MY-PAR-SO-NAL-I-TY?

-E.Ramngailien Lungtau

“Khovela ka hmangaitak’ hei ti ding um ve ta hai sien aw!” ka ti vóng vòng hun kha class-XI Rayburn College (New Lamka)a ka kai tan tir lai kha ni’n ka hriet. Tuhin teh, I nei an ta? ….tiin min dawn naw hram ro. Tlangval ei suk luck naw hlak…eh… ka ti suol ‘tlangval ei suklaklaw hlak’ an ti lem hlak kha. Kum tienga upa-ha’n an tawnhriet an hril changa an ti hlak

ang deu khan hei ti ve sên ei tih. Thado le Paite ralbuoi vanglai hun kha a nih. Ka metrik passik lawmna parthi khom la vuoi hman lo, ka metrik passik lawmna thingpui litre tamtak ka dît zo hai khom lan zun dok zo lo, chibai semna kut khom a la kham thuom ti ding lai boruok kha a nih. Kha boruok hìp kha chu a lo insang thei ngei ie! Laltuoklien ‘BBC London Airport’ an hawi ngei ie!!! Ti hla kha ka hriet dok rak chu tie!!! Kan veng (Muolvaiphei)-a ‘intelectual class’ laia thang phak ve tah ang el a inngaina khom chu zuk nei el thei ngai a lo nih. A’n ti hlak ang deu khan – ka lamlawn khom chun feet 5 hnuoi a hmu ta naw hrim hrim. (Kei le kei khom ka loin hmusa phak naw deu tina alo ni awm chu) Thirsakawr (Cycle)-in college chu ka kai hlak a, amiruokchu a hnunga kop ding- samsei pakhat khom ka la hmu zo ve naw ran. Ka Thirsakawr ka sir phak tha naw deu lei am a ni ding, ka ‘try pop’ ngam naw lei? Ngaituo tham tak a nih. P.U.C (Pre-university Course) an ti hlak kha la ni ran sien lem chu... khai! Nau thleirawl nei, Nupui ha’n ka fena an min dawn chang “voisun chu Pre-university class-ah ka fe a” hei ti deu kher hlak ka ti ka ring.

Chuongchun, class-XI ka hei kai tan ve dek dek a. Ka lekha tiem danah naupang tumru tak chu ka ni naw chieng hle, amiruokchu ka tum chu ka suksang ve ren hlak - a fashion a ni tlat chu tie! Amiruokchu, ka hril ang khan ‘ka hmangaitak’ hei ti ve ding chu ka Nu bak an la um naw ran el a. Metrik ka passik hma khan chu, hotu-hai thu awiin goodboy deuin ka um hlak. Ka ruolhai chun ‘love letter’ ziek an uor thei khop el. ‘Love Letter dynasty’ chun keiah ram a lak ngai naw a, a mi conquer naw reng bok. Thaw fuk lem chu kan ti bek noh. Asanchu, ka college kai hun lai ka zei naw pha hle el tah a, ruolhai hnung hnot ang deuin ka um ran hlak. Ruolha’n nunghak an try-thluk zo lohai ka chang ti ding um chuong hek lo khan, a hmel inthap deu le a de rak naw hai chau an mi hla el ta hlak a. A sa sa ruolha’n an hap lai a hmepok nuom le nuom loin ka hap el ta hlak a nih.  LRSanin a Dee Thuompui a sak khum “a sa sa kha fa la, ken a ru ru ret ka tih…” a ti chu kei-ah a lo tlung indik ran el an nawm.

