BALLE BALLE PUNJAB - II

-Lalchungsiem Thlawngate

Camp: Sangrur. Punjab.

Date: 06.08.2006

Punjab ka fe phut ni, 19^th Dec’05 tûk khan Pastor Lalditsak Inbuonin Delhi ISBT chen ami van thlaa. Kha tuka ka lungril sawl dan chi hni hai kha (Pu Keivom ati dan ang deuin) memorya hin ala châm zing. Pakhatna. Punjab hi ka la fe ngai nawna hmun ania, a hmun le hmâng iengkhom ka la hriet nawh. Hang tlung lang iengtinam ka khawsa pei ding ti khom ka hriet nawa, an trong ka hriet naw bawk. Iengchen am ka um ding ti khom ka hriet naw leiin ka hmatieng chu ruopui vânawn sûr ding
ang elin inthim ngûkin ka hrieta, hêl thei ani si nawh. Kei ang pa ramsuok ngailohai ta ding chun huphur um ve tak chu anih. Pahnina. Kan nu le kum hni veng vong kan innei hnunga kan voikhat inthena ding ani bok. Bus-in Delhi ka hang suoksan meu chu mitthli thla êm naw sienkhom hnung tienga mi hnûktu kha chu anasa anih.

Punjab ka hang luta, ka ngaituona la peng hmasataktu chu phaizawl laia tui (cannal) hrat taka luong hum hum el chu anih. Thral lai tak ani si, mak khom ka ti hle. Hi tui hi Kashmir tlangrama inthoka an hung laklût, an ram sung popoa thlep tamin anin luongkawi tira, hmu nuom khom um tak anih. Churachandpura ei Tuithrapui tiet ding vêl hi ana, fîm takel, hang dawn el thei dinga thienghlim a nih. Hihin an leilet lohai popo hnesaw takin a chawm theia, kum khat sungin thlai voihni voithum an inthar thei pha hlak anih. Punjab hi India ram sunga chu lo thlai inthar suok rawnna tak ani leiin ‘Punjab
is the heart of India’ an lo ti hiel anih. Chuong anlo ti nasa khom chu hi tui lei hi niding ana ti dam ka hang ngaituo pei lem chun ennuom um hi ka ti em em el.

Ringlo tieng taka electric meivar chu a regular naw hle. Kum chanve neka sawt dai ka um taa chu nikhat khom electric thi thrak loa aum hi ka la hriet nawh. A thi sawt le tawi chu thukhat nisien, nitin chu ala thi zie anih. A lum hun lai tak May, June, July lem hin chu sûna popo electric um lovin a uma, zana chu thratakin a hung nawk si hlak. Sûnah electric aum ngainaw leiin office, dawr le intin deu thaw hin generator aum senga, ei hang suok chu an ri chur chur el hlak anih. A lum si, ningtel a um nuom khop el.

Nikhat chu ka land-lady kan dona, ienglei am ana hieng lawm lawma Punjaba electric a thra naw el hi, India rama State hausa tak ni bok sia? tiin kan dona, ama chun “Sûna chu leilet loa hai tui an pump hlak leiin khuo tienga electric popo an cut vong hlak anih” tiin ami hrila, a min hmin hne hle.

Ani ngei, loa hai tui pump lût naw hai sien chu thlai an inthar theinaw ding ana, thlai an inthar naw chun India ram hmun hran hrana Punjab Rice lo fa hlak tu haiin fak ding an neinaw ding alo nih. Chuonghaia chun Patpuihmun, tlangram kilkhawra ka sunghai khom an thrang ve sia, ti ka hung hriet suok chu ka har phut el. Punjab-ah electric a thia lum ka tuor zât hin indirect takin Patpuihmuna ka sûnghaiin bufai inhnik tak anlo fak theina dinga tuor ka ni ti kan hrietsuok chu olsam takin ka tuor thei tah. Electric umnaw leia lum tuor seng senga khom Delhi le Churachandpur laia tuor nek chun Punjaba tuor chu tuor man um tak anih.

Punjabihai hi mi hlim thei tak, eini ang boka fiem thawa, thil ho tete hrila innui huk huk an ching ve khop el. Music khom an ngaina, an car sungah khuongpui phur ang deua inri dut dut khom hi an ching hle. Sienkhom an thuhril nuom zawng le music an ngaithlak nuom zawng popo hi anni kalchar le inmil tieng ani deu vong. Western Music le Hindi film hlahai hi an ngai pei bek nawa, ‘ho re Punjabi balle balle’ ti tieng pang ei hang play pek chun chu an kutchal suk khiengin, an dâr an sukchâng zau zau nghal el hlak a nih. An mihausa le changkâng, kum tam foreigna lo um tahai khom hin Punjabi Music hi chu an khêl thei taktak nawh. Ngaisang an umna tak khom a chîntaka inthoka alientak chenin Punjabi Music hi an ngaina emem vong el hi a nih. Eini ruok chu a changkang inti deudeu hai hin ei hnam hlahai nekin Western Music ei ngaisanga, Vai ei hmusita, Hindustan poisa ruok chu ei dit vieu bok si. Mak tak chu ei nih. Punjabi Dhaba kher lem hi chu an heart-beat le khom an zom char ti thei a nih. Zantieng ni nêmah Dhaba hmun thawvengna deua inthrunga Patiala Peg le Tandoori Rooti le Chicken chuh eini rawiin Zokai thlifim dam tetea hung hrang del del ei thlakhla ang thoa an thlakhla ve a nih.

