Lawrkhawm 27th May 2012

** Rev. Ramchuoilo Varte, Resident Superintendent, BSSC chu tuta kar liem ta khan North India mission hmun hrang hrang fang dingin a’nzin suok thu ei lo dawng. Ei palai in a hril dan chun hun iemani chen zet chu a hang cham ding niawm a nih. A rawngbawlna Pathienin malsawm ngei sien ei ditsak.

** HSA, Delhi Jt. Hqrs. chun Hmar hawrawp le Hmar tawnga ni le thla tiem dân poster inrêl khawkin a siem a. Vawisun a inthawk inchawk thei ni tâng a tih. Thangthar, Hmar tawng ziek le tiem thiem ta lo tam takin ei sawr tangkai ngei beiseina leia hieng ang thil hi an hung buotsai a nih. Hmar nau chêngna in tinah pakhat bêk intâr ngei ngei dingin mitinin inchaw seng ei tiu. Chun hi taka inthawka sum ei hmu hai chu DU Registration Help Desk siemna a sengso hai phuhrukna a hmang a ni ding a nih.

** Delhi HSA member North Campus tieng a lo um hlak, tuta Malviya Nagar a khawsa mek Nk. Grace Mary Lalthienghlim pa Pu Joseph Hmar aka Bona (54) chu May 25, Zirtawpni zan dar 8:40 vel khan a lo boral tah. Ama hi a nuhmei le nauhai leh Tribal Colony, Imphal a um a ni a. April thla vela inthawk khan a lung le thin tieng harsatna a nei bakah Jaundice khawm a lo nei bawk lei a thi ni’n chanchin ei lo dawng. Lusun tuortu hai ei tuor pui takzet.

** May 25, Zirtawpni zan khan HCFD, DoM&YA hmalakna in Pastor Lalditsak in, 256, Sector-1, RK Puram ah tawngtai khawvar programme hmang a nih. Hi huna hin thalai mi 35-40 bawr vel an thang a, Pathien pawlna dawngin an hlim tlâng hle thu ei lo dawng. Ei thalaihai Pathien in thuoi pei raw se.

** Vawisun, May 27, 2012 Pathienni chawibiek inkhawm tin char hin Pi Judith Hmar a in, Sector-8, RK Puram ah HSA, Delhi Jt. Hqrs. Meeting um a ta; DU Registration Help Desk, DHPL-5 le hmalak dan ding dang dang hai ngaituo ning a tih. Chun, zanbu khawm kil tlang ni nghal bawk a tih.

** Zani, May 26, 2012, khan Hmar Students Association, Churachandpur Jt. Hqrs. chun 2012-2015 sunga thuoitu ding thlangna Buonzawl, HSA Campus, Rengkai an nei. Hi election a hin HYA General President Pu Zothanmawia chu Presiding Officer a hmang a ni a, HSA General Headquarters a inthawk’n Pu Rochunghnung, Vice-President le Pu Ngursangvung, Joint Secy (i/c Manipur) hai an thang ve. Unit 9 haia inthawka representative mi 48 fekhawm hai chun Secret Ballot Paper hmangin a hnuoia tarlanga um hai hi lungruoltakin an thlang.

President: Solomon L Joute

Vice-President: Philip R. Tusing

Secretary: James Malsawmlien Puruolte

Asst. secy: Lalthanzau

Finance secretary: Gospel L Hrangchal

Treasurer: Obed Joulunglien Joute