Dehradunah Good Friday - William Emmanuel Darngon

April 18 zantieng khan ka khum le nitin a duot tak a ka nawtfai hlak ka PC inthutna kawl le kieng buoi nak nak a ka lo hre fel lai tak chun, “If I die young; bury me inside, lay me down on a bed of roses. Sink me in a river at dawn; Send me away with the words of a love song..” ti’n ka cell phone a hung inri lauh lau a.

Ka zuk dawn chun ka ruolpa Joseph Pakhuongte’n a mi hung biek a. Ama hi North East Fellowship, Dehradun a inthawk Good Friday hun a hlasak rawngbawlna nei ding a fielna a dawng thu ka lo hriet thawi vuot tah a. Chu le inzawm a mi hung bie hi a lo ni a. Fe ding a a’nsiem thu a mi hril ruol ruol chun va tawiawm dingin a mi hung fiel zui nghal el a. Ka lo ngaituo lawk naw leiin zuk dawn el dan ding khawm ka hriet bik naw chu anih. Hniel thlak ngei ngei chu lungril a ka nuom dan tak ani a. Amiruokchu, san mumal tak um si lo a nuom pawng hniel ringawt el khawm chu ka nuom chuong si nawh. A hun hlak an bichil ta vieu nawk nghal el si. Ngaituo tulhai ngaituo hmasa zet a; anhma tieng tak a ka thuthlukna zuk inhriettir nawk dingin ka biek lungawi thei hram a.

            “Ama chu hlasak thiem ani lei a an Fellowship a inpakna hla sak ding a an fiel ani a; kei hin ieng am tangkaina va nei ve’ng ka ta?” ti ka ngaituo’n ka thutawpna chu “Fe lo” anih. Amiruokchu, ka ruolpa’n ngaina tak a a mi fielna chu ka ngaihlu hle a. Chubakah, a hlasak nuom thenkhat sound track a nei naw leiin keyboard chalai pek dingin a mi fiel bawk a. Ka ngai pawimaw hle. Chuleiin, ka thaw thei tlawm hle sienkhawm a ‘bodyguard’ a thang malamin ti’n ka rawngbawl ve theina tawk ka tadinga kawt inhawng chu hlen ngei tumin ‘aw’ ka paw pek tah a.

            Tlinnawna tam tak ka nei ti chu ka’n hmai naw a; Maltinsawmtu hming a kawt hlu tak hawng pek ka nina a ka hamthatna khawm ka’n hmai hliek nawh. Kan zuk inthawk suok ding ka zuk ngairuot ringawt khawm a ka hawphur namei nawh. Nisienlakhawm, rawngbawl a va’n thawk dawk ve ta chawk chu ka tading khawm a malsawmna ni ngei a tih ti chu ka ringhla chuong hau naw bawk. Chuongchun, hawphur tak, beisei tak pum zing si’n fe ding chun ka’n siem tan ta a. April 21 zantieng dar khat vel chun hmawsarumin sunbu ka zuk fak mawl mawl a. New Delhi Railway Station pan in auto’n kan tlan phei ta veng veng a. Sung le kuo, ruol le paihai chu mi lo tawngtai pui zing dingin auto a’nthawk khawm chun kan la zuk incha mawl mawl zing bawk a.

            Rel Station kan tlung chun kan rel chuongna ding khawm platform ah a lo innghat ta zing a. Loudspeaker a inthawk chun, “One two zero five five; Dehradun Jaan Shatabdi is ready for departure at its scheduled time from platform number fourteen” ti’n an hung puong zing bawk a. Chu chu zantieng dar 3:25 anih. Minute sawm vel chau hun kan nei ta leiin footover bridge a chun tlan bahrikin kan zuk tlan phei nghal a. Kan autopu’n Ajmeri Gate tieng a mi’n thum leiin hla rei kan tlan a. Thuomhnaw rik tham pai naw inlang khawm rel sung kan zuk lut meu chun kan thuok a lam zak el ani tak. Kan thungna ding a reserved D3 coach, seat 79 le 80 a chun kan inthung chawt a. Tui dei kan inchawk sawk sawk a, sawt khawm chawl talo chun rel chu ka tum ram pan in antawl thut thut tah a. Car coach, bus ang deu a khingtieng khingtieng a seat pathum pei a intlar zawt ani leiin kan intep tha lai lai hle. Lukawm inlawk, lukhumte khum, lu kawl, sam buong, sam kir, sam tho, khakhmul sei le khakhmul bo leh; kan chikim hle.

