May 8th Lawrkhawm

@@ Zani, May 7, 3:30 pm khan HSA Executive Meeting Tv. William R.Darngon In, Mahipalpur ah nei anih. Hi huna hin area visit huna thurawn lakkhawm a umhai suizuina nei ani a. Delhi Thurawn, HSA I-card, HSA election, HSA Membership Fee, Delhi University Registration Help Desk le thil pawimaw dang danghai hriltlangna nei anih.

@@ HSA Delhi Jt. Hqrs. President sin chel lai mek Tv. James Pusing chu May 10, Thawlenni khin insung tieng tulna leiin Manipur tieng pan in Delhi suoksan a tih. Chanchin ei lo dawng pei dan chun a pa hriselna a that tawk naw lei a hang fe ding ni’n ei hriet a; pawi ei ti pui takzet. Tawngtaina’n lo hre zui pei ei tiu.

@@ Tuta kar liem ta khan CPO(SI) written, PET le Medical result a suok a, tu chen a ei hriet thei ah chu Tv. Jessai Shakum le DT Editorial Board member Tv. Lalhmunlien haiin hlawtlingna an la chang pei. Ei lawm pui takzet a; hmabak a Personal Interview khawm an hung hlawtling ngei ei beisei bawk. Tawngtaina’n lo san zawm pei ei tiu.

@@ Kum 28 liem ta a, Delhi Thurawn in tan tir lai a, Editor hmasa tak Upa Ruolkhumlien Buhril, IAS (1984 batch) chu Ministry of Labour, Govt. of India a Joint Secretary sinthaw ding in Delhi tieng a hung transfer ding thu ei lo dawng. June thla vel khin a sin a hung zawm hman beisei a nih. Lawm a um hle.

@@ Pu John Thanglur Darlong, IFS, tuta Bhutan a um mek chu Indian High Commissioner dinga a kaisang thu ei lo dawng. Ama hi South Africa ah posting ding a nih. Ei suong takzet.

@@ Lo fam ta Pu Buonglienkung in ICI Central Choir a’nrawi lai a member, an thuoitu’n muol a liemsan hnung a Blessed Choir ti hming chawi a rawngbawlna la sunzawm pei hai chun album thar an buoipui mek a. Recording an lo zo fel nawk der tah. Hi album a hin hla tieng a ei miril Pastor Thangngur kutsuok mawi tak tak a an sakhai chu thun khawm ani a. Tuhin video shooting nei mek a nih. An album hmasa kha copy 1000 chuong zet zawr suok ani a; eini lai a ding chun record a la ni hiel ring a um. Nghakhla a um ta takzet.

@@ Kum iemani zat Delhi le a se vel
lai EFCI hnuoi a Pathien rawngbawl a lo um tah Pastor Lallienmawi Buhril chu Pathien kona a dawng angin pawl bik um lo a Councelling Centre hawng a rawngbawlna thar a tan ding thu ei lo dawng. Hi rawngbawlna hi Tuithaphai lai a hang nei ding a insingsa ani leiin kar thar khin Delhi suoksan in Tuithaphai tieng an pan nghal ding ni’n thu ei dawng bawk. Malsawmna tam tak dawng a rawngbawlna a hang nei ngeina ding in ditsakna ei inhlan a nih.

@@ Pastor Lalditsak Inbuon le a nuhmei Pi Chonghoi Inbuon hai chu Shillong a EFI inkhawmpui hmang ding in vawituk khan Delhi an lo suok san tah.

@@ DU hnuoi a undergraduate student ha’n exam an tan tawl mek. Tawngtai pui nasa zuol sau ei tiu.