Ka Thianpa Lehkha Hnuhnung

Ka Thianpa Lehkha Hnuhnung

(Zoram-ah ngei hetiang thil tenawm a thleng hi a mak asin!)

                “Mamaaaaaa!”

Ka khum atang chuan ka inperh tho rang kher mai! Chu aw chu ka nu aw ngei a ni a, a mangang au rawl a ni. Ka sana chu ka’n bih nghal a, zing dar 6 chiah a la ni. Ka nu hian zing chaw ei tur lo chuan min kai tho ngai lo va, tun ang huna pawn atang lehnghala min rawn au a nih chuan chhan eng emaw tak zawng a awm a ni ngei ang.

Hmanhmawh taka ka chapal ka inthawlh lai chuan ka room kawngkhar chu a rawn intheh hawng thuai a, ka nu chu thlahrang um hrep ni awm fahrana thlabar hmel pu hian a rawn kat lut nghal rawk bawk a. Thaw hlawp hlawp chung hian,

“Mama…. Mapuia a inawkhlum!” Ka nghing dawt mai.

“Eng maw i sawi a?? han sawi nawn leh teh.”

“Mama……i thianpa Mapuia….exam-a a failed vangin a inawkhlum an ti.”

“Ka awih thlawt lo.”

“A nia lawm, tukinah a pa zing thovin an bathroom-ah a hmu a, a taksa chu a lo vawt vek tawh, a kawrhma ipte-ah lehkha a hnutchhiah a.”

“Ka awih thlawt lo!” ka’n ti leh ngawt a, mahse ka nu hmelah chuan a fiamthu lo tih a lang chiang ropui si. Ka mumang tal han ni se ka va’n ti tehreng em! Ka mutna pawh thlep fel lova hmanhmawh baklengin Mapuia-te in lam pan chuan ka phek chhuak nghal a, ka va thlen ve chuan veng chhung mipui an lo inhawr tup tup tawh, zah pawh dawn lovin ka va keu sawt sawt a, tahchuan ka pian ahnua ka thil hmuh tawh zawng zawnga hmuh hrehawm ka tih ber mai chu ka hmu ta; ka thian, ka unaupa Mapuia, nunna reng nei tawh lova khuma zal chu!

Ka inthing nawk nawk a, mangchhia tal ni hram se thanharh san daih ka duh ngawih ngawih. Mahse mumang a ni si lo, ka hma ngeiah chuan ka thianpa chu a lu chiah langa puana khuhin an mut a, ka thian Mapuia, mi hlim thei leh kawm nuam tak kha tunah chuan mihring a ni ve ta lo! A bulah chuan a pa chu lungchhe vankai hian a lo inhnit hlawp hlawp a, ka lainat kher mai. Nu berin a boral san tawh a, tunah anni pahnih leh a farnu chauh an nih tawh kara hetiang boruak an han tawng chu a va’n na dawn rua em!

A mak a ni! Nizan lawkah pawh a lo leng a, ka room-ah awm dunin ka movie download thar en min dil a, entirin kei erawh chu chhun lama ka inkhelhna vangin ka mut a rawn chhuak a, “Ka chau em mai, tikhan nangmahin lo en la i haw dawnah light hi min lo off sak mai dawn nia aw,” tiin ka muthilhsan ta a nih kha. Hetiang tur tih hria ila ka muthilhsan hlek lovang a, ka room-ah khan ka chelh zankhua zawk tur!

Ruang bula Mapuia pa lo inhnit hlawp hlawp bulah chuan ka zu kun hnai a, “Pa, Mapuia lehkha chu ka lo hmu ve thei ang em?” (Kan inkawm nasat em vang hian Mapuia pawh hian ka nu leh pa chu ‘ka nu/ka pa’ tia kovin keipawhin a pa hi chu pa angin ka en ve mai a ni.)

A ipte atang chuan ka thianpa lehkha hnuhnung, mittui luan zawr vek tawh chu rawn phawrhin ka kutah chuan min rawn hlan a, keichuan bathroom lamah tlan luh pui nghalin ka va chhiar ta a, chu lehkha-a thu inziak chu hei hi a ni;

“Ka pa, ka puitlin ve theih nana chhun zan zawma min thawhsak laiin kei i fapa ve hian ka zirlai em pawh pass zo lo khawpin i bei ka tidawng si …Min ngaidam ang che.”

