By: Thangliensang-pa
Kan chengna quarter bulah, mi lo anga lien le hril khawp ni naw sienkhawm, vawi khat, vawihni hme dam a lo umpal chun tiin, behna bul hni, bul thum vel tuna dingin, upa trawng takin nupui buonbil tiet khawm nilo ding huon kan siem ve bawka, nasatakin kan buoipuia,
tak chang ngei kan nuom leiin tha kan seng ve trei. A bikin kan umna lai hi a pil a thrat tawk naw leiin pil hi hmun danga mi kan thak lut ngat ana, ringnekin a chin e ti lo chun tha a lut ve hle. Zing le zanin tuia chap hu dapin ka cho let hlak. A thlai chi tlak tak or tlai tu tak hi chu apa-naw tlak deu ka ti leiin, patakin nuhmei chana ka ruota, mi haiin a thaibawi an mi ti ding khawm veng loin a nuom nuom tu raw seh tiin, nuhmei chan a ka sie tawp el anih. Chuonga tlai tuna theia kan hang siem zo thawkkhat chun,Thangliensang-nu chun ni danga thuneina nei ngailo ang elin, a thuneina chu hmangin tlai chi tlak a tran taa leh, tlai chi a tlak zo chun tui bur chu ka mawphurna an leiin thrahnem-ngaitakin zing le zanin tui ka bur hlak. Ieng tlai chi am a tu ti ruok chu ka hriet nawh, hriet ka nuoma chuh kan dawn ngamnaw el baka, pa taka nuhmei mawphurnaa ka pek an leiin, mi mawphurna pek chun, ring zo taka pek ding ti hih, mi hai ti danin ka principle ani ve leiin, kan dawn naw anih. Ka mawphurna tui pek, thrahnem ngaitaka ka hang thaw chun, hun sawt-nawte chun tlai hai chu a hung kak tran taa leh, in neinu chun behna bul hni, bul thum bak tung a tim tia ngaimuong taka ka lo ring chuh ehh, nupui buonbil tiet khawm tlinglo huon chuh International huon an chang der, ieng tlai chi tak am a na a tutak khawm hrietthiem an taka, behna huon dinga ka beisei chu vaimim huon a ang tak el ta a, a mawng nuom dan hlak chu a raptlak el, Isun mipui sang nga a vai dinga bei phek pa-nga le nga-te pathum a suk pung anga, kannu tlai chi hi a mi suk puk pek ve el am mani ta ding maw ka ti hiel a nih. Tu hrietpui loa, makhat chaua tlai chi a lo tlak po po a hung kak vawng phing chun, kan huon siem chu ieng huon tak am a na ti chuh, kei chau niloin mi dang chen khawm an buoi tawl hle ka ring. Mi tin, ei hringnun hi huon ang ana, Ka ruolnu (Thangliensang-nu) thlai chi a thlak ang hin, mi tinin nitin hin tlai chi ei tlak tawl senga. Bible’n “Mi tinin a tu ang char an sik hlak” Gal,6:7.a ti ang hin, nitina manikhata ei tu or ei tlak hai hi, ei tlai chi tlak tak hi min mi hmupui naw hai sien khawm, nikhat chu ei tu ang ang a la hung kak ding ana, chupha chun ieng ang chi am ei tu ti chu mitin hriet la hung ning a thih. Mihriem hi ei makna pakhat chu ei tulo, sik ei beisei hlak chu tie, Pathien zarin hi ei ni rawi khawm tlai chi tlak dingin Khawpui ei pan a, ieng ang tlai chi am ei tlak ti chuh, kum sawt nawte hnunga a la hung inlang ding anih. Ei nunghak ei tlangval, thralai hun laia tlai chi ei thlak hai hi ei nuom ei nuom naw thu niloin ei la sik ding a nih. Khawvel hi mak ve deu anih, thil pek hrat deu hai chuh, a pe let ve tu ding an tlasam ngai nawh, mi rel hmang hai chuh, an chanchin min an rel ve hlak an tih chuh, mi dem hrat deu hai hi min an dem ve hlak, mo, tarpi tarpu inza lo hai hi an hung tar ve pha an ni khawm an mo haiin an inza ve ngai nawh, tarpi tarpu inza hlak, mo hai hi an hung tarpha an mo haiin an inza ve hlak an ti chuh. Pasal khawm mani tarpi tarpu chunga suol hai chun makpa suol deu an nei nuom hlak an ti hlak. Thralai huna mani nu le pa inza loa, nu le pa hlem hlaktu hai hi, ni khat chuh an nau haiin an thaw