26th Freshers’ Social Meet (2011) Report

            Hmar Students’ Association, Delhi Joint Headquarters in hun sawt taka inthawka a lo buoipui ta ‘26^th Freshers’ Social Meet 2011’ chuh August 20, 2011 (Inrinni) khan Community Center, Sector-4, RK Puram ah hlawtling taka hmang zo a lo ni tah.

Inkhawmna hall sip a thungna rem ni sienkhawm mipui fekhawm an tam leiin a ruok hmu ding a um nawh. A hung hai reng reng chu insir hmel put reng an um naw a. Inhawi an ti in an hlim tlang hle. A hung thang ve naw hai kha chu in chan ropui hle a nih.

            Programme hi session pahni a the a ni a. First Session hi sun dar 12 a tan ding ti ni sienkhawm mipui tieng pangin hun ei vawng indik zo naw leiin a hun takah tan thei lo in ei um rek a. Thuoituhai le hun hmasa tieng a hun bik changtu ding hai an kim thap hnung khawma hun iemani chen chu ei in nghak veng veng a. Tv. James Milienropui Khawbung le Nk. Esther Lalsanhim haiin hnesaw mangkhengin programme chu an hung vawng ta a. Hla hmasa in “Aw Kan Hmar Ram” sak ruol a ni zo in Rev. J.Thanglur in hun hawng tawngtaina a nei a. Hi zo hin Tv. James Pusing Sanate, President, HSA, Delhi Joint Headquarters a inthawk lawmlutna thucha tawite ngaithlak a ni nawk a. Karlakah ei hlasakthien ha’n hla mawi tak tak a mi’n awi zingin Mahipalpur hai ‘Fahrel Tawk Lam’ mawi tak el chun a hung zui nawk ta pei a. An thiem a, mipui mit a tlai hle.

            Tv. Joseph Pakhuongte’n “Hnam Pasaltha” thiem taka a sak chu thuoitu tieng a inthawk request a tam leiin ko nawn a ni a. Na a tlai hle. Ngun taka lo ngaithla hai lem chu an hmulthi inding sung sung ngei dingin ring a um hiel. Ei ni hmang le inzawma pawimaw tak el, ‘Introduction of Freshers’ chu Tv. William Darngon le Nk. Chingbawi Buhril ha’n zei takin an hung nei a. Hi taka hin freshers sawmli chuong inhmelhrietpuina nei a nih. An felin an bengvar tawl hle. Hi zo hin mi tam tak nghakhla em em Nk. Mary Jones Music Video Album ‘Lenkawl a Var Nawk Tah’ ti chu Pu C.Thant Khobung, Chairman, Delhi Hmar Welfare Association, in “rimawi tieng a ei hnam sukmawitu le lungleng le zun purdo hai hnemtu ni ngei dingin” a tlangzar ta a. Album siemtu’n hla mawi takin mipui a zuk inawi zui nghal bawk a. A muk hle.

            Pi Judith Hmar, Adviser, HSA Delhi Jt. Hqrs., in infuina thucha a hrilna a chun hun hmang thiem a pawimaw zie, ei khawtlang el ni lo a hnam dang dang hai lai a inzel (interaction) a pawimaw zie le ei tawng chau ni lo a English le Hindi hai khawm thiem a pawimaw zie hai thiem takin a hung hril a. Chun, inchuklai le sin zawng mek ding hai hin ‘back-up plan’ nei a pawimaw zie khawm a hril lang bawk. Mani dit zawng le inhnikna zawng ei hnawt zing lai khawmin hmathlir suk zau a, sawrkar le private company a hai khawm mit inlen zing a tumru le takinning taka thaw a pawimaw zie hai a hril. A thuhril hai mani hringnuna a taka zawmtu hai chu an hlawsam ring a um nawh.

            Upa Dr. Lalsiemlien Pulamte, Chairman, Hmar Christian Fellowship Delhi, in fresher-hai tading bika tawngtaina hun a hmang a. Hi zo hin Nk. Dorothy Lalneizo, Secretary Education, HSA Delhi Jt. Hqrs., in Meritorious Award inhlanna hun a hung hmang zui nawk a. Hi lawmman hi inchukna tieng a thaw tha bik zuol mi sawmpahni hai kuomah inhlan a ni a; Dr. John Pulamte, President, HSA General Headquarters, in certificate le citation hai inhlanna a nei. Hi ni a lawmman hung la ve thei lo mi pathum vel an um bawk a nih. Award inhlanna nei a ni zo hin Nk. Thlirnawnmawi Puruolte, General Secretary, HSA Delhi Jt. Hqrs., in HSA Delhi Office Bearer hai mipui le inhmelhriet tirna hun a hmang nawk bawk.

            Nk. Jessica Joute’n Fresher-hai aiaw a thuhrilna a nei zo in Delhi Hmar Welfare Association Chairman a inthawk thuhril tawi ngaithlak a ni nawk a. Chubaka chun Nk. May Rose a inthawk ei hnam puon le thuomhai hi chawisang a pawimaw zie le eini ngeiin chawisang nachang ei hriet naw chun mi dangin ta nei a neia an mi la lak pek ding zie ngaithlak a ni nawk bawk. A thuhril hai kha a pawimaw takzet. Khawpui le khawte, hmun tina cheng Hmar nauhai hin ei hnam nunphung le zierang hai po po hi a tha zawng a ei chawisang a pawimaw hle. Ieng chen am khawvel in an mi hriet ding ti chu tukhawma ei hril thei nawh. Thangthar, nang le kei a liengko a innghat lieu lieu a ni tah. Zingah, a’nhnuk hnunga ei insir nawna dingin vawisun hin ei thanghar a tul ta takzet a nih.

