Piring Parang

- R H Hminglien Hmar

            Delhi papui thenkhat le pastor-pa’n September ni 9, 2011 Zirtawpni-a HCFD |halai Pawl Conference Vawi 4-na kha comment ziek a, sawisel dingin an mi fiel-fiem tawl a.

“Hung chuk hrep tawl rawh” an mi ti a nih. A ni ngei; eini rawiin ieng po khawm ei commend ta chun a thatna le inpak theina tieng ei sietha zet zet a, ei thei tawpa sawiselin, tawkphar tluk zetin ei dem phier hlak a na. Indem hi ei culture thar pakhat ni hiela ka hriet chang a um. Tu khawm hin papuihaiin sawisel dingin an mi ti tlat si a, ka hei pu chawt el chu a na. Hi thusep hi a hming ding khawm ka hriet nawh, ‘Piring Parang’ ka’n buk tawp el a nih.

HCFD |halai Pawl (Department of Music & Youth Affairs) indin kum khawm kha ka hriet ta nawh a, 1993 a ni el thei. Department thar ding a ni leiin a thuoitu ding thlang khawm a la um nawh a. Fellowship Committee khan Secretary (Department Committee Chairman) dingin an mi ruot a. |halai member chu tu tum conference-a group pakhat zat vel kha kan ni phak dim- phak naw deu el awm deh aw.

Hriet naw karin hun a liem duok duok a. Ka hriet dan hi a’n dik a ni chun D/oM&YA hi kum 18-a upa ni tang a ta; a ruolpuihai chu MLA/MP inthlangnaa vote pe thei an ni ve ta ding a nih.

|halai member khawm ei tam tah a, lawm a um taluo. Kan indin hlima member po po nekin tu kuma fresher-hai an tam lem. Kum 1992 Kristmas tawm khan kan carol ve a. Maruti van pakhat le scooter 2 ah kan inleng naw vang. Pu Lalruotthang haiin keyboard sei deu, tawng nek daia sei an nei a, chu chu le acoustic guitar hlui kan hmang a, kan khawvar ve der a nih. Member-hai kha ka hriet kim ta nawh a. Dr Chong le a sanghai Paul-te le Deborah, |ana (|anputer), Puia, Liensatuol, Nk Hniengpui, Judith, Julie Lalengmawi ti vel chu an ni ngei a. A hnung deva khan chu Pu Vung khawm a tangkai khawp el.

RK Puram Sector 4-ah DHCF inkhawm nei a ni hlim khan biekin hi ei sip zo naw kha a na. Tu ruok hin chu thalai chau khawm an intar chu a ni ta zing el a. Hmasawnna chi khat tak chu a nih. Delhi khawpuiah Hmarhai ei pung deu deu va, kum tin fresher platoon thum vel ei nei zie hi lawm a um a. Chu lai zing chun, ei ram tlansan a, mi rama tam-bar ding dap ei ni am ti hi ngaituo sa inl;a a ;ha awm de! Delhi-ah Hmar thalai ei pungna rate charin ei rama Hmar thalai nambar a kiem ve a nih. Iengkhawm ni sien, inchukna insanglem bei ding le sin tha lem thaw dinga hung ei ni chun a tha; ei ram khi theinghil naw phawt el inla.

Biekin tuolpukah kum tina nei hlak Anil Das Music Trophy latuhai an tar kuou hi hmu tawl ngei ei ta. Keini hun lai khan hi competition-a hin kan suok ve a. Choir pakhat ‘Sawm ka sukdam’ ti hla kan sak ding a na. Mipui hmaah kan va ngir thap, sak el dingin kan inpei at tah a. Kan keyboardist Tv. Sam kha a lo narvas deu am a ni hrim, ‘le-law lamah’ ti ang elin, a ni naw lem a hmet fuk a, kan keyboard kha key dangin a khek ta ruoi el a. Lawmman kan lak ta nawh. Tu hnung hin ‘DHCF Choir’ a’n lang rawn hle el a, ei thalaihai nina tarlangtu tha tak a na; ‘chapo lo ding’ ti principle ei lo theinghil nawk vang hlak.

Hlapawl kan thiem nawh tina lem chu a ni nawh ie. Pi Zolienmawi hai rawi an hung nunghak a (Oh, sorry, ‘an hung tleirawl’ ka ti na). Ama hi hmel se lo tak el, Vikaspuri naupanghai lem chun “U Zovi hi a hnungtienga inthawkin a hmel a tha de aw?” an ti vawng vawng el kha a na. Chu khelah Nk Rose Darpui a hung thla bawk a. DHCF Choir khawma mihai hriet a hlaw pei a. EFI Annual Convention-a dam, Redemption Church (Rasthrapati Bhavan biekin)-a inneina program-a dam hlapawl kan sak kha tie. Kan hlawtlingna thuruk nia ka hriet chu insawisel kan thaw rak naw kha a nih. Hotuhaiin thaw ding/thaw dan ding an hril ta chun Nk Julie’n “Charrrr chu” a lo ta; kan pawm tlang pei hlak.

HCFD |halai pawl suong an um em em lai zingin, papuihaiin sawisel a, chuk phier hrep dingin an mi tir tlat sih a. Nuom le nuom naw thu hrim hi indawn lova chuk a ngai tlat …

|halai Khawmpui hi ei ram tienga kohran thaw dan ‘hlui bur el ta kha’ ei copy a, ei thaw ‘ve’ nawk a nih ti hi inphat ruol lo a nih. Chu ang peiin competition item chi tum tum, abikin hlapawlpui, thupawlpui, solo, ti vel khawm hi ei veng tienga an thawdan, kum 60 vela upa, a hlui luot leia ap bur el ta kha modify chuong lovin ei ‘repeat’ ve nawk el a na. Hma ei sawn vieu a ang lai zingin hnung ei tawl hle tina a ni zing a nih. Khawvel hin hma a sawn zing a, mimalin hma lo sawn naw inlakhawm a khawvel inher hin a mi fen ve pei a ni leiin ei hriet naw kar hma tieng ei fe zing hlak. Khawvel invir khawm zui zo lova ngirna ngaiah ei ngir char char chun ngai ei aw zo nawh a, ei hnungtawl tina a nih.