A hnuaiah chuan, “Zuali ka hmangaih che,” tih zawng hi a inziak leh a, chu zawng chu ka thianpa kuthnu hnuhnung chu a ni.

Mak ka ti takzet! kan exam kha final pawh a la ni lo va, term exam mai a la ni si, keipawh ka failed ve tho va, result chhuah nite phei chuan kan nui dun bawk bawk a nih kha le! Hlawhchhamnate’n an tihbeidawn zawh ngai loh ka thianpa chu engin nge mawlh ta a chutia a nunna hialin a lo tuar tak mai le?

Engtin nge ni kan hman liama, tunge vuina hun hmang pawh kha ka hre mumal ta lo, ka ngaihtuahna a buai vek a ni ber mai. Thlan kotlanga hnem ngaia a pa, a farnu neihchhun Sangtei leh a bialnu a hmangaih Zuali-te tap hlawp hlawp pawh kha hnemtu tur awmchhun ka nih ka hria, mahse anni aiin hnem ka mamawhna a nep bik si lo.

Vuina programme a zawh chuan mal ta ngawih ngawiha inhre chungin kan in lam ka pan a, mut hahdam veng veng chu ka mamawh ber niin ka hria. Zing lama ka thawhsan ka mutpuante chu ka kalsan dan ngai ngaiin khumah chuan a lo la inchap darh nuaih a, ka mutna tur siam rem paha ka lukham ka’n dahsawn chuan a hnuaiah chuan lehkha ka hmu ta tlat mai.

Chu lehkha ka zuk hmuh rual rual chuan tu dah nge tih chu hrilh leh chuan ka ngai lo, ka thianpa Mapuia kutziak, vei zawnga awn ngei mai hi chu kutziak za tam zingah pawh ka thur chhuak nalh thei ang chu!

Mak ti tak mai chuan ka zuk ban a, engtia ka lukham hnuaia Mapuia lehkha ziah chu lo awm ta nawlh nge ni ang le? Mahse keima tan ngeia a ziah chu a ni si. Ka khum tlangah chuan thuin hmanhmawh takin ka pawtpharh a, ka thianpain ka tan liau liauva a ziah lehkha hnuhnung chu ka chhiar ta a ni.

“Unaupa,

He ka lehkha i hmuh meuh hi chuan ka taksa chu piallei daiah zalin ka thlarau chuan a chatuan hmun tur Setana angchhung chu a pan mek tawh pawh a ni mai thei, chutih hunah chuan mite chuan dawihzep tia min selin mahni harsatna pawh sutlang ngam lo ti pawhin min sawi luai luai ang a, pawi ka ti lo. Mahse nang, he khawvela hmangaihtu ka neih chhun emin thudik i hre lo tur hi chu ka ngai ngam lo a ni.

"Mahse he thudik ka hrilh hma che hian hei chauh hi ka chah hmasa duh che a, i laka ka thil duh leh ngen apiang min tihhlawhtlin sak ziah ang bawk khan tun tumah chauh hian min tihhlawhtlin sak leh ngei ka beisei. Chu ka thil ngen duh che chu maw, he ka lehkha hi i chhiar zawh chuan tiriral nghal la, he thudik hi he kawng ka zawhna-a mawhphurtute hian an hrechhuak ngai lovang tih hi min tiam la ka duh a ni. Chuti ni lovin he thudik hi puanzar duh ni ila i thianpa hian he khawvel ka chhuahsan hi a tul lovang. Thudik sawi hma-a hetia ka han chah hmasak te te che nachhan hi chu maw, thudik i hriat hmasak chuan he lehkha pawh hi chhiar chhuak mumal lovin ka duhdan ngaithla lova atthlak taka i chet mai ka hlau a ni.

"Thianpa i room-ah ka lo kal a, mase he ka thiltum hi i hnenah ka sawi a rem si lo, thiltum ka neih reng rengin ka hrilh thin che a, nang chuan min tihhlawhtlinpui ngei tumin theihtawp min chhuahpui thin a nih kha. Mahse tun tumah erawh hi chuan he ka thiltum hi hria ni la i theihna zawng zawngin ka hlawhtlin lohna turin min dal i tum dawn tih ka hria, mahse ka tihhlawhtlin ngei a tul si.

