EDITORIAL

DHPL-V Kha A Hlawtling Am?

            Ei inhnik tam ei inhnik naw tam, ei ngaisak tam ei ngaisak naw tm, ei thang hman tâm ei thang hman naw tâm; hun iemani chena inthawk khan ‘DHPL-V’, ‘(L) Fimlunghnem Memorial Trophy’ ti ni bawk, chuh sam rikin a um deu zing a. Chu chu inchûklaihai nipui châwl sûnga ei inunauna dâm, ei inthuruolna dâm sukzuolna ding le lan hre ngailo hai khawm ei inhmelhriet thar theina ding beisei a HSA Delhi’n football tournament a buotsai chuh a nih. Tukum hi hieng ang insukhlimna ei buotsai a tum ngana a lo ni ta bawk a nih. A buoipuitu pâwl chun tlin le tlin lo in an thei ang tâwk tâwkin an buoipui nasa ve êm êm a, an sâwl pui hle bawk a. Inkhêltuhai le a thlawptu mipui hai khawm an thang nasa a, an hlim pui ve êm êm bawk. An leh “DHPL-V kha a hlawtling am?” tiin zawna siem ta inla; ei dawnna chu iem ni tâng a ta?

            Zani khan ei zuk zo fel char chau a ni bawka a chunga ei zawna hi chuh ei dawn thei deu fur ring a um. Amiruokchu, ei dawnna chu inang naw fur mei a tih. Team pakhat chun hrat tak nina changin lawmmanin sumfai khawm insit um lo tâwk an dawnga, an tading chun a hlawtling ning a ti? A ni chuong kher dâl thei. Anleh final khawm kai phâk lo hai tadingin a hlawtling ning a ti? A ni el theia a ni dâl thei bawk. Thil ei huoihawt rêng rêng chun thiltum neia ei huoihawt a ni hlak. Chuleiin, ei thilthaw a hlawtling le hlawtling naw ei inkhina ding chun a thiltum ei hlen le hlen naw a inthawka inkhi ding a nih.

            Tukum DHPL a mak le awm rak lo a inlang chuh: eini sûnga insukhlimna le inunauna siemthatna dinga ei huoihawt ni siin ei thang nasat dan a danglam met ni’n anlang. Team hrang hrang hai inkarah inlang si lo a awmlo baksaka inerna a um lem hlau el! Ei organiser hai khawma an thei tâwk an suo lai zingin eini sûnga insukhlimna tho chuh inhrethiem tawn naw manim ti’n thu zâng takin an fe pui a. Amiruokchu, kilkhata inthawkin hrilsietna le hrilchierna a hung um zo leh kil danga inthawkin a hung um nâwk a. Chuong ang chun a kakhâwk a hung um nâwk pei a. Ei khawtlang nun darthlalang indik tak ni’n anlang. Thil hrim hrim a lukhawng tha nei zâwnga lo thlawp ta nekin, a varuom zui siin ei nuom dana a tui in luong tir ei tum seng a. Mani tanghmasiel takin thang ei khaw seng bawk a. A pawi takzet el. An mimal hlawkna ding um der lo a sâwl taka buoipuituhai khawm ei lei hmawr inthak tâtna’n ei hmang a. Ei khik sisaw a ni tak. Thil awm inti hre fe fe siin ei ngaituona khawlbing zie ei suklang lem chau a nih ti rêng ei hriet nawh. A pawi hle. Mani sengin sui kirin ngaituo nawn inla nuom a um takzet.

            Ei tournament kha dan tha famkimin lo inkhêl ni inla khawm a thiltum tak a ra suok chuong si naw chun iengtin am a hlawtling ti thei ei ta? “Tukum ei DHPL chuh a hlawtling khawpel ie” ti nuom hle inla khawm khêlmuol sung le a puotienga ei khawsak dan enin ei ti thei ta naw deu chu a nih. DHPL-VI dam ei lo nei thei nawk pal a ni ngai chun, mani hmazâwn senga a suk hlawtlingtu ei nih ti theinghil lo a ei tawng dan le khawsak danah ei fimkhur hle nuom a um takzet. HSA Delhi sûnga insukhlimna ah world class rules & regulation amani facility dam chên ve phâk in la chuh lawm um hlêng a tih. Amoiruokchu, chu kher ei lo chên phâk naw a ni khawma inhrethiem tawn le lungruol taka ei thiltum vawng tlata hma ei lâk seng a ni phawt chun iengtik lai khawm ei hlawsam ring a um nawh.