Pawl - 11 le 12 ka kai lai chanchin hril ding a tam hle. Ngaizawng tienga ka flop-dan hai sitawri ramtin ziek ding a tam taluo ding. Amiruokchu, ka thil hril nuom tak a ni naw leiin hril sei ta dal ka ta. Tuta tuma ka hung ziek nuom tak chu - ka first LOVE, Ka ‘hmangai tak hmasatak’ (hei ti kher ei tih) sitawri a nih. Hmangai hmasatak ka hei ti kher nasan chu, hmangaitak ei ti khom hin a 1na, 2na, 3na, …… (hey! nunghak le tlangval hai to tokin lo sunzawn ve el ro…) an la um nawk rop hlak. First Love hi chu a lo thlum bik deu anih ti hre chieng thei tawka hun-le-ni hai lo hmang ve tah niin kan hriet. Ka first LOVE story hril cheu ka nuom….. chu hma chun tiemtu-hai kuomah ngenna pakhat siem hmasak ka nuom. Chu chu hi hih a nih. Hi ka thil hung ziek hai a hin ka parsonality tamtak ka hung ziek lang el thei a. Chun, hmangaina-dangdaitak thusep le fiemthu ramtin, inhme le inhmelo tak tak khom ka hung zepsa ding a ni leiin “My Par-so-nal-i-ty” tiin a thupui khom ka hung sie thuoi reng a ni a. Nang i thulo chun tiemlo dingin ka hung ngen hmasa mawl mawl che a nih. I mimal nuomna leia i tiem sunzawm ani ngot naw chun tiem sunzawm ta dal dingin ka hung ngen hmasa che. Asanchu, nal i ti naw sa’n Mâi par chu Rose par mawitak angin kan hmutir nuom naw che.

            Delhi khawpui ka hmu hmasatak hun kha May thla bul, kum 2002 ni’n ka hriet. Ka Pate Ditsak hai khom Vasant Vihar ground floor-a an um lai kha a nih. Mosie Thuoitulien khom naute lawmum lai tak a la nih. Hi tum hin kar khat chau um dinga insiem ka ni leiin Delhi tour khom fe hman ta loin ka um a. Munirka le JNU ruok chu ka fang hman hram. Ka u Ramnei a room Periyar Hostel, room no: 50 (groundfloor) ka hriet chieng hman tawk. Visant Vihar a nunghak pakhat inah Bible study le tongtai inkhawm kan nei kha chu ka la hrietchieng hle. Zirtawp zan thalai inkhawm khom voikhat ka thang hman. Kar khat chau um ni lang khom Delhi chu hmu tah inti ve êm èmin kan chukna hmun (Kerala) tieng pan chun ka kir nawk tah a nih. Delhi-a ka hung voihnina chu June 15, 2007 (Zirtawpni) a ni a. Tuta tum hi chu kar khat chau um ding ka ni hmel ta nawh. A ni ngei, Kum 2011 March thla a lo ni der ta a Mahipalpur, New Delhi hmunah vai in hluoin ka lan taihai ran chu a ni ta hih. Delhia hin voi thum kan sawn tah a. Ahmasatakin 223, Periyar (JNU)-ah ka um a. Chun, 36/A, Munirka Village ah kan sawn a. Tuhin Room no: 22, 16/K, Rangpuri Road, Mahipalpur ah ka um. Kum 4 vel deu thaw Delhi hmun dang dangah ka um tah a chu, JNU-a ka um lai baka hrietzing tlak hun ka la tawnhriet ngai noh. Hi hmuna hin annawm ka “First Love” story chu ziekin a um. ‘Ka hmangaitak’ ti ding ka  voikhat tong vena hmun ani tlat leiin ka hringnun a ding chun hrietzing tlak a tling tak zet. Hi hmangaina mak tak thusep hih anih DT-a hung ziek lang ka tum chu. Hei hril tan ei ti………..

