Lawrkhawm

@@ Pathienni hmasak, July 10, zan khan Department of Music & Youth Affairs, HCFD chun meeting an nei nawk. Hi meeting a hin fund raise dan ding le thu pawimaw tak tak hril tlang a ni a.
Chuelkhelah, Munirka a ei Thalai Inkhawmna hi zan Dar 10 pel hnung chen chena inkhawm an mi remti pek ta naw leiin tuta hung tlung ding July 22 a inthawk chu Zan Dar 7:30 chara tan ta hlak dinga rel a nih.

@@ DHWA Adviser Pu L.Keivom chu tuta kar liem ta khan Aizawl, Mizoram tieng panin a lo inzin suok nawk tah. Then le ruoltha le lainatuha’n a piengchampha phak lawmna hun bik an buotsai pek ding le inzawma hang fe niin chanchin ei lo dawng a. Chawlkarkhat vel thang dinga insiem a nih. Hieng ang chen Lalpa’n a damlainihai a suksei pek hi DT chun a lawmpui takzet a, malsawmna tam tak le a hringkhuo sei pei dingin ditsakna vochuom ei inhlan nghal bawk a nih.

@@ Delhi tlangval, HSA Delhi thuoitu khawm lo ni hlak, Tv. Samuel L.Joute S/o Rev. Lalngailien Joute chun Air India ah First Officer Pilot sin a lo hmu tah. A hlaw ding khawm insit a um naw char char hle. Ei lawmpui takzet a nih.

@@ Ei member Nk. Rose-el Khojol chu 16 July khan a’nchukna ding Indian School of Mines (ISM), Dhanbad, Jarkhand panin Delhi a lo suoksan tah. Ama hi M.Sc(Geo Tech) inchuk ding a ni a, kum thum course ding a nih. Hlawtlingna insang lem hung chang zawm pei dingin ditsakna ei inhlan.

@@ HSA Delhi a Education Secretary ni lai mek Nk. Dorothy Lalneizo chu tulna dang dang leia hun iemani chen Tuithaphai tieng a hang suok hnungin tuta kar, 15 July khan a sangpa Tv. Joseph Lalmalsawm leh dam takin Delhi a lo hung chuongkai ve nawk tah.

@@ Ei nunghak, Nk. Joyce Zionkim le Nk. Mercy Tuolte, hai chu Indo-Tibetan Border Police hnuoia Staff Nurse Physical Efficiency Test nei dingin tuta kar liem khan Chandigarh tieng an lo liem phei tah. Hlawtlingna hung chang ngei dingin ditsakna ei inhlan mawl mawl a nih.

@@ Zani, 16 July khan Hmar Christian Fellowship Delhi Executive Meeting nei a nih. Hi thungkhawma hin Mainpuri, UP a ei Mission Field chungchang le Building le inzawma thu pawimaw tak tak hai hril le rel a ni thu ei lo dawng.

@@ Zani, 16 July khan Pu Hrangthangvung In, 535, Sector-3, RK Puram hmunah Hmar Students’ Association, Delhi Joint Headquarters Meeting nei a nih. Hung tlung ding 20 August khin Community Center, Sector-4, RK Puramah Freshers’ Social Meet nei ei tum kha Hall khawm ei sukfel tak leiin Programme hai induongin mawphurna hai khawm insiem a nih. Hi le inzawma thu chieng lem chu a phek___na ah hmu thei a nih.

@@ Zani, 16 July khan Department of Music & Youth Affairs, HCFD chun Pastor Lalditsak In, 256, Sector-1, RK Puram ah tukum Thalai Conference a Inruolsiekna ding Hlapawlpui inchukna an nei. Hi malam hin fund raise-na dingin Vawk-sung suongin an zawr nghal bawk. Amiruokchu, an order zat sa an hmu thei naw leiin anchaw nuom ve mi tam takin an chang ve naw thu ei lo dawng.

@@ Kar hmasak Pathienni, 10 July zan khan Delhi Hmar Welfare Association chun an Executive Member Pu (Tv.) James Pusing Sanate chu a pa’n hun lo taka a lo barol san takna thuah B-2/2127, Park View Apartment, Vasant Kunj, New Delhi ah sunpuina hun an hmang.

@@ Pu John Ruolngul hai sungkuo chu hun iemani chen Delhi a an cham hnungin 15 July, Friday khan an posting thar Hanoi, Vietnam tieng panin Delhi an lo hnusawn nawk tah.

@@ Ei Chandigarh Hmar Christian Fellowship haia inthawka fielna (informal) an dawng angin ei thalaihai chun Pathienni vawikhat hmang a inkhawmna hun va hmang pui dingin an inpuocha mek. Remchangnawna dang a um a ni ngawt naw chun hung tlung ding 23 July a inthawk suok ning a tih. Hi programme a ei thalaihai va’n rawitu dingin Upa Dr. Lalsiemlien Pulamte beisei a nih. A fe nuomhai le thu chieng lem ngaiven nuomtuhai chun ei Thalai Pawl Chairman Tv. Jessai L.Shakum (+919873852957) le Secretary Tv. William R.Darngon (+919811357049) hai contact thei ning an tih.

DT 17/7