ang charin an hung hlem ve hlak an tih chuh. Mi tinin ei tu ang char ei sik hlak ti thutak hi hre vawng ni inla chuh, ei hringnun khal dan hai hi indang vieu a tih. Inchukna tieng panga khawm, student hun laia thlai chi thlak thra chun, a thlai chi thlak la sik a tih. Sin a vang tah ti trawngkam hi ei thabona inbikna ang deua ei nei ni ta sien a hawi, amiruok chuh, tak inning taka lekha tiemtu hai chun sin an thaw senglo an hmu ve thung sih. Hienglai zingin, ka ruolnu (Thangliensang-nu) huon chikte chaua tlai chi a tlak treu ang hin, ei ni khawm, ei tu tum le ei thil tum tak khawm hriet theilo khawmin ei hmu hmu ei lo tu khawm a ni el thei anih. Naupangte ka ni lai chun: Futball pet ka en pha futball pet thiem ka nuoma, Kungfu film ka en pha kungfu thiem ka nuoma, Hlasak thiem hai hlasak ka ngai pha hlasak thiem ka nuom bawk , Politician hai ka hmu pha politician ni ka tuma, ka buoi thei hle. Mi pakhat chau, tum hau taluo hi ei ni chau niloin a mi entu hai khawm an lo buoi nuom vieu. Ringnekin tum ei hau taluo hi mi an buoi chau niloin ei hlawtlingna dinga mi daltu a ni nuom vieu ti hi hriet a thra. Student chu student deua um ding, Bible inchuk chu Bible inchuk a ni na kha a thei nghil ding an nawh, nunghak chun a nunghak nina kha a theinghil ding an nawh. Chuong ang bawkin tlangval khawm tlangval ani na a thei nghil ding an nawh. Nupui papui chun an ni na an theinghila pha, insung chau buoi loin, tlirtu khuo le veng mit khawm a kham nuom.
Inchukna le fak le dawn zawngna chau niloin, ei Kristien hringnun khal dan khawm hi ngaituo tham a um a nih. Laiking (lizard) angin zie hran hran ei nei nuom vieu, biek-ina hak ding zie dang ei neia, ei sinthawna hmuna zie dang, in sunga ziedang hakin. Zie nei rawn rawn chuh mi changkang ah ei ruota, zie ei hau ang bawkin ngaizawng pahni pathum nei kawp chu ienga ei ngai nawa, chu nekin vawikhata ngaizawng pahni pathum nei thei chu lucknaa ei ngai deu deu. Ringtu hai hi zie khat chau nei dinga piengthar ei ni sia, ei mizie chu hrillo, grape huona chen khawm tlai chihni ching kawp lo ding Pathienin a la ti deu deu, “In grep huona thil pahni chingpawl naw ro....Deu,22:9”. Ei ni rawi chuh, zie nei rawn rawn hi a tulai mi ei tia. Pastor or rawngbawltu khawm Pathienthu chau hril hlak chu a tulai ta nawh ei ti nuom deu a hawi tah. A tulai-mi le, a tulai mi-naw ei inkhi-na hi zie nei rawn le rawnnaw nisienkhawm, ringtu thra le ringtu thralo ei inkhi na ruok hi chu a dang anih. Chik-taka, ei nun min an mi bi chieng pha hin, a mi tlirtu hai hin ei nun hih hrietthiem harsa tin an lo buoi vieu el thei anih. Pastor le rawngbawl dinga in pe hai khawm ei nuhmei ei nau haiin ei ni na hi an mi hriet chieng chie dim? An nawh leh ei nun a hin ei nuhmei le nau hai a la buoi el chun. Kum khat khan camp kan neia, mi pakhatin fiem thu ti takin, “Seminarya Hmar students hai in hung piengthar vawng tam?” tin a min dawn a, dawn ngaina ka hriet nawh, Bible inchuk khawm ei piengthar le piengthar nawh mi an la buoi a ni awm hi tiin, ngaituona a suksei hle. Thangliensang-nu tlai chi tlak ang hin tlak ve nawng ei tiu, ei hringnun huona hai hin chi tamtak tu loin, ra ngei ding le par ngei dingin chi thra tu tum seng ei tiu. Ei hringnun hlutak hi tulai mi ni tum leia ramtin ei tu hin, ei ni chau buoi loin a mi entu le a mi siemtu Pathien chen a buoi pha hlak, hlawtlingna lampui midal tu khawm a nih ti hriet a thra.
Dated: UBS. MQ No:253.
4-August-2009.
No comments:
Post a Comment