TU AM KA NA???

-Sunga F.Kholum

Ka sweet heart Seraph damnawna leiin office date 18^th July kai thei lovin ka um a. A lum bawk le fan hrat takin kan virtir a, TV ka zuk on le God channel a Mrs. Joyce Meyer thuhril ka zuk ngaithlak a.

A sermon Mosie’n Isarelhai dan sawm a pek lai a pakhat, “ I venghai thil inhnar naw rawh” ti thupuia a hmang chu ka lungril a lak hlawk el a thil ramtin a min ngaituo tir a. Chutaka mi le ka lungril a kan vawi em em ramtin in hriet nuom tak in tiin ka hung ziek a nih.

Eini mihriemhai (eini Hmar) mizie makzie a min suitir a, ramtin ka ngaituo lai chun, mi thil inhnar hi SUOL lientak tak laia pakhat a lo ni zie a min ngaituo tir bawk a. Mani chanah lungawina nei neka mi nei ang ang nei tumna lungril hi a chin a lienin ei dam sung popoah ei ngaituo pakhat chu a nih. Mi nei ang ang nei nuomna, a tha tam a tha naw tam, a tul tam a tul naw tam, an hme tam an hme naw tam ngaituo lova mi nei ang ang nei tumna lungril hi ei khawtlang, korhanin ei sietpui pakhat chu a nih. A pasie, a hausa, a chin a lienin damsunga ei thil tum tak chu a lo ni hrim hrim a nih. Hi inruoksiekna hi ei Pathien le ei Bible chun a theida chu a lo ni zing el.

Khawhringin mi a se ti ei hriet chun, inhnarna lei, Rukruin thil an ruk a ni chun, a mamaw sukbitna ding an naw leh mi nei ang ang nei theina dinga an ruk chu a ni hrim hrim a, Sumdawngtu chun sum a dawng chun a thil tum chu....ei hriet sa ka ring..chu chu, A HLAWK( Profit) a nih. Chu bak chu nilo khom a tam hril seng naw mei nih..

A pahnina ding ah, tulai a ka lungril taka ka i buoipui chu, Ei Pathien biek dan hi a nih. Ringnawtuhai hieng, Hindu, Muslim, Buddist etc. pathientak ni lo betuhai hmana an pathien biekna Temple inza em em in pheikhawk, sleeperhai chen an hlip chun, eini Pathien hring betu inti haiin iem ei thaw ding a na mani seng hangin ngaituo ei tieu khai...I hringnunah Lalpa a lawm am leh..!!!

Chu ti tak lova, khaini, Kuva, Dilbag le chi dang dang fa lutin eiin khom el hai dam hi ingaituo hlak diem..ei Pathien ei ibiekpa hi ei nuom dan dan a ei palzut chu a ni deutak naw maw!!! Ei Lalpa’n iengtinam mi ngai a ti aw!!! pangzatum deu a nih. Chu bak chu ni lovin, mi tam takin inkhom hun hi sumdawngna chance a hmangtu ei ni nawk nghal a, ka thil nei mihaiin hre naw pal an tih ti a in showna ah hmang dam eini tawl bawk. Pawisa hi ei va hang invet chil lawm lawm, hnam danghai nekin sum hi ei dit hrim hrim ti thei dingin a um thlat.Mi hausa ei huor bawk. Tu theida lo dingin, Khotlang le Kohran ramah khom ni sien mi a che thei met an ni chun, a Pathien thu theinghil in atlin tam a tlin naw tam Upa dam,thuoitu damah thlang pawp ngam mihriem ei nih.Inkhomah ei fekhomin Lungril taka ei ibiek Pathien inzana dam hang nei met bek inla a va tha awm de aw! eiin khawmhai khom hi umzie bovin ei inkhawm ei inkhawm ei chu a nih.

Abikin hang ting ei tih, eini DHCF a hin lungril taka, Pathien ngaina neia, ama bovin iengkhom thawthei lovah ingaina le inngaitlawm taka betu iengzatam um ei ti aw!!!!

A pathumna a dingin: Ka nun hi ka sut ka sut a achang chu zinga thi el thei dingin ingaina chang ka nei hlaka, mi tu el khom anaupang taka inthawa aupatak chenin ei ngaithu dinga ka I dit chu, thina hi, damnawna lei chova thiding chova ingaina dam, an nawleh upat pha le chawah thi dinga ingaina lungril innei ka ring. Amiruokchu ei hringna hi a derdep zie dam, zan kar a thi el thei, an nawleh, lungphu chawl a thi el thei, natna kher kher ni lo a thitup thei eini ti eiin ngaituo hlak am aw! ei hun neihai te hi a va hlu lawm lawm de aw ka ti hlak. Inti va hlak am???? Suolna an sang pei a ei lungril a ngar deu deu a, piengtharna thatak nei lo chu Pathien kuom tlung thei lo ti khom hi mi tiin ei hriet seng de khomin, ei ngaituo nuom naw hrim hrim nahai ka ngaituo chang chu mi lungsietumtak chu ei va ni de aw....!!!!

Hi ka hung ziekna san hi,mi PERSONAL taka mimal ka kawkna ah ngai pawl in lo um el theia, a dawnna chu, “ A ni der nawh” a miruokchu, a lovin man pal in um chun sim unla I damna ni nghal bawk a tih. Tuta ei hringnun hmang dan hangin en seng thei inla chu ei Pathien ei ibiekpa hin a va lawm ding de aw hun nuhnungah um ei nita bawk si a.