Editorial

Ei hriet seng ta ang in tulai hin Delhi University a inchuk mek Undergraduate studenthaiin exam an nei mek a. A then chu a lo zo tep tah khawm an um lai zing in a then ruok chu a tan ding mek dam an la ni bawk a. School of Open Learning hnuoi a Correspondence a inchuk mekhai khawm June thla vel khin an exam ding ni’n ei hriet a. A then chu University le Institution dang dang haia inchuk zawm beisei in course hrang hrang ah entrance exam an pek mek a;
an insingsa mup mup zing bawk. Chuleiin, a tu tu khawm ni inla, sin det la neilohai po chu exam buoi in ei buoi mup mup a, ‘exam season’ anih.

            Hieng ang hi ei tulai ngirhmun ani leiin mitin ei in suk bengvar thar nuom a um takzet. ‘Khawpui a um e’ ti lo chun tam tak hi ei zalen khawhlo a. Thil mawi le mawilo khawm dawnsak lo a dorap mei mei ching dam ei la um hi thil inzak um tak anih. Thaw ding tul le pawimaw dam ei nei a mi ina ei va leng zawk hai hi chu tukhawm ei insawisel nawh. Amiruokchu, a chawngpuha’n ieng ieng am thaw ding pawimaw an nei ti ngaichang lo a bautha a an mi biek sung phawt va pan ei tum el chun thil mawl tlak tak ni ngei a tih. ‘Keiin thaw ding pawimaw lawm lawm ka lo nei naw khawm a ka ruolha’n sin bangkhai tam tak an nei a; an ina ka va leng a, gawp ka thet a ka’n nui huou huou lai khan an sin tam tak kei a leiin a bahla thei anih’ ti hre kar a hun hmang seng dingin ei infiel anih. Mitin in mani sin inrim ra seng ei sik ding ani a; eini ei lo inrim pei bek naw khawm a midanghai daltu ni lo tum hram hram ding in ei in fiel nawn anih. 

            Inchuklai seng ei ni a, capital city a um ve thei ngat hai lem chu hieng ang thu te te lem hi chu in hril thar kher lo khawm a ei hrietsa ni mei a tih. Amiruokchu, nungchang le mizie inang lo tak tak, thenkhat invak dawt dawt, thenkhat khawsa bel buol, thenkhat um khak, thenkhat um thang mei mei, thenkhat chu khawsa khawm khawsa mumal lo dam ei ni tawl leiin ei hung tarlang thar anih. Exam pe mekhai le la hmasuon pei dinghai po po Lalpa’n mawlsawm cheu raw se.