Zangkhaw Bungbu (Suo-III)

 L KEIVOM 

Thangsang chun, “ I lungril chu ka hriet thiem khop el. Chu lungril chu nei zingin nuhmei khom ka zong a ni hrim a. Ei naupa chu hung ngaituo naw rawh, hmangaina leh enkol zing dingin kan tiem” a ta. 
Nuhmei a nei phaa a zawm thei vong lem chu Hmingin ring naw sienkhom a lungril a hadam huoi a. Zan a lo sawt ta leiin Thangsanghai khom chu an trin tah a.

A zinga chun a naupan a nêl theina ding tiin Thangsang chun a va zawr a, anachu a naupa chun a lan zak leiin a nu puonbil hliea    inbiin a pa chu a mel rûk kûk a. A nêl theina ding tiiin ,” Bawia, hung rawh, saikalte le futbawl kan chawk pek ding che a nih, ka pom i nuom phot chun,” a hei ti chun RTT chu a hlim hle el a, a pa chu a va hnai hrut hrut a, a pom thei tah a. “ Zingah i nu rawiin Lamka bazarah feng ei ta, i dit dit ei in chawk ding a nih. Iem i dit, hang hril ta ?” tiin an don a. ” Saikalte, bawlbawl, mutpuom” tin an sam khawm a. A pa chun, “ I va tlangval va de aw, a dang teh dit i nei naw maw ?” a hang ti nawk a. An ngai vung vung a, “ Pa, kapuok khom” a ti nul a. Chu chu Meiteinu kangpuok a tina a nih. ‘Pa’ tia a kona hmasa tak a ni leiin Thangsang chun a lawm êm êm el a, “Bawia, a dang khom inchawpek ka ti che, zakuo dam, pheikhok dam” a ta, RTT chu a hlim êm êm el a.

A zinga chun RTT chu a nu le pa’n Lamka Zenhang bazarah an lêngpui a. Lampuiah chun puok khawm nuom lovin an hma khalin a tlan a, an khattawkin a tlu phek nawk duoi hlak a. Lamka an tlung hma chun a sawl ta leiin a pa chun a puok a, hlim êm êmin a hla hriet sun chu in ring deuvin a sak vuol vuol a. An khaw nupui zing bazar fe hung kir tieng, lampuia an intuokpui hai chun, “ Raltlanthang, tum an leh a pawtu che kha ? ” tin an hang in dawn chun, “ Papa nih” a ta, an nui threk her hur el a. Lo innei ni hai sien an naupa hlim dingzie chu Hmingin a ngaituo a, a trap tak a suok a, Iengkim hlak an khêl zo ta si.

Lamka bazara chun RTT dit dit an inchawkpek a.  Saikalte ruok  chu an nei naw leiin an inchawk ta nawh a. An hung kir tieng chun lampuiah a thuom tharhai chu a hang hâk a, mawi an ti êm êm el a. Chu nia a hlimzie chu a damsung po pova hlimna a la hmu dinghai chun buk zo kher naw nih. In an tlung chun a putehai thuomhnaw  ding le kangpuok an inchawkhai chu thunei inti deuvin a sem a, an hlim tlang hle a. Hmingi pa chun a naunu le Thangsang, innei dinga an ti nawk hnunga thangtlawmna lei ringota a lo phal pek naw dam chu hril dok si lovin a lungrilin an sir rum rum a. Chuonga a dit dit an inchawk pek leiin RTT chun a pa chu a nêl ta hle a, an tlungna ina dam chen a thruoi thei tah a nih.

A zing nawk chun Hmingi pahaiin vokchal fun ruk zet an tupa  inthlana dingin inro der lovin an that a, a khawtlang po po chu ruoi kil dingin an fiel bok a. Fatuhai chun vok phing an mut mar a, RTT chu an pek a, a ruolhai leh an pet a an hlim hle a; ama inthlana dinga vok an that a nih ti a hriet si nawh. An vok dâr chu Thangsanghai an pek a, anni chu zanah thingpui inlum malamin nau thruoi man ding cheng sawmli an pek tlak a. A zingah RTT chu an thruoi ding a ni ta leiin iengkim an hril fel vong bok a.

RTT chu suna an inhnelna a sawl leiin a in bur bur a. Hmingi chun mitthli pumin a naupa phur ding puonhai chu a siem a, a beidongin a naupa inlai chu a hang fawp nawk hlol hlak a. Zan thranga chun RTT chu a mang a sie ni naw nim, inlau em  emin, “ Nu, nu,  nu, nu...” tiin a khek suok a. A nu beidong chun, “Bawi, iem an ta le!  Hi i kawlah ka um zing an nawm” ti pum chun a ruong chu a  tuoipek a. Damsunga a kuo nawk ta ngai naw ding hre lawk ang elin a nu chu a kuo tût tût a, a in nawk ta a. Hmingi chun a naupa chu a mang chen khomin thlaphangnan a bawm ti a hrietin an sum zo hlol naw a, inring takin a trap suok ta phong el a. Hmingi nu le pahai khom chu a in thei muol an um ve nawh a, zankhawvarin an tupa an ngai ding thu hrilin an titi a. Arte, a puiin a op lai, muin a hung lak a, inchiek lom loma a vuong hmangpui ang ela a nu angsunga inthoka RTT thruoi hmanga a um ni ding hriltu arhai chu an hung khuong ta îk îk a.