            Haridwar Station kan tlung chun a zatve neka tam in an mitum san a. Kan inthuok huoi a. Dehradun chen chu thawveng takin kan chuong tah a. A mi lo hmuoktu dinghai beisei nek a inhma, zan dar 9:00 in kan tlung hman leiin kan zuk phone a te teh a. Minute 15 vel kan nghak hnung chun Maruti Suzuki Esteem car pakhat hi kan sirah a hung chawl chat a. North East Fellowship Dehradun a Chairman sin chel lai, Presbyterian Theological Seminary a Vice-Principal ni bawk, Rev. L. Roshyama Hrangchal le Secretary sin chel lai Pu El Darngawn, a mi thuoi ding a hung an lo ni a. Kan in chibai a, kan innghatna ding Covenant Reformed Presbyterian Church campus chu kan pan phei nghal a. Presbyterian Theological Seminary a inchuklai tlangval fel tak tak in an mi lo bawisawm vat vat a. Kan riekna ding pindanah chun an mi hang thak a. Keini telul khang khawp a an mi lo lawmlut te kha kawngkhat ka ngaituo chun inthlahrung um ka ti takzet a. Amiruokchu, Pathien an hmangaina lei a an thaw lem ni’n ka hriet a. Pathien hausakna kan intem phakah ka ngai a, ropui ka ti hle.

            Kan room chu chin inrel tak, inthieng vek vawk el hi ani a. Single bed pahni, single chair pahni, steel almirah pakhat, table drawer pakhat le darthlalang hi inrel khawkin an lo rem a. Bathroom inhawi remchang tak a attached ani bawk. Sabawn, shampoo le towel chenin an lo sie diem a. Hotel changkang tak a innghat leh a’ndangna um taluo chuong bek bek dingin ka ring nawh. Munirka a ka chengna room intep tak leh ngat lem chu intlau ve tak ni’n ka hriet. Beiseina khel tieng dai a nasa a an mi lo enkawl ani leiin thaw ding dang um nghal lo chuh; lunglawm a kim hlie hlie. Kan va fena san ka ngaituo ruok chun sungril takah ka hawphur a zuol tul tul bawk leh, um dan khawm thiem a harsa angreng.

            Kan insukfai a, chawmkhat kan hadam hnung chun Pu El Darngawn inah zanbu fa dingin kan fe a. Ama khawm hi exam lo zo ve char, imu khawm la khawp tawk hman lo, April 30 a M.Div graduate ding anih. Arsa inhnik tawk tak an mi lo buotsai pek a. Khawp lalh a kan fak zo chun inpan khawthlai chuong lo in keyboard kan roomah kan dawm tung a iemani chen hla kan la ennawn lem a. Lo theilo a zing tho inhmat a ngai leiin kan zal vat a. Ka la riek ngai nawna hmun a zal ka ni lei am ani ding; darkar hni vel ka la in hman chau chun ka thanghar a. La zuk in nawk tal ka tum khawm chun ani thei ta der dal a. Imu ka la khawp nawh a chu thu tam tak ngaituona hun in ka hmang lem hlau a ka lawm kawngkhat tho. Ka sirah ka ruolpa a la in bur bur lai chun ka tho a, kan phi fai ta hlawl a. Dar 5:00 am a hung inri chun terrace a ka va’n vak thawveng a. Mussoorie tlangdung phen a zing nisa suok tawm eng phutin hi khawpuite a hung el var sang sang lai dam chu ka mobile camera’n video ka lak kuol vel a. A mawi hle. Ka khat bak ni langkhawm ka tlai ve em em.

            Kum 2008 lai khan Pastor Lalditsak rawiin, Mussoorie a inthawk a km. 50 bawr vel a hla, Thatur vadungte ah ngaman in mi sawm vel kan feh a. Chu tum chun Dehradun hi kan hraw tlang a. Chu tiloah chuh tuta tum hi Dehradun riek meu a ka’n zin phutna ani a. A boruok le leilung khawm hi tuk hin ka hmu chieng chau anih. Hieng a ka thlir kuol vel lai a ka lungril la tak chu Meghalaya khawpui Shillong le a’n angna bek bek hi anih. A boruok dei le zang dan inang chu thu hran nisien; a lampeng (galli) le in bawl dan kalhmang (style) khawm a’n ang hle’n ka hriet. A leilung (landscape) khawm tlangdung inkuol khum sung, hmun dam a khawpuite ve ve an ni leiin an inremkhawm dan khawm an ang kher el. Shillong a sulhnung lo neihai tading lem chun lunghlui suk leng vawng vawng thei ngei a tih ti chu ka ringhla hau nawh. Vadungte tui chak a sakhi a’nthuok hlawp hlawp ang a Shillong inhnikna le mawina beiseitu; san dang dang lei a Shillong hang inzin hman si lo India khawmuol phekpui tieng a chenghai tading chun Dehradun hi a dawnna hnai tak ni thei ngei a tih.

