Thlawibuong Sepna
April 25, 2012
Ei Lalpa kum 2012 Tuolbuol thla ani a,
sungtin le zuo tin tlangtin ṭuona muol tin
dapin tuklo ram buonnel a lengin ‘Khawlai tak am ṭhâng
a ta, lo dingin’ ti a thlira duthu an sam vel lai chun kei ruok chu ka zalna laikhuma thlehnem belin damte a ka
singmit insimin ka cellphone anthawk hla ka ngai a.
ICI Choir ka ngaia, Pu
(fam) Buonga chu a khek a, lung an lêng vawng vawng khawp el. Chuonga fam
Buonga a khek zo char chun Lalsanglien Zote’n mawi em em in a hung (Leiri ṭawng
takin) indur a, hla a pova ka dit naw tawpkhawk Thlawibuong chu mawi em em in a
hung sak a. A ieng dinga artist laia ka dittak hin thlawibuong ti a a
kelrawl suok ela hung sak am ani le!
Ani ngei hmangaina thil thlawnpek hi chu a lo
mak em a nih, zaia chawia thu le hla tin rem alo tul el chu ani hi. Hmar
tlangpui a khawpuia mipui tamtak kara hin an lêng tleirawl le nunghak hmelṭha
sensier, chunnu’n an sakhmela rangka-dartui anluon bik ni maw ti ding khuotin
sukmawiin, sienkhawm, kei ka di, ka
lunglai kuoitu a um ve si naw. Aw, mi’n hmusit takin an lo hnawt zam am an ta
leh. Ka hmangai nuthlawi hmelṭha
khah. Iengdinga a nuthlawi tak hi thlang am an ta?
“Hmartlang vangkhawpui zaleng tin lai hin
An leng vel tleitir vangkhawpui mawiin,
A leng ve si naw ka lunglai hluotu,
Sirah an hnawl thlawibuong ka lunglai hluozotu.”
Aw, valrieng tak hi chu aw, ka hmangaina an
thupa, innei a inkhata lenghmun khata lengza hi a rem ve si naw a la ti ta deu
deu. Sabuol tlang a sa tinreng hai hlimtaka a kawptea an indi riel riel ang
khin um ve chak. Sienkhawm, ka kawla i um si nawh. Aw, nuthlawi hmelṭha,
khawlam i um le.?
“Ka hmangaina. . . . . . . . .
A rem ve si naw, runhmun lengdun hi,
Sabuol tlanga satinreng runrem in
Rûn rempui ding thlawibuong khawlai am i um a?”
A la dittawk naw hmangaina hi chu aw, zan
thla varhnuoiah suorah tui damte a luongin chu taka nga hai nupa inkawp chawite
te a an fuona, an mi dawnpui ve si naw, kei di ngaia inrieng val chan ding reng
hi, thei nisien, an ni anga ka hmangai nuthlawi hmelṭha
le um ve ka chak de aw.
“Sawrthla engah suorkawia luongdam diei,
Limngate’n fuonzai anrel athieng ten,
An mi dawnpui naw di ngai lunglen val,
Thei changsienla fuon ve ka nuom di thlawibuong le.”
Sienkhawm, khuonu ruot naw di chu pawmzai rel
a rem thei mawl nawh. Beidawng takin, a liem tak tak ding chu ngai ngam lo in
ruoi ding dang nei si lo le, Ngaiban tlangpui chu a hei ruoi ta a. “Ngaiban
tlangpui lunginsiattakin ka di thlawibuong liem el ding kha lo dang la.. Siel
ramsuok a kir nawk hlak anga hung kirin, lung in leng takin tlangsanga va fe in
kan khuosawt thu chu kawpte in van hril kan tih.”
“Lo dang ta la ngaibantlang, lo dang la,
Ka di thlaibuong liem ding lo dang la,
Siel ang lêtin lunglen tlang sanga,
Va chuonin lunglen thu hril dun kan tih.”
Hei hah! Khuonu ruotlo di tawng hi chu a pawi
ani hi tie. Hi lei hin annawm ‘AW HMANGAINA, MI SUKRIENGTU’ ti thu a lo suok
nih. E khai! A lo tawp dai an ta hi tie!
A dang ngai nawk ka ta .. Pawlsiemlien a Di
nunnem hung hril nawk ka ti cheu.
No comments:
Post a Comment