo chuongkai tah. Zani hmasa, June 3, khan Registration le Admission hai khawm tluong tak a an zo fel tak thu ei lo dawng. Tluong taka hung inchuk zo ngei dingin ei ditsak takzet.

@@ Zani, June 4, khan HSA Delhi Jt. Hqrs. chun tukuma a tum hnina dingin DU North Campus ah Registration Help Desk  an va buotsai nawk a. Student 4 registration thaw pui an nih. Tuchena a’nlang danah tukum chu DU ah regular student thar ei hau bek naw ding nisien a hawi. Amiruokchu, Registration Help Desk hi tawpna dingin June 8 khin North Campus a ma vawikhat la buotsai ani nawk ding anih. A la’n register nuomhai chu hi hma ngei ngei a documents iengkim lo sukfel dingin ei inhriettir nghal anih.

@@ Tukum Assam Board exam a khan Mahipalpur a khawsa mek Pu Thangnuntluong Ralsun nauhai pahni chu a thaw tha bik lai an thang phak anih. A upa lem Nk. Rebecca Lalnunfel Ralsun chu ASHSEC hnuoia Class-XII (Science) exam eini mi 300 bawr vel hai lai a thaw tha tak niin 80.6% a hmu phak a. Assam Sawrkarin scheme thar a siem hnuoia Merit Scholarship hmu dinga thlanghai lai a thang phak hiel a. Degree a’nchuk sung po chu Assam Sawrkarin kumtin Rs. 30,000 a pek ding anih. Ama hi Cotton College a kai niin  English le MIL (Hmar) ah Letter Mark a hmu phak bawk. Chun, Premier Academy a kai, a naupang lem Tv. Ramdinlien Ralsun khawm a SEBA hnuoiah Class-X First Division a pass in Computer Science ah Letter Mark a hmu bawk. Ama hin State Sawrkar a inthawkin lawmpuina laptop dawng ve’ng a tih. Entawn a tlak hle a; ei lawmpui takzet anih.

@@ West Delhi Area thalaihai chun vawizan khan vawisun inkhawm tina zawr ding behna intawmin an bei nasa hle. An hmeruo hi Thalai Inkhawmpuina ding le inzawm a vengbuk target siem a um kha an khum ngei theina dinga a hung zawr ani leiin mitin in lo inchaw pek sup sup ei tiu. West Delhi Area an thaw tha, lawm a um hle.


[DT 5/6]