EDITORIAL

DHPL Day-II Thlirlêtna

            Delhi Hmar Premier League-V : (L) Fimlunghnem Memorial Trophy 2012 ni thumna chu zani July 28, Inringni khan DDA Sports Complex, Vasant Kunj a zo a lo ni nawk tah. Mipui pungkhawm khawm an thahnema anhawi rêk dup dup hle. Kar hmasa nêk khan mipui tlawm lem depa chuh nu le pa tieng pang an hung thawk tha angreng khawpel a.

Ei DHPL an suk phuisui hle a, lawm a um tak zet. HSA chun dâwr siem nawkin inkhêl en malama chên ding fâk le dâwn chi hrang hrang an zawr nâwk a. Nupui le naupang thenkhat lem kha chuh dâwr an rem fel hma a’nthawka singzu lo nghâk tawp pâwl khawm an um nawk niawm a nih.

            First match, Faith United v/s Khuplal FC, chu zantieng dar 5:00 a tan a ni a. Hi team hai hi final kaina chance nei ve ve an ni leiin inkhêl tan a ni chara inthawk theipatâwp suo in an thang nghal a. Inkhêltuhai nêk hmana puo tienga inthawka lo thlawptuhai thlarau chang ansâng lem am a ni ti ding khawp hiel in puo tieng khawm an tang tha hle a. Kâr hmasaka an goal thuntu tak Tv. Jonathan Pakhuongte a thang ta naw lei am a ni ding Faith United hai chuh ni dang angin an tha a tho tâwk naw deu khawm a ang. An inkhêl ruok chuh an inhne tâwk vêl tho a. Amiruokchu, minute 20 vel an inkhêl chun Tv. Lala Buhril in ralkânga inthawkin mawi takin a pêt lût zei el a. Chu hnung sâwt rak lo a chun Faith United hai Goalkeeper Tv. Stephen Vanramsang in Off-side pêt tuma hnuoia a sie thlâk chuh Khuplal FC striker Tv. Paul Hellienthang in a va pêt lût nâwk zawt el a. A’nkhêlhai khawm an buoi nak a, Referee Tv. DJ Varte khawm a buoi ve tho.

            Thil fe dân a hriet chieng naw leiin Referee chun a assistant Tv. Mawia Ruolngul chu a la va râwn tê teh a. Assistant Referee’n off-side a lâk a chuh Goalkeeper kutah ball a um ta leiin advantage an pêk kha a lo ni a. Amiruokchu, Faith United Goalkeeper chun advantage pêk an ni hmêl a lo hriet naw leiin ball chu hnuoiah a sie a lo ni a. Tha taka an inrâwn zo chun referee’n fare takin goal in a pêk ta a nih.

            Chuonga goal hni an bat chu thun kir ngêi tumin Faith United hai chun thei tâwp an hung suo nâwk a chuh first half a chuh an thun kir hman ta naw a. Second half a chun phûr takin an hung inbei zawm nâwk ta char char a. Amiruokchu, hun bituk a tâwp chenin goal an thun sap ta naw ve ve leiin Khuplal FC hai chun 2-0 in hratna an lo chang ta a nih. Hi taka an hratna hin August 4 a Habakuk FC le final inkhêl ding an ni ti a sukchieng ta a nih.

            Hun bituk neia inkhêl ei ni leiin sâwt riel lo in second match inkhêl ding Habakuk FC le Hmarthlipui FC hai chuh an hung tlân lut thep thep nâwk nghâl a. An tan chau ti ding chun Hmarthlipui FC striker Tv. Solomon Mihriemate chun goal khat an hung thun nghâl a. Amiruokchu, Habakuk FC striker Tv. Lalramlien khawma tâwite hnungah a hung thun kìr ve nghâl a. Second half an hung tan nâwk chun Tv. Solomon Mihriemate bawkin Hmarthlipui FC tadingin goal a hung thun nâwk a. Kha hnung kha chu Habakuk FC hai party a ni deu tak tah. Tv. Rochanlien a’nthawk goal hni le Tv. Mawia Ruolngul a’nthawk goal khat hmu belsa in 4-2 in hratna an lo chang nâwk ta a nih. Hi lei hin Habakuk FC hai chun DHPL a thil a um ngai lo, hne lo nei thak lovin league stage an zo pap a. Point an hmu insâng tak bawk a nih. DT chun a hratnawhai a tuorpui takzet a, a hrathai chu a lâwmpui hle ve thung. Final inkhêl ding hai pahni ditsakna ei inhlan ve ve a nih.

            DHPL-V league table chu a hnuoia ang hi a nih:-

TEAM                             PLAYED   WIN  LOSS    GOAL FOR   GOAL AGAINST      POINTS

Habakuk FC            3             3           0                  10                       5                               9

Khuplal FC              3             2           1                  5                        4                               6

Faith United            3             1           2                  4                        6                               3

Hmarthlipui FC      3             0           3                  4                        8                               0

FIXTURE : FINAL (4 August, 2012)

HABAKUK FC v/s KHUPLAL FC