Editorial

Tawng

Ei chengna khawvelin hma a sawn hrat zie chu hril tam ngai lo a mita hmu a, a tak rama paltu vawng ei nih. Ei khawsak dan a’nthang po leh ei khawvel hin chin tieng a pan pei chu a. Inhma laia ni 5-6 lam dam kha tulaia ei darkar khat lam chau dam a hung ni tah. Hmasawnna tiengpanga hnufuol pawl taka ei ngai eini Hmar nauhai del ram ngei a chin sawt hle. Ei papui kum 40 chungtieng haiin ni thum lama an lo hmang hlak hai khawm nikhatin ei tlung zung zung ta a. Ralthuom hratna hmangin “A ru no no suokah”

thaw ei tum de a chuh piengzie khat, tobul thuhmun ei ni tawl leiin a ru no/ru chang bik ei um naw leiin a khema inmel ran ran pumin India Hmar-sakah intar laih laih a hnawbumin ei la um zing a. A pawhleu unau-ah ei insiem zo an tah.

            Chuong laizing chun khawvelin changkang tieng a pan pei a, a pan pei ding a nih. Chi le hnam khawm ei in pawl deu deu ang bawkin ei tawnghai khawm an pawl nasa deu deu pei a nih. Ei tulai khawvel chinchang thailanga hi Editorial Column chite chau sukbit ding khawma English thumal thang lo chun thil thei lo ang tluk a hung n’el chu an tah. A san chu ei hriet seng ring a um. Tulai khawvela ei thuom thil hmang a tam lem deu thaw hi ei tawngin ‘hming’ an nei ta naw lei a ni tak. Mithiem le thahnemngai thenkhatin a then a zar an lo siem sap a; khawpuia chenghai chun ei hmang tangkai hle. Ei ramah ruok chu zawr a fe naw hle thung a, a pawi takzet.

            Ei tawng hi damkhawsuok sienla ei ti a ni chun nitina ei hmang le hril thuom thil, Hmar tawnga ti dan bik ei la nei lo hai hi phuok/siem sap pei inla chu tha hle’ng a tih. Thai-hai khawma chu chu an thaw fuk leiin harsatna an nei nawh. Entirna’n: Internet, Computer, Web, Flyover, Sub-way, Exam, Basement, Mall, Bank Account, Working Shift le a dang dang. Tiem seng lo deu thaw a um a nih. Chuong hai po po chu ei hril ding zatin mi tawng ei haw a tul pei hlak. Khawvel changkangna hlaka a mi fen pei ding a ni si leiin hienga a fe pei chun ei tawng hi a hmangna a la tlawm deu deu ding a ni ti chu a chieng sa a nih. Chuleiin, ei tawng hi a damkhawsuok a, hmang a hlaw pei theina ding chun tawng/thil hming phuok/siem theitu ding, thuneina insang chaleitu ding Board/Organ ei nei ve chu thil tul; thaw makmaw a nih. Chu ei nei si naw chun ieng angin ka tawng ka hmangai, ka humhal ti la khawm a hmakhuo chu thimna a la ni tho tho a nih.

DT 10/7