Editorial

                        Zuopa/Pahai Ni (Father’s Day)

            Vawisun hi Pahai Ni (Father’s Day) ani ti chuh ei thupuia inthawk khin ei zuk hriet thei seng ring a um. A lo hrefu tawk ei um khawma Delhi lai a cheng a tam lem chun ei lo hrietfuk naw khawm ani thei. Khawvel hmun tin ram tin a Pa chan changhai chawimawi a an umna ni, Pahai puola ni inser a um hlak a nih. Pa le Naupa huna inthawka lo inser tan ani chuh ring a um nawh. Ei Bible khawm a hieng anga Pahai

puola ni sersuon an hmang a hril awm khawm hriet ding a um lem nawh. Amiruokchu, khawvel hmun hrang hrang, abikin Kristien lai hin, hun sawt taka inthawk ta khan inser a lo ni tah ti ruok chu a hretu vawng ei nih. Ei khuo le vengah hai chu hieng ang ni bik insera umhai chu ei lak ursun ve em em a, India Hmarsak a Hmar Kohranhai khawma ei lo inser ve hlak anih.

            Hmar Christian Fellowship Delhi le metro-cities dang danga Hmar Fellowship a inlawiluthai ruok hi chu ieng lei am ani ding; a hrana Pahai puola program siem khawm ei la um naw ni awm tak a nih. Delhi a ngei khawm ei inser ngai naw a nih. Asan ding awm tak a inlang chu inkhawmna hun ei nei tlawm hi a nih. Chawlkar khatah Pathienni chawhnung inkhawm darkar hni ei nei hlak chau hi a ruolpuia Pathien chawibiek Inkhawmna hun ei nei chu a nel a. Thla khatah Sunde Skul vawihni ei hmang bakah thla khat danah Thalai Sunday vawikhat ei hmang hlak bawk a nih.

            Hi lei hin ni sersuonhai po po ah program hran ei siem ve pei ding a ni chun ei Sunde Skul inchuklai khawm sunchangzawl ang el in inding laih laih a ta; tukuma ei inchuklai mek Exodus suo khawm huphur um hle mei a tih. Children’s Day, Thalai Day, Mother’s Day, Father’s Day le ieng Day Day am a nih. Tam tham ve tak chu a nih.

            Hieng a ni lai zing hin, mipui dit dan ei thlir chun hieng ang ni bikah hai hin chuh program khawm ei ni hmang le inzul a special deu met a siem thei nisien ti chuh ei nuom dan tlangpui ni’n a’nlang. Chawlkar thum vel liem ta lai el khan Mother’s Day khawm a lo liem ta a. Kha ni a ei chawibiek inkhawm kalhmang kha ei nuom dan chieng taka suklangtu a nih. Kha ni khan Program Vawngtu le Sharing neituha’n nuhai thlur bikin Bible chang an hung tiem lang a, Thuhriltu khawma chu tieng thlur bawk chun srmon a hung thur dawk ve nawk bawk a nih. A hming tak chun Mother’s Day tia a hranpa a program ei siem khawm a ni chuong naw laizingin ei lungril takah Mother’s Day hmangin ei hmang tho tho a nih.

            Chu ang pei chun ni bik dang dang a hung tlung pha ei lungril a hip hlak ni’n a’nlang. Hieng ni bikhai chau hi ei inchawimawina a nih tina ni lo in, a lang ram a khawm ei in chawimawituo hi ringtuhai thaw ding hrim khawm a ni a. Thalai Day ah thalaihai hlutna le mawphurna dam, Mother’s Day ah nuhai le a dang dang an ni dungzuia thlur bik peiin inkhawmna hun ei hmang chun ei kohran khawm a thathnempui sawt hle’ng ei tih ti chu ringhla a um nawh.

            Ei thuoituhai khawm a hma hung la in program bikhai khawm ei la hung hmang ve ngei ei beisei a nih. Tu el hin ei la hmang ve thei naw a ni khawm a Pathien zara Biek-In dam ei hung nei ve a, inkhawmna hun ei hung nei rawn thei pha lem chu la hmang ve ngei ei tih. Vawisun Pahai Ni, Father’s Day ti a khawvelin an inser hunah hin Pahai po po ditsakna chibai ei inhlan thar a. Insung, Kohran le Khawtlang a an ropuina, hlutna le mawphurnahai ngainep lo a Krista Isu sipai tha tak an hung ni pei theina dingin Pahai po po Pathienin a thar takin malsawmna leh thuoi thar mawl raw se.


[DT 19/6]