Nupui le papui hai ta dingin pathienni fellowship inkhawm tin, thingpui dawn hun hi karkhat dei ti-ti sepna hun a ni hlak ang bokin nunghak le tlangval hai khomin gawp-na hun remchang-ah an lo hmang ve hlak. Delhi tlangval-hai mit la hlaktu chu - nunghak nal le thiem taka inchei, hmeltha bok hai hih an ni hlak. Pathienni inkhawm tin zâta ka thaw hlak angin DT chu ka sem mawl mawl nghal a. Thingpui hei dawn ve tang ka ti ie! tia usher hai thingpui ka hei hni ve chu ka lo chang ta naw zing kha ani a. Ganga dhaba a dawn el dinga inngaiin pawi ti bek lo khan ka red-pulsar 150cc bike tieng chu ka pan ta nghal a. Nitina ka thul ngai der naw chu zarda kuva fak hi anih. Munirka ah kuva chu ka zuk se sok sok a, 223 periyar (JNU) tieng chun ka tlan phei ta nghal a. Ganga dhaba a thingpui dawn dingin ka hei kawi lut tah a. Ka bike chu dhaba kuom taka chun ka suk chat a. Thungna dinga an rem lungtum ah chun kan thunga. Ka thingpui nghak dei malamin ka phone a snake game chu ka hei tawl nawk zot zot a. Dar 6 a pel met ta a. khuo khawm an thim tep, unau hmelhai an ti hun nek khan chu lan hma met dingin ka ring. Thingbuk hnuoia sap nunghak le vai tlangval, inhawi ti em em a laptop anin entawm khom chu fie deu in ka la zuk hmu thei a. An laptop hmang khom HP company ani nghe nghe. Ka lungrilin ramtin ka sungtuo a, lungril-ah suongtuona ka hei siem vel a. Chu suongtuona-hai chun ka lungril ruok em em chu ka sung bit zung zung ta pei a. Ka thingpui chu bau khat ka hei dawn a, lungrilin ‘Ganga Dhaba thingpui ma ma an hnik ie!’ ka ti a. Ngai bík nei ni chuong der loin khawsawt deu ang chun kan ngai el tah a. Chu’nga thingpui bau khat peia ka hei dawn mek lai chun simtieng anthok thli rim dangdai deu chun a mi hung mut hieu hieu a. Vai rimsie ani hmel chu! Vai nunghak pakhat, a zakkha rim le imami powder rim inkop ni rek naw nim ti a ka hei ngha kir chun vai nunghak reng ka hmu dâl el a.  Figar hei en khoma sawiselna ding umlo, nunghak ngo huntawk le hmeltha tak el chu ka zuk hmu thei a. Hi hun hi anih Rosy ka hmu phutna chuh. A ruol-hai (7 vel) leh chun ka tieng panin an hung a. An boruok tong a zâng a, an changchavei le an hmel hai a’nthok chun an hlim hle a nih ti khom chu hriet theiin a’nlang. Amiruokchu, a achangtu tak-Rosy chun a hmelah hlimna tehlem chau naw chu an langtir si noh. ‘Lungrila harsatna nei, hlimna san ding neilo- nghaknu a ni ngei awm soh’ ka ti lungril ta nghal a. Rosy hin taksa natna khom a nei ka zuk ring sa hiel a. A ruolhai lai chun a mawi bik a, ka khawsawtna chu thawk-le-khatin a lak bo thut ta a. Rosy sakhmel a inthok ka singmit lak son chu thil awl-ai a zuk ni ta dal el a.

An ruolcham chun Ganga Dhaba an hung tlung ta nghal a. A ruolhai chun hmel hriet an hau tawl. An ruolhai chun an hmingin an hung ko pei a, fak ding le dawn ding hnieng inhnarna naah chun an va thang ve pei el tah a. Ka kuom hnai an hung phak meu chun Rosy chu a khat baka ngir a lo ni zing el tah a. Ka lungril tak a chun ka hlim em em a. Ka kuomah hung inthung a ta, inngaizawng pui ngei ka ta. Innnei pui dingin laibung tir ka ta. Kan innei ni a Rosy a mofawm inhme dan ding… nau nei kan tah… kan nau pasalte ka pawm puma Rosy le kan inneina thlalak ka en pui dan ding chen ka lo ngaituo phak a. Vai film-a a nunghak le tlangval ngaituona khovel a an lam vel a; khovel ram po po an fang kuol hlak ang chu atak a thil um thei a lo ni zing an nawm. Ka mit ka zuk inkhap hlup chun Rosy chu ka bul taka chun a lo ngir ta zing a. Ka thingpui dawn lai chu kan thungna lung chunga chun ka sie a, thingpui no khat dang la sa ding chun ka fe nghal a. Ka hung kir chun ka thingpui chu Rosy chun a lo dawn vong tah ti chu ka zuk hriet thei a. Ehe…. Lunch a fak naw ning a tih, tiin ka thingpui hung chawi khawm chu ka pek nawk nghal a. Goodday biscuit khom chu ka peksa a. Thingpui a dawna, biscuit a fak zo chun a ruolhai chun ral anthok chun kut zaizirin an hung ko a. Iengkhom hril loin a mi fe san nawk nghal tah a. Biethu hril hman naw lang khom a chet dan le a mit meng chun a mi ngaina ve hle a nih ti chu ka zuk hriet thei a. Ka ‘confi’ ta khop el a. Kei khom ka bike ka sir hring nghal a, mak le lawm ti, hmabak nei inti deu chun 223, Periyar tieng ka tlan phei ta nghal a nih.

