Lawrkhawm

@@ Pi Hmingmawi Hrangchal a u Pu Nolien chu July 7, Ningani khan cancer natna leiin muol a mi lo liem san tah. Ama hi kum 74 mi niin a nuhmei la nauhai le Lungthulien khawsa an nih. Hi le inzawm hin July 7 zan la la khan DHWA le HCFD chun Pi Hmingmawi chengna in Vasant Vihar ah ralna programme an hmang.

@@ CPO (SI) Medical Test dinga Darjeeling a hang fe Delhi HSA President Tv. James Pusing chu tuta kar liem ta khan damtakin Delhi a lo hung kir nawk tah. Ama ruol hin Delhi a lo um ve hlak Tv. H. Johnson Hmar khawm ko a ni a, an hlawtling ve ve ni’n chanchin ei lo dawng. Ei lawmpui hle a, hmabakah khawm hung hlawtling tung pei dingin ditsakna ei inhlan nghal bawk a nih.

@@ Kar hmasak laia Kashmir helpawlhai le an inbeituona a hliem Captain Crossmawi Hmar zani, July 9 zantieng dar 4 vel khan dam takin Delhi a lo hung tlung tah. A changtieng mitin thil a la hmu fie thei naw leiin operation a la hmasuon ding ni’n an hril a. La dam fel chie naw sienkhawm dam taka Delhi a hung tlung tak leiin a pu, Pu Lalchungsiem Thlawngate’n a thlahuolna a nei. A hung dam that pei theina dingin tawngtaina’n lo san pei ei tiu.

@@ Pi Rebecca Lalhnemkim chun zani, July 9, 3 pm vel khan Goel Medical Center, E-Block, Vasant Vihar ah nau pasalte lawmum tak el a lo nei tah. Naute hi a pieng hlim hin Kg. 3 a rik niin Ceaserean delivery a pieng a nih. A nu khawm a tha pei ni’n chanchin ei lo dawng. Ei lawmpui hle a nih.

@@ Delhi a thalai thuoitu le HSA President khawm term hni zet lo chel tah Tv. David L.Lungtau khawm tulna dang dang leia hun iemani chen Delhia a cham hnungin July 5 tuk khan Tuithaphai panin Delhi a lo suok san nawk tah.

@@ Pu John Ruolngul le a sunghai chu ni nga vel Tuithaphai a an hang thang hnungin Delhi an lo hung chuongkai nawk tah. Kar thar tieng khin an post thar, Hanoi, Vietnam tieng an liem suk el ta ding niin thu ei lo dawng bawk.

@@ July 8, Zirtawpni zan khan Department of Music & Youth Affairs chun Pastor Lalditsak In, 256, Sector-1, RK Puram ah zankhuo tawngtai programme an hmang. Hi taka hin mi 20 bawr vel thangin Pathien malsawmna tam tak an dawng niin chanchin ei lo dawng.

@@ Vawisun, July 10 inkhawm tin char hin Thalai Conference 2011 chungchangah Department of Music & Youth Affairs chun Pu Suo Thang in, Sector-8, RK Puram ah meeting nei an tih. Hi hunah hin Group Leader le Area Co-Ordinator po po khawm thang an tih.

DT 10/7