Editorial

Mehrauli hi India rama ding khawmin khuo upa pawl tak, tienlai Muslim lal ropui haiin an lo hluo tan ta kha a nih. Hi lei hin tienlai lalhai kut hnung hmu ding iemani zat zet a la um. Eini rawiin ei va paw phakna chu a la sawt naw a, kum 2007 lai chau kha a la nih. Kum 2007, kumbul Februaty thla lai khan Pu Vanlahlir Pulamte in 3 bedroom flat tha deu el a va’n chawk a, a thla nawk Pu Dr. NI Singh Varte haiin 3 bedroom bawk an inchawk nawk a, anni hi tlangmi lai chu a um hmasatak an na, ei ta ding chun Mehrauli khuo sattu ti thei khawm an nih.

A hmun le hmang an hawi a, khawpui sung nisiin hmun dang nekin flat man a tlawm a, builders flat inchawk ding tamtak a um bawk. Vawisun chen a hin DHWA member ngawt khawm sungkuo 7 vel zet mani In nei an um tah. Tutak hin sungkuo 8 ei ni ta a, Mehrauli le inmat zing, Kishangarh le chu sungkuo 11 lai ei um tah. Tlangmi hnam dang, abikin Naga lem chu tamtak an um. Zirtawp zan hin vengbuk inkhawm nei hlak ani a, hi taka Chairman chu Pu Ginkhochinthang (9910180051) le Secretary chu Tv. Jared Vardinthar Varte (9999051735) hai an nih.

Munirka le khaikhin chun in hluo man a la tlawm a, 2 Bedrooms plus common room hi Rs.6000 – 8000 a hluo ding a um a, 1 Bedroom chu 3000 – 5000 in a lan hmu thei. An in bawldan hi Single room a um rak naw a, a umsun hai chu 2000 – 3500 vel a nih. Mehrauli a hin Bus Terminal pakhat a um a, road connection a tha em em. New Delhi, Old Delhi le Nizamuddin Rail Station hai, AIIMS, Saket, Noida tieng fe ding bus a tam a, minute tina hmu thei zing a nih. Chun Dwarka tienga fe Green Bus khawm a um. Metro khawmin a khuo sir lai a hraw bawk. Hi lei hin inlawn vel iengkhawm harsatna a um nawh.

Student lekha tiem nuom hai tading chun Mehrauli hi umna chi tak niin a’nlang. Connectivity a tha el bakah In hluo man a tlawm a, Nepnawi hmangruo hlak a kim. Hmeruo man hlak chu a tlawm. Munirka lai a Rs.15 man hai kha Rs.10 in a’nchawk thei a, a karchang lem chu Munirka hai inchawkna zatve chauin hmeruo inang char ei hme thei. Vasant Kunj, Vasant Vihar le Munirka lai Rickshaw a hmeruo le fruits an zawr hlak tamtak hi Mehrauli bazar a inthawk a an hung phur hlak  a nih.

‘A tlangpui thu in Mehrauli vaihai hi khuo dang vaihai nekin an tha lem deu am ani aw’ ka ti chang a tam. Nuhmei khat chaua inlawn tleirawl ruolin an en sui a, an lo nuisan vel hai ang kha a um ka la hriet nawh. Hi lei hin a hadam. Ei centre taka ei ngai Munirka hlak 10 minutes vel chauin ei zuk tlung thei nghal bawk. Vaihai le insel inhal zing zinga um nek khan inselna hmun puo deu a um hi a lo hadam khawp el.

            Amiruokchu Mehrauli hi vengbuk thatak chu a ni chuong nawh. Asanchu, vengbuk dang hai nekin Tui an hmu tlawm lem. Hi lei hin building tam tak chun Well an nei tawl a, an pump suok el. MCD tui hi nikhat kar danah hin vawikhat chau a put hlak leiin keini khawm kan um tir khan chu kan problem tak a nih. Sienkhawm thal tui kang lai tui ei hau hlak an ti ang deu khan kan hang um sawt deu deu a, tui sie thatna ding kan nei lien deu deu, tui kan hau deu deu. Tuhin chu ngaiin kan hung nei ta a, kan problem ta nawh. Hi lei hin In hluo ding hung zawng dam ei um a ni chun tui a tha le thanaw indawn ngei ngei ding a nih.

[Delhi khawpui sung a vengbuk hrang hranghai hi ieng ang ngirhmun a um am an na? Tuta ei chengnahai nekin ei inchukna/sinthawna a dingin a khawla’m convinient tak a ta? ti dam ei hlawkpui beisei in hi column hi ei hung bel thar anih. Vengbuk dang danghai la hung insuo pei ning a tih. Tuta tuma Mehrauli chanchin mi hung zieklang pektu Pu Lalchungsiem Thlawngate chungah ei lawm takzet.-Editor, DT]