Editorial Board Thukhawchang

Nikum, 2011, December thla khan ei editor chu mani in lum ngei a Krismas hmang dingin a lo suok a. A hung kir nawk el dinga ei ngai lai zingin a hang insukpal leiin thla li lai hlawl a thang pha ta hiel a ni khah.
Editor um naw sunga a sin lo cheltu dingin Tv. Robert

Khawbung ei fiel a, thahnemngai takin ei chanchinbu a mi lo enkawl peka lawm a um takzet. Amiruokchu, ama khawm tulna leiin an khuo tieng a suok nawk a, ei Sports Secretary Tv. Phlegon mawphurna hnuoiah ei chanchinbu chu a lo inhlan sawng nawk a. Ama khawm chun tlawmngai takin a lo chel hring nawk pei a. Inthuruol taka ei indawmtuo dap dap lei chau a kha hun sung khan ei chanchinbu khawm chatlak lo a suok thei a ni a, lawmum ei ti takzet.

            Chun, an ni el chau nilo in ei President rawi rawiin, Editorial Board sunga mi leh, a sunga mi lo leh, ei thuoituha’n an thei tawk ang sengin hma an lo lak seng bawk a. Ei hmadawmna kawnga ei inthuruol zie a suklang chieng hle a, lawm a um khawpel. Hma tieng pei a kalchawi dan ding zuk suongtuo khawma thafan a suk um hle el.

            HSA Jt. Hqrs., Delhi Meeting nuhnung tak khan Delhi Thurawn chungchang khawm hril tlangna nei a ni a. Hma tieng pei a hi neka tha lem le detindo taka a fe pei theina ding beiseina leiin ei Editor um naw sunga a sin lo cheltu Tv. Robert Khawbung chu Joit Editor dingin namnghet a nih. Chun, ama bakah hin, chanchinbu siem tienga inhnikna inthuk tak nei, High School a kai laia inthawka ‘Ruonglevaisuo’ monthly magazine lo buoipuitu laia pawimaw pawl tak, nikum laia Delhi a sawrkar sin lo hung zawm thar Pu Lalhmingthang Songate chu ei Editorial Board member dinga laklut thar a lo ni ta bawk a nih.

            Ei member thar hai leh ei reng a thangruolin ei magazine hin hma a sawn pei dan ding mani theina ang zawn senga ngaituo in thang la thar sau sau dingin ei in fiel thar a. Area tina inthawk inchuklaihai khawma area visit ei nei laia ei thutiem hai hrezingin, Delhi Thurawn hi chul tieng neka hma tieng a sawn pei lem theina dingin thang la thar nawk seng dingin ei in fiel a nih. Chun, tiemtuhai po po khawma Editorial Board hai kuta innghat el lo a mani thei ang tawk seng a thawsuok hung nei zawm ve pei dingin ei in ngen bawk a nih. Khawvel hmuntina cheng Hmar hnathlakha’n kartina ei chanchin le thukhawchang an lo hriet ve zing theina dingin Delhi Thurawn hi suk vul thar ei tiu.