Dinner ka fak zo, dar 12 vel an ri chun zal hmun ka zuk rem tah a. Ka mit ka hei insiem hmiei hmiei chun Rosy hmel chu a hung inlang nawk pei a. In vat thei ta lo chun ka um a. Zingkar ka tho chun iengtik kara lo inam ka nih ti khom chu ka hriet thei ta naw a. Thawtanni zantieng a ni a; Munirka tieng kuva fak dingin ka suok a. Ka hung kir tieng chun Rosy ni awm tak chu a hnungtieng anthok ka zuk hmu a. Zani zana ka hmu nek khan chu a hmel a sie deu niin ka zuk hrieta, amiruokchu ka mita chun sente khat khom in a danglam chungin ka hriet nawh. A hnungtieng a’nthoka ka hmu chu ‘ka Rosy’ ngei chu a ni a. Munirka a ka zarda kuva fun chu hei khilai tum chun, ‘kha kuva I fak ding? I fak hlak?’ ka hei ti a. Rosy chun ‘kuva chu ka fak ngai le! Ka fak thei nawh’ tiin a mi dawn a. ‘Eh, ani? i fel de aw! i fak naw a.’ Ka hmai mawk ding veng deu chun ‘Thingpui chu ka dawn pei ran an nawm’ tiin nel deu chun a mi fiem ta nghal a. Hieng ang chance tha hi chu tu zonglai khomin ei bawpel ka ring bik nawh. Kan pahni chau kan ni ngei a. Kan thil hril nuom le kan ngaithlak nuom zawng khom a loin mil khop el!... hril sei ta dal ei tih. A poimaw tak chau hril ei ta, a dang po chu ei sensor ni el raw seh. Chungchun, “KAN NI TA A” hei ti’ng ei tih. Ngaizawng chu ka hei nei ve der chu an tah chu. Rosy chu ka ‘First Love’ lo niin ka hmangai bek bek el a. Ka hringnun a ding chun inchik tlak thil a lo ni tah. Hun le ni hai in her liem peiin kanin hmangaina khom chu an thuk deu deu a, pumkhata um hun ding ngaituona chun a mi thuoi nasa thei hle. Anachu, thil um theilo le tlung theilo ding a nih ti chu kan hriet ve ve. Rosy sung-le-kuo le kei ka tieng chun inmilna reng reng kan nei nawh. Kan khawsakna an ang ta nawh a. Kei chu lekha tiem dinga Delhi-a um ka ni a. Rosy ruok chu a carefree-a, a nuom nuom a thaw el hlak a. Ruol ngaina mi a ni ang hrimin ruol khomin an ngaina a. A mizie indik tak ni der loin mi tamtak mit hmu a chu nûngchang thalo le nunghak ler nina chu a hlaw zing zing hlak. Mi zaidam le nunnem, chapo ngai lo, thuhnuoirawl le thuawithei tak a nih ka Rosy hih ti chu a hretu an tam naw hle. Kum chenve kan inzui hnung, December thla chun veng tieng hang suok vak ka tum a. Thla 3 vel um dinga inbuotsai ka ni a. Kan inah Rosy hi thuoi chu ka nuom khop el a. Ka nu khomin a ngaina hle ka ring hlak. Ka