Lawrkhawm

* Sikpui Sports 2011 - Badminton: Kum dang a ei lo nei hlak angin tukum khawm hin Sikpui Sports chu nei nawk dingin Delhi Hmar Welfare Association chun a lo rel a.

An remchang ang pei a hung huoihawt dingin HSA Delhi kutah an lo inhlan ta bawk. Chu dungzui chun hun intep tak karah October 11 le 12 khan RK Puram, Sector-3 ah Badminton chu inkhel zo a lo ni tah. Carrom khawm tan a ni mek a, a thang nuomtuhai chun HSA Games & Sports Secy., Tv. Ch.Phlegon le Vice-President Tv. E.Ramngailien Lungtau hai kawlah hming la peklut thei zing a ni bawk. Hi chungchang le inzawma thu chieng lem hrie nuomtuhai chun an ni hi indawn thei ni bawk a tih.

* HSA Educational Tour: HSA Delhi Educational Tour 2011 chu October 14 le 15 khan Jaipur, Rajasthan ah hlawtling taka fe a nih. October 14 zan dar 11:00 vel khan bus pahni a inthawk dawkin hi tour a hin mi 75-80 bawr vel an fe thei a nih. Hi tour a fe hai hi vawizan zan ril lai vel khan dam takin Delhi an lo hung chuongkai nawk ta a nih.

* Inkhelmi An Hung Tlung Ding: State League le League dang dang a hai a inkhel leia hung tlung inhma thei lo puotieng a inthawka Hmar United hminga Tamchon Football Trophy a inkhel dinga beisei hai khawm vawisun hin Delhi an hung chuongkai hman beisei a nih. Buoina dang a um naw chun zinga inthawk khin Hmar United a an teammate (pawlcham?) Delhi a lo insingsa mek hai zawm ve nghal tang an tih. Ditsakna ei inhlan a nih.

* Hlasaka Inruolsiekna: Kum tina buotsai hlak Anil Das Music Competition chu vawisun, October 16, Pathienni hin nei mek a ni tah. Ei thalaihai khawm hlapawl, malzai le a dang dangah thang dingin an inpuocha kha a ni a, lawmman hung dawng ngei dingin ei ditsak takzet.

* DT Editor Nu Damlo: Delhia a nauhai kana hung Pi Lalthathieng, ei Editor Tv. William Darngon nu, chu chawlkar khat lai damnawna lei a tho har pei lo in a lo um tah. Charag Pallika Hospital, Moti Bagh pan pui a ni hnungin in tieng an in enkawl sunzawm mek a. Dengue a lo kai leiin a chau deu a chu tuhin chu that tieng a hung pan pei tah. Ei tawngtaina’n lo san veng ei tiu.

* Sikhawvar Magazine Thar: Hmar tawng chanchinbu thlakip suok ‘Sikhawvar’ October Issue chu Delhi a inchawk theiin a lo um nawk tah. A thla thum suokna chau a la ni leiin duthusam a la tling zo naw hle a. Amiruokchu, Editorial Board ha’n nasa taka thang an hung lak peina zarin hma a sawn sawt hle. A thei phawt chun ei tawnga sut chanchinbuhai hi chu inchaw seng hlak ei tiu. A tha tam a se tam, ei tawng humhalna ding le sukhmasawnna ding a hmangruo tangkai vawng an nih ti hi theinghil ngai naw ma niu. A dittuhai chun Tv. Samuel L.Khawbung (aka Huopzau) @ +919654729908 kawla ngaiven thei zing a nih.

* Tamchon Tournament Tan Ta Ding: Kar thar Pathienni khin 5^th North East Tamchon Football Tournament chu Dr. Ambedkar Stadium, New Delhi hmunah tan ni tang a tih. Ei team, Hmar United hai khawm hi tournament a thang ding hin an inpuocha mup mup zing a. Chanchin ei lo dawng dan chun Opening Match khawm an inkhel ding a nih. Chun, HSA Delhi Cultural Troupe khawm Opening Ceremony a lam dinga fiel ei ni a. Vawizan inkhawm tin hin BSSC, Mahipalpur ah ‘Fahrel Tawk Lam’ inchukna um a tih. A tam thei ang fe khawm dingin ei in ngen nghal bawk a nih.

* CPO (SI) Tling Thar: Tuta kar liem ta khan Central Police Force (Sub-Inspector) result chu puonglang a lo ni tah. Hi taka hin HSA Delhi thuoitu lo ni hlak Tv. Lalhmunlien khawm a hlawtlingna a lo chang a, ei lawmpui takzet. Hmar mi hlawtlingna chang tuchena ei hriet thei po hai chu: 1. Tv. Lalhmunlien (BSF), 2. Hmangai Ramchouilo Hmar (CRPF), 3. Lalditthang Khawbung (BSF), 4. D. Lalthangluoi Khawzawl (CRPF) le 5. Kaimalsawm Ruolngul (CRPF) hai an nih. An hlawtlingna hi DT chun a lawmpui takzet a, hlawtlingna insang lem hung chang pei dingin ditsakna ei inhlan nghal bawk a nih.

DT-16-10-11