"Vawiina inkhel ve peih lova ka let leh ta khan kan in ka pan ding nghal a, kan in ka thlen chuan inkalh lovin kawngkhar erawh chu a lo inkhar a, midang an lo haw ve tawh a nih hi ti rilru chunga lutin mut hahdam tumin ka khum ka pan a, chutia ka kal phei lai chuan ka pa room atang chuan thawm a lo awm a, zu rim a rawn nam chhuak rum rum bawk. Ka pa-in zu a lo in leh ta a ni tih chu ka hrethiam nghal, kawngkhar chu a inkhar phui loh vangin ngaihthat lohna hranpa em em pawh nei chuang lovin ka va bih satliah ve mai a, tahchuan thil rapthlak ka va hmu ta a ni.

"Unaupa a mak lutuk, chutia ka va bih chuan khawvela ka hmangaih ber mai, ‘dan khatna ngeiin ka nei ang’ ti a i hnenah pawh ka sawi thin Zuali leh tihnawmsak tuma theihtawp ka lo chhuahsak ve thin, ka pa ngei chu an lo mudun lai ka va hmu ta a ni.” (Ka chhiar tawp chawta ka phu zawk mai, mak ka va han ti tehreng em! Vawiina thlan kotlanga an tap laite kha ka mitthla-ah a lo lang zut zut a, thinrimna chuan mi rawn tuam nghal hlup hlup mai. Mihring hi a va’n lo tenawm theih ngai em! Thianpa i sawi dik chiah e, thil dang sawi hmasa lovin he thudik hi min hrilh tlang nghal ni la chuan a bak hi chu ka chhiar hman hauh lovang le!)

"A rang arangin kan in atang chuan ka chhuak leh nghal a, pan lam tur reng ka hre lo. Ka tan khawvel hi a thim zo va, ka hawina lam apiang hi a thim chhah zual a ni ngawt mai. Rei fe pan lam tur ber hre lova ka vah kual hnuin tunah hei i kiang ka lo thleng ta, thianpa, ka na a ni!

"Mittui sur zung zung kara i dawhkana he lehkha ka ziah lai hian nang nena kan hun hman dun zawng zawngte kha ka chhui kir a, kan tet deuh laia ka khawhar changa ka nu thlana mi i tahpui thin laite kha... Thianpa, ka lungngaihna tinrengah nang chuan min hnem thin a, ka mittui tlak i phal ngai lo a nih kha, i chungah hian ka lawm asin. Mahse tunah chuan i thianpa hi hnem tlak ka awm ta lo.

"Ka hmangaihte pahnihin min phatsan a, kan pathuma he khawvel kan hman tlana kan chhiat vek ai chuan keiin leinun ka kalsan hi ka thlang ta mai a ni. Thutlukna chu ka siam fel tawh a, kir leh thei ka ni tawh lo. La dam zel pawh ni ila ka tan hian ni a eng ve ngai tawh dawn lo va, ka tan he khawvel hi chen vena tlak a ni tawh dawn chuang lo.

"Ka thuchah che chu ka thlarau i hmangaih vang tal pawhin han tihlawhtling hram ang che.

"Dar 12 a ri ta, ka tum ram chu pan turin kal tawh ang e. Nang nena lawm taka a rawng kan bawlsak thin Lalpa chu lo vuan tlat la, ka thlarau tan zahngaihna min han dilsak ve thin ang che aw.

“Thianpa ka va’n ngai tak che em!”

Ka chhiar zo chu chhuatah chuan ka thu thla hnawk mai, ni tla tur chuan ka chhungrila thinurna meipui inmung chu min hriatpui ve ni awm takin ka room chhung chu a rawn chhun sen phut a. Hetiang khawpa mihring tenawm hi he khawvelah dam tlak an ni dawn em ni? Anni tenawmna vanga ka thianpa’n tlang sel luai luai khawpa famkhua a lawi hi ka hrethiam mawlh lo.

“Unaupa i thu min chah hi tihhlawhtlin harsa ka va’n ti tehlul em! Ka tihhlawhtlin ngei ring chunga keimah chiah thudik min hrilh i nih vang chauhvin ka zawm sak nang che, mahse an hringnun zawng nuamsain an hmang bik tawp lovang tih ka intiam e.” tia phun mawlh mawlh chungin ka thianpa lehkha chu ka halral ta a.

[Source: thungaihnawm.com]

Hi chanchin lunginsietum tak hi Mizorama a taka thil tlung besana ziek a ni a. A lekhathawn (scanned copy) ngei khawm ei lakna, thungaihnawm.com a hmu thei a nih.-Ed., DT