bau chun hril dok naw lang khom ka lungril chun a nuom hlie hlie hlak a. Takram-ah inchang thei sien chu ka nuom thei hle. Fiemthu takin ‘Ka bag a hin ka pack sa el ding che’m a ni aw?’ dam ka ti hlak a. Rosy chun ka kuta hin a kut a hung bang a, iengkhom hril nei si lo hin, a khawsawt dan ding chu ri boin an zawt duot nawk hlak. A mi ngai vê hle ding a nih ti chu a mit menga chun a’nlang rong el. December a hung tlung a, ka fe ding ni (Dec-13) khom chu a hung tlung ta ngei a. Vangduoithlak takin hi zan hih Ganga Hostel Night a lo ni a. Rosy chu a ruol haiin ‘Barakhana’ (Ruoithe) dingin an hung fiel a. Hi zan hin Rosy leh kan inhmu ta der nawh. Zingkar dar 4 vel a airport tlung a ngai ding a ni leiin in loin ka meng khawvar zak a. Imu suok nawna dingin ‘Project I.G.I’ (Computer game) chu kan hnel char char a. Ka fe ding zan hin Rosy ka ngaina chu  a zuol bik rieu el a. Dittawk a fak le dawn ding a um awm a, Rosy chun a mi hrietfuk ta da’l awm de aw!?’ ti a ka ngaituo chun ka ring hma’n ka hnukin a mi ul tep a! Pa a lo intak tep annawm ie!!! Zing dar 3:30 an ri vel chun ka bag lien deu chu ka dar-ah kan bât a ka suok dawk tah a. Ganga Hostel chu gate bul a um a ni leiin ‘Rosy chu a ruolhai leh lampui-ah chibai hei buk malam thei ka ta’ ti lungril neiin gate tieng panin ka fe phei tah a. An umna zawn vel ka tlung chun ka hei ngha kuol vel a. Rosy hmel put reng ka hmu ta nawh. A ruolhai chu tuol zawl  lai chun ka hmu tawl a. ‘Rosy teh?’ ka hei ti chun. ‘Saw va soh’ tiin hlataka a khat baka lung chunga a lu a khup le khup kara thupa inthung Rosy chu ka zuk hmu thei a. ‘Ehe... veng ka suoksan ding leia lungngai ani ngei ta sawh’ tiin ka bag chu bus stand-a chun ka sie a, a kuom tieng chu ka va pan hnai ta a. A kuom ka hei tlung chun an hnik fut fut ri chu ka hriet thei a. ‘Ieng dinga khalai khan i khat chauin i tap el am a na?’ ti a hei kuo ka tum char chun ka lungril chu ngaituona dangin a mi hung thlak thut a. A kuomah ka va fe a, ka va thlem chun kei khom insum zo loin um pal ka ta; mi lai muolpho pal kan tih. Chun, auto ka la man fawm ding a ni si leiin inhnuk pal kan lau bok a. Ka hmangai lut lei chun ka kir lem tah a. Nakie ka lan sir ding a nih ti khom chu ka zuk hmu lawk nghal thei a. Hmangaina hin hlimna nekin lungngaina a choksuok lem an ta ie! ka ti vong vong el a nih.