            Dar 6:30 a hung inri chun ka ruolpa khawm a tho a, a’n phi fai ve sawk sawk a breakfast fa dingin Rev. L.Roshyama hai sungkuo kan zu zawm a. Khaw varah ka zuk hmu chieng chun Pu LH Hrangchal leh an lo in ang khawpel a. Iengtin am a mi ngai ding khawm dawn lek lo in ka zuk indawn ve chawt anle ka ring ang hrimin unau an ni thu a mi hril a. Chuongchun, breakfast fak malam chun thupui hrang hrang hril kai in titi khawchang kan rem a. Joseph Pakhuongte khawm hi, kei ang tho, papui le titak deu a titi vel hi inhawk ve bek bek lo pawl ani a. Hi tuk ruok hin chu, mi dang a tawng ding um nghal lo chuh, bau sukzang fawm fahran in kan tawng ve mal mal a. Breakfast fak sung dai tawk chu hril ding kan dap dawk ve hram hram ni tak in ka hriet. Mi ka nel hma hin chu ka chungah that an insuo a an mi ngaisak po leh ka’n thlahrung ting a. Chu chu theida vieu si a ka mizie ka la thlak thei lo anih.

            Zing dar 9:30 in inkhawm kan tan a. A member um zat ngaituo chun inkhawm kan thahnem ve hle. North East Fellowship ti nisienkhawm Dehradun a North East mi po po an thang vawng chuong naw a. A member po po chu mi 80 bawr vel ni’n an in hril a. Chutaka 80% vel chu Hmar tawng hmang an nih. A naranin Hmartawng chu an hmang thei vawng tho. English, Hindi, Nepali le Malayali bakah Naga Fellowship khawm hi campus sungah tho hin an inkhawm tawl a. Chun, Lusei tawng hmang a tam lem chu Good Shepherd Church tieng an inkhawm bawk. Ramri khang hran ni naw sienkhawm hi Fellowship a thanghai tlangmi, tawng inhre paw bik hai po ti thei anih. Asanchu, chanvo changtuhai hrim hrim khawm khan an piengpui tawng chit an hmang a chu a buoi awm hmel khawm an um nawh. Tiel nuoiin kan inkhawm a chu mihriem ram takah khawm a’nhawina kawng tam tak a um in ka hriet. Inchuk ding tam tak um in ka hriet bawk. Ieng lei a Tuithaphai ruom sungah ringawt khawm inremna ding nek a inkhik inkhalna ding ngawt ei hmu el ta’m ning a ta? Ei mizat (population) pung hin a mi keihrang pei ning a ti? Ngaituona a suksei nuom kher el.

            Hi le inzawm hin Shillong a ka um lai ngei a thil inthlak pakhat a mi zuk in ngaituo kir tir vawng vawng chu tie! Kum 2004-2005 bawr vel chen khan khawtlang a sietni thatni ah tlangmitawng hrang hrang hmanghai YMA in a mi khum khawm a. Lusei nupui am ani, Vaiphei putar am ani a thi khawm a khawvar a tul leh kan khawvar a. A tul ang angin kan inbawisawm seng hlak. A tu tu khawm a ei hriet tlanglawn tak ani leiin hla ruok chu Luseitawng in kan sak a. Tawng dang hlahai khawm thlang awilo/sak thienglo a um chuong nawh. Inhawi ve tak anih. Amiruokchu, hun a hung inher pei a, ei (Hmar) hung tam deu deu a, hril a tam deu deu. ‘Hmar mi 20 le hnam dang mi 5 vel ei lengkhawm khawvar khawm a Lusei hla tho ei sak a’ ti dam a hung inri nak nak ta pei a. Thlanmuol hran ei la nei si naw lei khan boruok a hung pik deu deu a.

            Zuk rem el hmel a put ta naw leiin thuoituha’n mipui ko khawm in Evangelical Center, Madanrting a kan tlan khawm a. YMA a la kawp zing tha ti pawl a tam lem kha EFCI member an ni tawl a. A Hmar puol in thlanmuol la nei naw inla khawm EFCI chun hun sawt rei ta chu a hran in thlanmuol an lo nei tah a. Thil fe dan kha ngaibel thei a a umna chin a hung um pei lei khan, EFCI thlanmuol kha Hmar thlanmuol a inchang tir an inlau lei ang chau ni ding in mi dang in an lo ngai nawk a. Hi hma met a’nthawk hin Shillong sung a Mizo hnam huop a thuoitu ding in Hmar mi deu vawng thlang tling in an um a. An ni hma a lo thuoitu chu Luseitawng hmang deu vawng an ni hlak a. Kha lei khawm kha ni ta rawi naw nim; Hmar deu vawng an hung thlang tling kha a lang a chang in an dal naw a chu charge khawm inhlan sawng thei mumal lo in an lo um bawk. Rakhen Ruolcham Society hnuoi a mi thenkhat in ‘Shillong Hmarhai hi EFCI in an dominate bik taluo’ an ti lei a an buoi nak nak lai ang deu khan boruok a sosang ve hle. Kum 2005 chen a khawm khan EFCI mi le sa thina tuok sawngbawlna hunah vawi iemani zat chu Hmar tawng hmanghai chau kan inthawk a. Inthe tak tak ruok chu a la ni em nawh. Kum 2010 April thla lai a ka hang inzin ruok khan chu EFCI thlanmuol sirah Hmar thlanmuol a hran in a um ta ti ka ruolpa’n a mi hril a. A hran in ei um ta ni awm tak anih.