            Hi zo hin kum 2011-2013 sung HSA Delhi Jt. Hqrs. thuoitu ding a ei thlang thar hai puonglangna hun ei Election Commission Pu Hrangthangvung le Pu Darsuothang hai in an hung nei a. Thuoitu thlang tlinga um hai chu a hnuoi a ang hi an nih:-

President                  : Tv. James Pusing Sanate

Vice-President         : Tv. E.Ramngailien Lungtau

Gen. Secretary         : Tv. Zacharia Varte

Asst. Gen. Secretary           : Tv. William R Darngon

Office Bearers          : Tv. Ch. Phlegon

                                      Tv. Stephen L Ruolngul

                                      Nk. Dorothy Lalneizo

  Nk. Esther L Hmar

  Nk. Esther Lalsanhim

  Nk. Thlirnawnmawi Puruolte

Thuoitu thar hai Intiemkamna (Oathtaking) chu Pastor Lalsiesang in a hung conduct a. An ta ding a tawngtaipekna hun khawm a hung hmang nghal bawk. Hi hun hi ruoi inhlanna in a zui a, Evan. Vanlaltlan in fak le dawn ding hai Pathien kuoma a’nhlan hnung in ruoithe a nih. Ei tucha hai an sawl bawk a an suong inhnik hem hem hle. Mipui an hrai hne hle a. Ruoithe zo hin chu khawp taluo a inthung cheng el pawl khawm hmu ding an um nuk el. Tucha hai lawm an um takzet.

            Phinghmul inkhat rak khawp a ruoi kil tlang a ni zo hin chawm khat chawl a ni a. Hun hnina (Second Session) chu zan dar 7:00 a tan a ni nawk ta a. Tv. Nehemia D.Ruolngul le Nk. Varthienghlim Changsan haiin an mi thuoi ve thung ta a. An zei char char hle. Mipui an sukphur hne leiin tukhawm nghawk hmel put hrim hrim hmu ding an um naw a ni tak. Hun hmasa tieng Dr. John Pulamte, President, HSA General Hqrs., in thuhrilna hun a hmang a. Hi zo hin Rev. B.Thangluoi Memorial Trophy a hrattak nina changtu Hmarhleng FC (Mahipalpur, RK Puram & Gurgaon) hai kuomah Pastor Lalsiesang in trophy le Prize Money inhlanna a nei bawk a. Programme a suk bukim hle.

            Mipuiin ei nghakhla em em el, ei khawtlang puipung nikhuo a mi sukhlimtu le ei programme hai sukhlawtling rawp hlaktu pakhat, talent dangdai tak nei ATM Group hai chun stage an hung hluo nawk ta a. ‘Tuoni Le Neilal Remix’ ti thupui a hmangin drama mawi tak el an hung thursuok nawk ta a leh. A changtuhai an zei a, script simple deu angreng si in mipui an sukhlim a, mit a tlai hle. Kha hma met khan Hmar movie hmu ding a um zeu zeu a chu theatrical play chu ei la hmu ngai meu nawh. Anni hi Hmar nauhai lai chu hi kawnga hin sulsutu pawimaw tak an nih. HCFD Thalai Conference a Drama/Skit Competition ei neina a inthawka hung ra suok pei a ni a. Lawm a um takzet. Hma tieng pei a khawm Delhi sung el chau ni lo a ei hnam sukmawitu an hung ni pei ei beisei.

            Hi zo hin Mr. Fresher 2011 le Miss Fresher 2011 hai thlangna nei a ni a. Contestant thlangsuok bik paruk hai chu zawna chi hrang hrang indawn an ni a. An reng hin hi title hi an phu hlie hlie ni’n anlang. An felin an zei tawl a, suong an um tawl tham tham hle. Amiruokchu, thlang bik an um a tul si leiin anni lai a inthawkin Tv. Lalmalsawm Joute chu Mr. Fresher 2011 dinga thlang a ni a. Chuong ang bawk in Nk. Lily Lalnunmawi chu Miss Fresher 2011 a thlang in a um bawk a nih. Hi hun hi ‘Hla Ruoi’ in a zui ta nghal a. Nk. Chonthakim, Nk. Mary Jones, Nk. Roslyn Lalumpui, Nk. Ruth Ruoltinsing, Nk. Zaithankungi, Pu Vanlalmuon Joute, Tv. James Vanlallur, Tv. Joseph Pakhuongte le Tv. Lalngailien Joute hai a inthawk hla mawi le run tak tak el ngaithlak a nih. Mipui, naupang, a tar a zur in an hlim tlang hle.

            Tv. Lalremlien Neitham, Vice-President, HSA Delhi Jt. Hqrs., in lawmthu hrilna hun a hmang zo in Tv. Jessai L.Shakum, Chairman, Department of Music & Youth Affairs, HCFD, in tawngtaina’n HSA Freshers’ Social Meet 2011 chu a lo khar ta a nih. Dit khawp a um naw hle a chuh zankhuo’n sunzawm inla khawm a dit khawp naw pawl chu ei la um tho awm si leiin kum thar a ding nghakhla tak pumin tukum a ei Freshers’ Meet chu ei lo inthla liem ta a nih. Thu tha hla tha ei ngaithlak le hmu hai po po kha ei lungril a vawng seng ei ta, ei rengin-abikin Fresher hai-ei hnam chawisangtu le sukhmingthatu ni tum seng ei tiu. A tawp takah chun, inchukna sunzawm ding le sinthaw dinga Delhi a hung thar hai po po kha mani mawphurna le hung san theinghil lo a hlawtlingna insang lem chang ngei dinga ei hringnun fimkhur taka khal dingin ei in fiel thar a. Hlawtling ngei dingin ditsakna ei inhlan bawk a nih.