Thla 2 hnung chun India khawpui, Delhi chu ka hung chuongkai nawk ta a. Ka nghakhla tak le ka thiltum hmasatak chu Rosy hmu a nih. Auto’n airport a inthok ka hung a, JNU gate kan hei tlan lut tan chun ka nervous ta hle a. ‘Ka Rosy chu lampui lai ka hmu el rawm’ tiin auto sunga inthok chun ka hei dak fan vel a. Sienkhom, ka hmangai chu hmu ding reng rengin a um der da’l a. A ruol pawl hlak hai khom tukhom ka hmu bok nawh. 223, Periyar ka hei lut a. Room kawtkhar ka hei hawng chun newspaper bill, internet bill le dâk pathum lai chu hnuoi ah chun a lo um tháng nang a. Ka bag si malam chun ka hei rut khawm a. Ka sawl deu leiin ka khuma ka hei zal ka ti chu ziengkar lungdawkin a mi keitho tawk a lo ni zing el tah. Hostel bul el a Godavari dhaba a chun breakfast fa dingin ka fe ta a. Puri subji le thingpui ka hei order nghal a. Kei ang tho a zîngtina hi dhaba a breakfast fa hi an tam thei a, ei nghak sung hin ei phingtam luotin ei phieng a lo sip chang a bo noh. Tuk dang ang tho chun ka thil order chu ka hei nghak fan fan a. Ral hla deu a’nthok chun Rosy ruol pawl hlak hai hung chu ka zuk hmu thei a. ‘Anni lai sawn ka Rosy chu a thang ve em naw ding maw?’ tiin ka hei en dawk dawk a. Sienkhom, ka hmangai hlimthla reng ka hmu noh. Ka kuom an hung hnai a, ka hmel an hei hmu vel char chun ka hriet theilo le hriet phak lo dingin an inberuk a: an tlan kir dai a. “A mak thei de aw” tiin ka khek dok thok pha tah a. “Bhaisaab, apka puri sabji aur Chai” tiin PyariLal (Hi hming hi 2008 khan ka ruolpa RB’n Godavari Dhaba-a thingpui semtu a phuok pek a nih). Vasant Vihar Wednesday market ei hril pha pha a ka lungil a hung um nghal hlak chu ‘Chhole Bature’ anih. Chun, JNU an hril chang chuh, tuta ka fak ding mek ‘Puri Subji’ hih a ni ka hrietsuok ve thung hlak. Ka hei fak tah a, thingpui khom chu ka hei dawn mawl mawl nghal pei a. ka thingpui ka dawn zo tep chun Rosy chu a ruolhai leh ka zuk hmu thut ta a. Ka ngir thot nghal a. Vai film ang deu a va tlan suok a, va kuo chot chu ka nuom hle a. Amiruokchu, vai hai lai muolpho kan lau leiin ka thaw ta em naw a. A ruolhai le chun ka tieng an hung pan pei a. Mit inkhap hre thei tawka inhnai a kan hei um meu chun, ka lungril chun “ka va hei hmangai che de aw! Rosy” a ti vong vong a. Anachu, thil danglam deu a um ti chu ka zuk hriet thei nghal el tah a. Rosy chun ka mit-ah a mi en ta dal el a. “Ehe!!! iem ana hi thil hih, ka hmangai chu iem i chang a?” ti a ka hei indawn khom chun a bau anthok saksuok ieng khom a nei ta da’l si. A nuom naw sa a a ruolhai in ka kuom a an hung thuoi ani ti khom chu ka zuk hriet thei nghal a. ‘Puri i fak ding?’ ka ti khom chun, iengkhom tong nei loin a lu a leia. Hnuoitieng a mi ngha pek tlat el tah a. Ka hmangai lakah hin iem thaw suol ka nei aw?. Voikhat chau mi hei en ta la’n? ti a ka hei ti ngong ngong phing chun a mi hung en tah a. A mit a chun ka Rosy kha ka hmu ta noh. Hmangaina mit ka hmu ta nawh. A mawi pangngai chun a la mawi kher el! Sienkhom, hmangaina mit a ni ta dal el si a. “Ka hmangaina kawltu kha i ni ta naw ie! tang dang i mi lo bel san an ta maw? tu’m ana i ngaizong thar chu? a hming bek i mi hril chu ka phu naw maw?” ti a ka hei indawn chun kan ring hman hma’n ka mitthli chu a lo far tuk tuk ran el tah a. Sawtnawte chun ka bieng chu tui a sawp ang elin a hu kim vong el tah a. Chu’nga kan um phing chun, Rosy chun inhmaw deu in a mi maksan nghal tah a. Nopuia inthok tui ei bunthlak ang el hin ka hmangaina chu bunthlakin a um niin ka zuk hriet thei a. Ka room ah ka zuk kai tung a, ngaituona tluong nei thei ta der loin sunni ka lo intawi khawthlai der el a lo nih.