            Hi lei hin tlangmi, abikin zohnathlakhai hi eini tawk a ei inti tam tawk ta lei hin insuikhawm nekin ei indar deu deu pei am an ta ding maw! Chu’ng ani si chun, Dehradun a lungruol tak a North East mihai fuonkhawm a fellowship a nei dap dap dam te hih ieng chen am a dai ding maw! An hung tam deu pha an inthe ve el dim, ti dam ka ngaituo neu neu a. Kan inkhawm tin a Meitei nupui pakhat in a mi hung chibai a, “Kei chu Meitei ka na; ka pasal khawm Meitei tho anih. Ama chu Hmar tawng khawm a thiem chuong nawh. Kei chu ka chintet a’nthawk Hmar mi ka pawl rawn a” a hung ti zar zar dam chu ei ving vang el anih. Kohran Upa pakhat in, “Kei Upa Dongkhankhup ka nih. Hmar tawng hi ka hrietthiem tho a chu ka hmang thiem bek naw a. Paite ka nih” ti’n inkhawm tan hma’n a mi hung chibai bawk. Tulai khawvel a ei tawng phak zen zen ta lo lawmna rukte a mi pek in ka hriet a inhawi ka ti hle. An ni khawm a hieng a an la’n khawm dap dap te hih a hlutzie an hriet ngei chu ka ring.

            Rev. L.Rashyama Hrangchal in Pathien thucha a hril a. Isu Krista thi tawm tep a thil tlunghai a inthawk a ei nitin nun a hmang chi inchuk ding dangdai tak tak el a hung hril a ngaithlak a’nhawi hle. Joseph khawma inpakna hla pahni a sak bakah Pi Lalrokim khawm a phakhat a sak veh a. Inkhawm tin thingpui kan dawn zo chun chawm khat kan chawl hadam a. Chawhnung dar 1:30 in sunbu, Good Friday ruoi kan the a. Dar 3:30 pm in chawhnung inkhawm kan tan nawk nghal a. Hi hunah hin April 30 a PTS Graduation Day a graduate ta ding studenthai a’nthawk “Vicarious Atonement of Christ” ti thupui hmang in sharing tawite te kan ngaithlak a. Chubaka chun Joseph khawm, hla pathum sak nawk ding a ti nisienkhawm request a tam leiin, hla paruk lai a sak nawk a. Inhawi kan ti in kan hlim tlang dar dar hle. Ieng ni naw inla khawm an mi lo hlutsak khawpel a; zanbu le a zing a lunch fa ding chen khawm bufak a mi fiel an um deu sek a. A then lem chun an mi ko nuom a chu kan hun in a mi dai ta naw leiin kan fak hman ta naw anih.

            Kan return ticket kha April 23, 5:00 pm ani a. Sin hau hle hai sienkhawm an thuoituhai pahni hin rel sung chen hung lut in a mi hung inthla a. An tlin ka ti takzet. AC car coach a inthawl ham in kan hung kir a. Krista hnungzuituhai suol thlengfaina thisen luongna Kalvari tlang ringnaa a thar tak a fang zo hlimhai chu, Hinduhai suol thlengfaina tuipui Ganges a an insilna hlak, Haridwar a’nthawk chun a tel buluk in a mi hung chim ve nawk ta a. Amiruokchu, AC coach a khan chu inchimbuoi niei nuoi a um hran naw a, a zie um ta tho a. Zan dar 10:30 vel chun dam tak in New Delhi Station kan hung chuongkai nawk a. A vawikhatna a mipui pungkhawm a tlawm taluo lei a DHWA le HSA ha’n kan in bul a an lo khalbum Munirka Area hai inkhawm tin lai tak chu ka zuk nang char a. “In rawngbawlna chu iem a ang?” ti a innui deu tat tat a thenkhat in an mi lo indawn tawl chu lem thlak harsa deu sienkhawm ka’n hme pui tawk in ka hriet tho leiin “A’nhawi ie” ti’n ka dawn pei a. Hawphur lei a lungril rik lulh a ka suok san ka chengna room chikte chu hadam takin ka hung lut nawk thei ta hram anih.

(21-23 April, 2011, Dehradun/New Delhi)