Hmar Kristien-hai hi mihai mi ngaidan le hmu dan nekin music tieng ei inhnuoi a. Ei inhnuoina chu music alphabet hre mumal lo ei la tam hi a nih. Hlasakthiem, thenkhat lem chu fakzawngnaa hmang hiel, sienkhawm music tienga illiterate ei nei nuol a, thil mak tak a nih. ‘What is music?’ ti zawna hi tawi fel/indik taka dawn thei lo ding hlasak-mi ei hau a nih.

Biekina hlathuoitu tam tak music tienga illiterate an um bawk. Chuleiin biekina hlasak hi sawl a um thei em em. Ei inkhawmnaa khawm hin hla ka sak ve hlei thei ngai nawh a, ka ngaithlak lem hlak. Ei anniversary inkhawma ‘Aw Pathien, Nangma chanchintha …’ ti hla an mi sakpui lem kha chu … sak a sawlthlak el ni lovin a ngaithlak khawm a sawlthlak a nih. ‘Waltz’ kha an mi ‘cha cha’ pui a na tie. Hai re hai! Pathien inpakna hla ni sien, ram/hnam hla le a danghai khawm mi’n an sak ria inthawk a thluk by-heart-a sak ve tawp ei tam hle.

Hlapawl inruolsiek hi thil tangkai a ni? Yes? A tangkaina ieng ieng am a na? No? Thil tangkai lo buoipuiin thalai hratlai za tam takin kum tin tha tam an seng thlawn tina a ni? Ieng beiseia hlapawl inruolsiek hlak am ei na? Iem ei target? Pakhatna latuhai le lawmman la phak lo hai danglamna iem?

Kan veng thalaihaiin pakhatna an lak a, kan hlim dar dar khawp el. Kan nu’n ruoi-puiin a lawm heps tie. Ka lo ngaituo ve chu hi hi a nih. Inruolsiekna hla an inchuk lai khan an bei nasa, thang an lak nasa khawp el a. Tha tam an seng a, sum le ngaituona khawm an seng nasa. A tawpah ‘Isu hmangaina le thatna le …’ ti hla thiem le indik takin an sak thei. Kha’ng khawpa an sawlpui a, sum tam tak senga an inchukna (learning activity) khan hla dang indik taka sak theina a pek ding? No! An sawlna po po kha music theory inchuknan hmang hai sien chu Kristien hlabu hi keuvin a solfa zuk en an ta, an sak thei el ding a na. Alexander Hymn Book, SSS, KTB, Kuki Hlabu le Lusei Hlabu, a ieng khawm solfa a um phawt chun zuk keu hai sien, … a fel vawng el ding a na tie (‘Charrrr chu’lo  ti ta un la).

Anachu ieng am hril chuong ei ta? Vawkpui insilfai hnung chirah a kir nawk hlak hi. Eini khawm gospel meiserin kum za a mi el-var ta hnungah hlapawlpui inruolsiek bawk hi ei kir nawkna ding chu a ni awm hi!

|halai Conference nia program kha a fel-fai vieu a hawi; amiruokchu papui thenkhat an chier tho tho. An chierna point thenkhat hei tarlang ei tih:

1. ‘|halai member hi zat lai Lalneilien ti naw competition conduct thei an um naw a ni?’ an tih;

2. ‘Solo le talent competition hi chu fiemthaw an ni tak annaw maw? Kohran department inkhawmpuia fiem thaw, abikin Tuolte Vanglai thu vel mei mei hril a, Pathien inpakna hla fiemthawnaa hmang bawk hi  thaw chi a ni naw ngei’ an tih;

3. ‘Kohran department pakhat ni ve si, kum khatah conferece vawi khat a um a, Pathien thucha thang der lova hei inkhawmpui el chu …’ an ti bawk;

4.  ‘Biekin tuolah banner an tar a, Khawmpui thupui ‘Kraws Thilthawtheina’ ti a nih a. Program-ah an thupui hin hmun a chang naw ngei. An (thalaihai) nuna khawm hmun a chang dim a nih?’ an tih;

5. ‘Group pakhat hai skit-ah misuolhaiin kraws bulah an disco el kha a’n hme naw ngei. Pathien biekin sunga hin chu hieng film/party dance ang chi hi chu hmang naw inla’ an ti bawk a;

No 6-na chu hril da’l ka tih ie; nakie a lungsen pawl um rawi ei tih. Thil pakhat hril tei tei ding a um a. Ei thalaihai le an program ei chuk hrep lai zingin an felna le thatna hril ding tam tak a um vet ho a nih.

1. Thu-awi, hawiher, tawng dan thua le upahai/hotuhai inza kawngah inpak an um a, hi kawnga hin thang hmasaa thalaihai kha an khum annaw maw ka ti hlak;

2. Zingtho thu: conference ni khan zingkar inhma takin an tho va, an insil fai a, innal ding le inphu ding an zo hnungah thuom an inbel a; zing dar 10-ah a hmun an tlung hman tlat tie;

3. Inchei dan thua khawm inpak an um; hril kai met chu member tlawmte chau an nih. Kum 10 hma tienga thalaihai kha an inchei-ler lem a hawi;

Ditsakna insangtak kan hlan nghal.