Tawngtaina

    -Lalsanhim Varte

“Mi fel tawngtaina chun thil nasatak a thaw hlak”

Jakob 5:17

            Thuhril le ziek ka thiemnawa, hlasak ka thiemnaw bawk; awmthu tha sâksuok ding ka haunaw bawk leiin tawngtaimi ni dingin ka lo inngai ve a, ring khawm ka ringa ka lo thaw ve hlak bawk. Harsatna ei tuok changa thlamuongum taka ka ngai chu tawngtaina hi anih. March 19, 2011 zana ka nuhmei Lalneihnem le tuoksiet/accident kan tuok khan Delhi mipui

nasatakin kan chawkbuoia, operation hun ah thisen hmang senglo rak ei tlawmngaihaia inthawkin kan dawnga, tawngtaina’n nasatakin san kan ni bawka. Lo sawt deu ta sien khawm damdawi inenkawlin kan la um zinga. Lawmthu hril nachang hrelo ang elin kan la to tawk tawka. A san chu mihai thatna le Pathien hmangaina inthukzie hi kan la hmu zawmpei lei ni tak atih. Ei Pathien le mihai ta dinga thangkaina bek bek khawm neilo hienga hmangaina le thatna mipui le Pathiena inthawk kan dawng el hi mak khawm kan tih. March 28, a vawihnina dinga ka ‘ditlai’ an operate ding khan lungngai takin natna khumah ka zal a. Kha nia phone ka dawng rawn tak chu ‘kan hung tawngtai pui zing cheu’ ti hi anih. North eastern states hieng – Manipur, Mizoram, Arunachal Pradesh, Assam, Meghalaya le hilai hmuna mipui tamtaka inthawin tawngtainaa an mi san thu ka hrietin, nasatakin ka thla a muong.  Liemtah thlasiklaia Pastor Siesang le kan inbieknaa ka hril ‘nang chu Pathien rawngbawltu, mi popo tawngtaipui inia’ tia thîk taka ka hril kha ka hriet suok rum rum. Tu ruok hin chu Pathiena hmangainaa inthawka ama ringtuhai tawngtaipui kan ni ve el chu ani ta hih.  Kan nu’n “doctor thiem an uma, Pathien zarin inenkawlna ding sum ala um bawka, sukdamtheitu Pathien cho a bak an tah” a ti chu ka lungrilin, a hriet indik ka ti hle. Kan chunga thatna insuotuhai popo, members - DHWA, HSA, HCFD, ruoltha le unauhai, tangka sum le tawngtainaa mi santuhai chungah lawmthu nasatakin kan hril. Ni 93 zet office ka chawl hnunga ka hei kai nawk ding chun, sin lo inkhawl rawn ta bawk ata tiin ka hawphur hle a. Kan nu’n tawngtaina in a min thlaa. Vai an suol ei ti hlakhai, kan hotu le ruolhai chun an mi hrietthiema, sin thawloin lo inthung mei mei rawh tiin ka sin inhmawhai chu thawin an min âwl el chu mak ka ti hle. Ka ngaituoin tawngtaina ra vawng niin ka la hriet rawp. Tawngtaina dawntu Pathien, nuom hun huna ko el thei ei nei hi ei vangnei chungchuong anih.

            Tawngtaina, tleirâwlhaiin fiemthawnaa an lo hril hlak hieng – tawngtai thabopa chun zaltawm tawngtai hi zieksa’n a bang ah a tara, a zaltawm chun ‘Aw Lalpa, khi’ ata a zuk khika a zal tawp hlak; kha pa bawk khan bu fâktawm tawngtaina ah ‘Aw Lalpa, a pangngai’ a ti tawp el hlak; tawngtai tâwipa chu ‘Aw Lal Men’ ata a zo der. Zaltawm tawngtaina khawm hi ei inhiknaw chang, lungril ah a lut raknaw chun zingtho tawngtaina hang hril dei el khawm hi thil umthei tak anih. tawntaina hih, khi a chunga ei tarlanghai ang mei meia thaw chi chu ninaw hlêng atih. Ei Pathien, tawngtaina dawntu hi, Pathien hring, inzaum, ringnawtuhai pathien anga mit cheng kura mi en el, mi dawn ngailo ani nawh. Ringtlak takmeu Pathien anizie hi ei theinghil ngai naw ka nuom.

{DT 3/7]