HMAR ṬOBUL LE INVAWNG DAN

Ṭobul thusimin a hril dan chun Hmarhai hi China rama inthawka hung thlang tla nia hriet an nih. An hung inṭanna hmun tak chu Sinlung ti a nih. Sinlung umna hmun chie hi chieng faka hril thei a ni nawh.

Szechuan state sunga Yulung vadunga inthawka hla lo tea um Sinlung khi a ni el thei dim! Ieng khawm ni sien, Hmar thlatu bulhai chun China rama inthawka hung thlang tla ngei an ni hi inphat ruol ani nawh. China rama inthawkin Tibet tlang bul hung hrut thlain Burma rama an hung lut a. Shan phaizawlah hun sawt tak an um hnungin, India hmarsaka hmun hran hranah an hung chuongkai tah a nih. Vawisuna Hmarhai umna chu Cachar le North Cachar Hills, Assam; Meghalaya, Mizoram, Manipur le Tripura an nih. Burma rama iemani zat chambang an la um zing bawk.

Tiena tlanga inthawkin Hmarhai chu lal neia khuo hluo hlak an lo nih a. Lal chu khawsattu, khawsung roreltu lu tak, khuo le tuihai enkawltu tak a nih. Lal rorelna inghatna bul chu khawnbawlhai (siehmang) an nih. Khawnbawl ding hin lal chun a khuo sunga mi var le ringum a ruot hlak. Lal dam naw changa a aiaw thei ding khawnbawl upa ruot a ni hlak a, chu chu muolkilmiṭha ti‟n an ko hlak.

Inlalna hi inthla sawng peia fe a nih. Lal chu zankhat mitsim tuokin lo um tan aw sien, a nau pasal laia naupang takin inlalna chang a tih. Rorel thei a la ni naw chun, laibung piengpui laia upa takin a puitling hma po rorelna a lo chel hlak. Hmar pahnam hieng Leiri le Changsanhai ruok chu nau upa rohluo an nih. India ramin zalenna a hung hmu hma po khan, lalhai chun an khuo le tuihaia inthawkin busung-sadar kum tin an fak hlak.

Lal le a khawnbawl upahai chun khawsunga thubuoi hla buoihai hnam dan dungzuiin an rel hlak. Misuol, rukru, nuhmei chunga thubuoi, dan le thupek bawsietu, khawtlang himna le muongna suksetu, insukpal thua buoina, nuhmei pasal chunga thubuoi le tuolthat chenin lal le a khawnbawlhai chun an rel hlak. Lal rorelna le thutlukna chu thu tawp a nih hlak.

Lal le khawnbawlin thiemnaw an changtir hai chu a thu zirin siel le salam an chawi hlak. Salam chu vawk a ni chun, sum thum neka chin lo a nih hlak a, lal le khawnbawlhai chan a nih a. Lal le khawnbawl upahai chu fak le dawn zuwngna kawng, khuo sung hmasawnna kawng, ram le hmun ṭhetna le khawsung thil hrim hrima thuneitu insang tak an nih.

Sunzawm Ding…