Lawrkhawm

@@ 11 August, 2011 sun dar 12:30 vel khan Pu Phillip D.Faiheng, S/o Pu Darhmangpui (Nehru Marg, Rengkai) chu Munirka, New Delhi ah fam a lo chang tah. Hi zan la la hin Pu Timothy Shakum In, 8-J, CPWD Colony, Vasant Vihar ah DHWA le HCFD chun ralna programme an hmang a,
nunghak le tlangval in an khawvar pui. August 12 khan Christian Cemetry, Samsan Ghat, Sector-24, Dwarka ah a ruong hi vui liem a lo ni ta bawk a nih. Lusun tuortuhai po po ei tuor pui takzet a nih.

@@ August 12, 2011 zan khan Department of Music & Youth Affairs (DOMYA), HCFD inkhawmna ah Wales rama rawngbawl dinga fe tum, Delhi hmuna la cham mek, ei unauhai chun rawngbawlna an hung nei. Hi programme a hin Nk. May Rose Ralsun, Deputy Manager, NEREFS chun Pathien thu hrilna hun a hmang. Pathien thlarau malsawmna dawngin hi inkhawma thang hai chu an hlim tlang hle. Rawngbawlna tluong taka an nei pei thiena dingin ditsakna ei inhlan nghal a nih.

@@ August 13, 2011 khan 2^nd Rev. B.Thangluoi Memorial Trophy chu Kathuria Public School Playground, Vasant Kunj ah inkhel nawk a ni a. Mipui pungkhawm an thahnem hle. Inkhel hmasa ah Kherseu chun 2-0 in Vangsip hai an hneban a, 2^nd Runners Up nina an chang. Inkhel nuhnung chu Final a ni a, Hmarhleng chun 4-0 a Invawng hnebanin hrattak nina an lo chang ta bawk a nih. Inkhel hai hmu nuom a um thei hle a, thlirtu mipui khawm an mit a tlai in an lo thang nasa hle. August 20 a HSA Freshers’ Social Meet nei hunah lawmman semna chu hmang ning a tih.

@@ HCFD local Pastor le Thalai Pawl hmalakna hnuoiah vawizan inkhawm tin hin BSSC Chapel, K-14/14, Mahipalpur ah Pathienthu le hla a inpawlkhawmna programme hmang ning a ta; zanbu khawm kil tlang nghal ning a tih. Hi huna thang ding hin Nu le Pa, Thalai, Naupang, mi tu el khawm fiel ei nih. Ei kohran, ei ram le hnam le khawtlanga ei hun tawng le pal mek hai thlurin sharing hai nei ning a ta, Pathien hmabula inhlan tharna nei ni bawk a tih. A tu tu khawm lawmlut vawng ei nih. Thawtanni khi Independence Day chawl a ni bawk leiin chu chu hmang tangkaiin ei rengin thang tum seng ei tiu.

@@ Hung tlung sing August 20, Inrinni khin 26^th HSA Freshers’ Social Meet chu Community Center, Sector-4, RK Puram, New Delhi hmunah hmang ning a tih. Hi hunah hin kum 2011-13 sunga HSA Jt. Hqrs., Delhi thuoitu dinghai thlangna khawm um a tih. Chun, ei hlasakthiem suongvawr Nk. Mary Jones a Music Video Album Vol-II, ‘Lenkawl A Var Nawk Tah’ ti chu Pu C.Thant Khobung, Chairman, DHWA in tlangzar nghal a tih. Programme kimchang lem le mawphurna insem dan hai chu phek 17-na ah hmu thei a nih.

DT-14-Aug-2011