Thangsang le a pa fe dinga an insiem zo chun Hmingihai in tieng RTT thruoi dingin an fe phei a. A lawmna dingin a pihaiin artui an lo suongpek a, a hlim hle el a. Anachu a pahaiin an thruoihmang ding ti a putehaiin an hang hril chun a tri hle el a, a mit a âr-intra zâk el a. Chuonglaichun a pahai an hung tlung a, an hmel a hmu charin inbik tumin khum hnuoiah a lut a, sienkhom Pathien hmaa Jona  tlan hmang tum ang chau a ni si! A nun, “Bawi, hung suok rawh, in vet taluo, i pa leh Lamka bazarah saikalte inchaw dingin in fe ding a nih”, a hang ti chun a hung suok thrul thrul a.  A puhai hlak chu an rengin an hnuk a ulh leiin a trong thei muol khom an um si nawh.

Lamka bazara leng ding ni awm takin a nu chun a thuomhnaw thrain an cheitir a. An cheitir zo chun Hmingi’n Thangsang chu a ko bing a, “Hi ei naupa ta dinga ka thei tawka ka lo buotsai ve puon le a thuomhnaw dinghai chu a nih. Chawi inla. Ngotekher hi chu a tlangval  phaa dinga ka ngaituo a ni leiin sie thra bik inla, khawmuol a hriet thei pha ama kol dingin pe suok chau ro. Hun hma tieng hriet thei an naw leiin ka thawpek thei tawpna tak khom a ni el thei a nih,” tiin an naupa thil phur dinghai chu a pek a.

Iengkim an inhlân fel hnung le trongtraia an inthla fel hnung  chun inthok dok dingin RTT chu a pa’n hang puok a tum a, a nuom ta dêr dâl a. A nu puonbilah an tûl a, “ Nu, san lawh; nang hung naw chun nuom nawh,” a ti tlat el a.  A pi le puhai hlak insum zo  um lovin mitthli an huoi seng a. Hmingi chun mitthli tla pumin, “ A khai a buoithlak a ni hi, la thruoi naw phot el ro. Nakie tlawma a hung fel deu hnungah ama khom hung inenkol thei tâng a ta, chu pha chun thruoi lem de ti niu. Naupang invetlai ei tia chu khawsawt hre thei ve an ni leiin khawsawt leiin damnaw phana khomin hmang rawi a tih,” a ta. Thangsang pa chun thruoi ngei a tum tlat si leiin Hmingi beidong chun,“ Chuonga in ti hrâm an si chun iem hril ei ta, a va beidongum thlak ngei de maw! Thaw, Bawi, keiin puong ka che a, ei rêngin ei fe ding a nih ”a ta. Chu phing leh hlim surin a nu ruonga chun a kai a, an fepui ta a. A puhai chun an rengin an van thla a.

Kotsuo an tlung chun a nun, “ Bawi, ka lieng a kham ta êm el, i rik ta bok si a, i pan mi paw sawk raw se”, a ta. Kha hmaa Lamka bazara an fe ang bok kha a sawn leiin hlim suorin a pa ruonga chun a pakai a.  A pan a hang puok chau chun Hmingin,“ Thruoi in tum tlat si  a, a ngaina a um naw a ni hi, fepui el ro”, a ta, an tlanpui ta a. RTT chu trapa intlengin,  “ Nu, nu, san. Nu nuom nawh. Nu nu nu”, tiin a nu chu a ban lom lom a.  Tui tla, santu um lovin beidong taka chel ding zonga an mai vêl ang elin boruok chu a huot vêl a, an huot tâng zo si nawh! A nu’n trap rawlin,“ Bawi, damtakin, lan hmu nawk ngei ei tih”, tiin a hei hnêm a. Thangsanghai chun hnung ngha dêr lovin an fe hrat sauva, RTT-in ‘ Nu, nu’ a ti ri chu liem viet vietin kawn chu an liempui tah a nih. Mupui lâk arte, a puiin beidong taka boruoka inchiek lom loma a vuong hmangpui lai thlir angin Hmingi khomin a naupa trap lom loma an thruoi hmang chu a thlir liem ve tah a nih. Beidong takin in tieng an kir a, a lo ruok huou a, siksikrieu an hrâm a. A naupan thrangpui ngaia ban lom loma, ‘Nu, nu’ a ti ri chu ni tam le zan tam a naa chun an ri tawp thei nawh.

RTT chu trap zing le tha nei suna intleng zingin Lamka bazar chu an tlungpui tah a. A lawm zawng thilhai an inchawkpek hnung chun tlawmin a hlim ta deu a. Thil an inchawk zova an hang inthok nawk chun, “Pa, nu nu ngai.  Nu nu kuomah fe” tia ngenin a trap nawk tah a. Khawzawl nupui bazar kai, a trap ri hre phakhai chun an lunginsiet hle a, an thil zor mawt dam chu hung pein thlem tlai an tum a, a thla se zuol deu deu si. Thaw ngaina a hriet naw leiin Thangsang chun va thak kir nawk tak a nuom a, a pa chun a remti tlat si nawh.  Trap pumin an fepui pei a. Hriengkot tlang an liem tawm chun a pa’n,    “Bawi, saw va saw i nuhai khuo a ni saw, iengtik amanih chu ei la fe  nawk ding a nih”, a ta, a pa hril chu hre thiem ni awm takin a thlir vung vung a, an liempui tah a.