Kar khat deu thaw Munirka hmu loin ka um el ding an tah, tiin Zarda Pan fak malamin Inrinni zantieng dar 6 vel chun ka suok dok a. Ka hung tlan phei peia, Ganga dhaba lai ka tlung chun ka speed ka suk dam deu a. Rosy le kan inhmu hmasatak zan dam kha ka ngaituo a, kan pahni chaua kan inthungna, lungtumhai khom chun an mi hrietpui ka ring. Lam ang hin hmangaina hi hung kir nawk thei sien, hlimte a kan chenna muol, hringmi hmangaina hin sawt dai naw sienkhom kei chun ka lungdumtu, ka lunghlu – ka Rosy chu chuoilo hmangaina parthi inhlan ka nuom hlie hlie. Hmangainain ka na ti chu ka motor gear khom chun a hiet awm ie! Ka Bike chu khaltu bo angin a thi top el a nih. Chu’nga Lampui sira bike hei sir hring ka tum lai tak chun, “Ei dam an naw? Rosy chanchin hril che ka nuom” tiin Rosy ruoltha tak, Engi chun a mi hung ti a. “ehe... (rawl hei khong pumin)... ka tha an nawm. Iem an tah le? Mi hril mawl tam!” tiin ka hei dawn nghal tah a. Engi chun thla 2 veng vong veng ka hang suok sunga Rosy chanchin po po chu a mi hril el tah a. Rosy chun ngaizawng dang a lo nei ngei el. Chu chau khom chu ni loin, pasal ruolcham 3 velin an hung leng vet hlak a. “Anni laia pakhat tak chuh a ngaizawng a ni el thei” a ti deu deu! Ka ring ang le ka hmangai Rosy mizie dinga ka ring phaklo vong chu a mi hril el tah a. “Chu’ng ani chun ngaizawng 3 a mi lo kop ran a ni?” tia ka hei indawn chun, “Nang chu intiemsa ta da’l roh. A thena che a sawt taluo tah. Iengkhom a la hril naw che maw? be nuom ta naw ni che. Chun, i hmel a hmu ngam khom ka ring ta bok noh. A hmelma lientak i ni lem der ta khom ka ring hiel. Chun, tuhin nau a pai – an rai der an tah. Tu nau tak am ani ti khom hriet a la ni nawh. Ama hlakin hre bok lo” tiin Engi chun thu um dan po po chu chieng deu in a mi hril vong tah a. Hirosima le Nagasiki atom bomb ngei chun ka lungril a deng dar vong tah a. Ka taksa bunghai chu a hung zoi vong nghal a. Darthlalang hei hnek kawi ding um sien chu ka hnek ngei ka ring. Hieng ang hun hih ka la tong ngailo a ni leiin hei inti sek a, pa deu a boruok hei siem chu ka thiem naw khop el! Ka mitthli chu a lo far tuk tuk ran chu a nih. Engi kuoma chun, “lawm a um eh! thuchienglem ei hriet tah a. Pathienin hma mi thuoi pei naw nim” tiin munirka tieng ka fe phei nghal tah a. Poi ti hle lang khom hmangaina chun iengkim ka hrietthiem tum tah a. Rosy nau pai chu ka nau chu a ni thei naw hul huol ti chu ka chieng a. A tha! Sap nau am ani ding, midum nau? huoi hah...!!!

Kuva fa ding chun Munirka tieng ka pan nawk nghal tah a. Ruol thenkhat in kuva dawr ah an mi hmu chu ball pet dingin an mi fiel a, ‘aw ni rawseh, hang insiem ka tih’ tiin JNU tieng ka tlan phei nawk nghal a. Hi ni, Hirosima le Nagasaki khawpui hai chung a thil tlung ang char a rapthlak, ka hringnun a ka tuok ni a inthok hun iemani chen a liem hnung chun, Rosy chu a nau nei ding a lo inhla ta hle el a....                                                             (Sunzawm Ding)