Hmun ka hmu phâkna china chu Punjab ram anga zu dawr tamna le a dawntu tamna hi ka la hmu ngai nawh. Zu an inchawka, a zorna dawr tuol step bul lai hin an zuk lir pop pop nghal el hlak a nih. Zu dawn hi suolah an ngai bêk nawa, ziel hawp le hmuom chi hmuom ruok chu thil thranaw vieuah an ngai thung. Zua inthoka sorkarin kum khat sûnga sum a hmu suok khom hi crore za tamtak chu ni hrim hrim atih. Khuo sung bazar hmunpui deu deuna hmuna chu meter 20 dan peia zu dawr aum ti thei ang ning atih.

June thla khan ka hotunu naupain nuhmei aneia, reception an thawna a chun ka va thrang ve a. A hmun chu Party Hall, compound lientak el a nei a, mi khom a keng tam hle. Gate ka zuk tlung chu security-pa chun “Veg or Non-Veg” tiin ami lo indona, kei chun safami kani le ninaw amin don ni dinga ka ngai leiin ‘Non-Veg’ ka zuk ti nghal bok. An leh hall sunga chun min luttir ta lovin a compounda plastic chair le table an daw thruopna tieng chu a mi kawkhmu ta lema. Ka zuk en chieng chun table zakhat vel ding bit mura lo ottuhai popo chun zu dawn puma Tandoori Chicken lo pet chût chût vong hi an lona, Hienga a honpui taka zu dawn hi ka la hmu ngai lo thil ani leiin raptlak ka ti hle. Mak ka ti em lei le a en vel hrim hrim khom chu inhoi ka ti leiin chaira khom chun inthung el ta lovin a compound sûnga chun kan vak kuol kan vak kuol ta lema. Isu Krista hun laia Kana khuoa inneina ruoithe ang êm chu ninaw sienkhom zu na nâ na kha chu a tam anih. Anachu hieng zu hai po po hi a bûr pakhat khom hlak ka hmu si naw leiin khawlaia inthoka hung suok zozai am ana ti chu ka ngaituona hluotu a nih.

Kan vâkkuol peia kil khat fountain umna hmun lai chun hmun chite dawsang fawm hi a uma, chu chunga chun mi pakhat a ngira, ama chu a nih, chuong zu popo hung semsuoktu chuh. A sinthaw tak chu waiter mi 20 velin tray sipin glass an hung chawi peia, chuong glass haia Royal Stag Whisky peg khat ding peia lo sung bit pei chu a nih. A sung dan khom chu a thiem phien el. A tlawm tawpah bottle 300 bek chu an sem zo ka ring. Tlangram pa ngaituona nawk thung chun, Punjabhai hi zu an lo va dawn nasa lawm lawm de aw ti le sum an va seng rawn awm de aw ti tieng ngot a lo ni ta rek. Khanganga nasa khan zuruoi an threa chu lo over deu leia ‘ârbu pêk’ khom an um thrak nawh, insukbuoi lem chu ‘ka ha seh’. Thra ve tak chu an nih.

An mak ve nawkna pakhat chu an motor khal hi a nih. An tlân chur chura, an inhman hun huna hin an chawl nawk thut hlak. Lam sîra motor fel taka hang park el theina ding hmun a um zing khomin anni remchang ang pei khan an park el anih. A hnunga hung hai khom khan ieng soisel chuong lovin an hêl el. kei ruok chun hang baw chor chor el hlak hi ka nuom chang a tam. Chun State Bus Transporta hai hrim hrim sorkarmi (police), senior citizen amani an lo chuong ani chun, transport authority-a inthoka an lâk ticket hran hi an neia, chutakachun an hming, designation le an fena ding chen hai fel taka ziekin conductor kuoma an pek hlak. Delhi lai anga ‘staff’ tia bus conductor hai hang râu el hlak kha a um ngai nawh. Chun complaint book an nei senga Transport Authority haiin ankhâttawkin an check pek zie hlak. Driver/Conductor-in trong a lo inthlada amani, i lung a suk awinaw ani chun ‘complaint book mi pe rawh, ka ziek ding anih’ ti la, ‘âr rîng rêk’ an hril ang el nîng an tih.

An mak ve nawkna pakhat chuh; mi chalâk, mani hmasiel emem vong ni hai sienkhom an ram hi an ngainain an hmangai senga, a ruola thil an thaw ding pha chu an inthuruol emem nawk thung. Eini le chu opposite char ei nih. Ei mimal senga ei che thei senga, a ruola thil ei rawt phapha chu ei châu nawk hle thung. Punjab hi thil thra po po kimna chu a ni bîk naw tawp el. A tlangpui thuin an chapoa, tlawmngaina an nei tlawm. Sum an du emem. Poisa thrang lo chun officea hai khom thil thaw theilo ang tluk anih. Inthamna, hlepruknain hmun a khuora. ‘Yeh Punjab hai, sap chalta hai’ tiin ani ding ang hrimin an ngai el anih. Mani office sung ngeia staff chanpuihai khom anin hla bîk nawh. Nâl dep bêk chu an ngiet vong anih. A buoitlak khop el.