BALLE BALLE PUNJAB - I

BALLE BALLE PUNJAB - I

-Lalchungsiem Thlawngate

Camp: Sangrur. Punjab.

Date: 06.08.2006

Punjab le Manipur hi India rama ding chun State hausatak le pasietak tia hril thei ding anni leiin an inang naw ding ti chu hrietsa anih. Sienkhom state puitling anni veve leiin le ka pieng, ka seilienna hmun le ka sinthawna hmun anni leiin an pahni hin ka khaikhin naw thei ngai nawh. An lien dan khom ânang nawa, Manipur le Nagaland belkhawm nek khomin Punjab hi alien lem dai anih. A hranin state capital a nei ve nawa, Chandigarh hi Haryana le hin an capital anga an nei ve ve anih. Chandigarh ruok chu UT ani nawk thunga, a mipui hai khomin Punjab amani Haryana ti chu an nuom naw veve.

Ka umna state veve ni sienkhom akip akawi chun ka hriet bîk nawa, mitdel sai hmu an hril ang deuin ka hriet sun sun hang hril ve lang. Punjab ka um tran tîra inthoka thra ka ti emem pakhat chu infepawna, inbiekpawna (communication) a olsam emem hi anih. Hileihin hmun dang danga umhai le khom an kâr a hnaia, inngainatna khom an nei thra lem niin an lang. Kan khuo Patpuihmuna inthok chun a State Capital, Imphala umhai hi iem an chang ti iengkhom kan hriet phâk ngai nawa, Patpuihmun mipui haiin ieng thil khom lo tuok pal inla, Imphal mipui hai chun an mi hung hriet phâk bîk nawh. Asanchu communication athra tawk naw leiin eiin ngainat ding ang khomin eiin ngaina theinaw a nih.

Punjab ram sunga khuopui le khuote hai po poah electric meivar a tlung vonga, motor lamlien thra ememin a hraw vong bok. Khawlai hmun khom nisien, darkar tlawmte sûnga tlung thei vong anih. Ka umna Sangrura inthokin Golden Temple umna Amritsar hi 215 Kms a hla ania, State Bus Transport-in darkar 6 lampui a nia, fare chu Rs.120 a nih. Sûn le zân iengtik huna khom bus aum zing hlak.

Hi nêka daia hnai lem, Churachandpura inthoka Patpuihmun chen fe ding chun tha le zung, sum le pai, hun thra tamtak seng inhuom a trul. I lo fe ding nisien, a hnaina tak lampui, Tipaimukh Roada hiengang hi ning atih. A hmasatakin State Bus Transport aum naw tihi hriet phot ding. Ni dang laia private bus service kar khata voikhat um hlak khom kha a ram ahim tanaw leiin aum ta ngai nawh. I vangnei vieu ani chun sumdawngmi hai truck, thla khata voikhat/hni fe hlak chu i tuok fu pal hlau el thei. An truck sipa thuomhnaw an remna chunga chuongin Rs.400/- vel kalman la pek belsa a ngai hlak. Lampuia zan hni zan thum rannung ang ela an riekpui hnung chein zantieng hnungah Taithu khuo tlung i ta, chutakachun mi inah i tlungna ding nang le nang i lan zong fawm ngai a tih. Taithu khuoa inthokin zingbu fak khopin i thuomhnawhai popo phurin inthoksuok nawk ita, I thuomhnaw kha nangin i phur zonaw ding ani chun i tlungna hai khan hlawfa ding zong pek thei hlak an ti che. Thuomhnaw phura hlawfa lâk hi mi pakhat peia 70/80 pek angai hlak. Nikhat veng vong lamsuk lamtung i hraw hrep hnungah Patpuihmun chu zantieng i tlung phâk cho ding anih.

Churachandpura inthoka Patpuihmun tlungna dingin lampuia fakman, riekman hai a tlawm tawpah Rs. 650/- vel i sêng ngai atih. Chu umzie chu fe tieng le hung kîr tieng Rs. 1300/- i sêng ding tina ani chu. Patpuihmunpa-in Churachandpur fena ding kalman mi loah hlothloin a van hlawsuok tum ding nisien, Cheng 1300/- a hlawsuokna dingin thlakhat a trul ding anih. (tulai hlothloa nikhat thahlaw chu Rs.50/- a nih).  Khom chu nitina inhlawna ding um lo ani nawka. Hang hril el nilovin a practical taka chu Patpuihmun le Churachandpur inkar chu hla tak a nih. Kong danga hril chun thlakhat lampui ani khom ei ti thei bawk. A sum sêng chu thukhat nisien, hi lampui hraw ding hin chu mani hringna ngei khom chân inhuom a trul a nih. A lampui inthluona hnam dangdang hai ramhnuoimi, helpawl chi hranhran hmun tin hmun tanga lo umhai hin an thaw ding hrietlo hin milo kâp thut pal an tih ti dam, ei thil nei sunsun hai dam milo la pek an tih tia inlâu taka um mol kha ani a sawl um chu. Huoisen a trul.

Tele-communication tieng hang thlîr nawk inla, India rama chu Punjab state hi phone rate tlawmna pawl tak alo ni nawk. A state sunga na na na chu khawlai hmun khom nisien local call vonga inbiek thei anih. Mobile phone khom nisien network pakhata lem chu minute khata 50 paise neka tlawm lem vong anih. Nikhat lai khan Reliance le Tata Indicom hai lem chun anni network sunga chu ‘Unlimited free calls and SMS’ an hung thaw (introduce) tran. Kei khom Airtel ka lak vea, Rs.51/- in extra recharge ka thaw boka Free SMS (Local and STD) le Airtel to Airtel STD call Rs.1/- per minute an mi pêk bok. An man char char a ni uo.

Free SMS ani bok leiin nitin hin India ram hmun hrang hranga ka ruolhai kuomah SMS hi voi zakhat neka tlawm lo ka thon suok zie hlak. A free na na na chu seng ding hlak um lo, inhawi ve tak chu a nih. Tu lem hin chu SMS hi ruol taka ka nei ani tah.

Patpuihmun bok hang hril nawk inla: Kum 2004 khan Honeymoon malamin Christmass hmang dingin kan fea, a romantic dân a dang bîk khop el. A rieu rieu aum. Kan khuoa khom telephone pakhat alo um ve taa, khuo mipuihai khomin an lo uongpui hle. Kei khomin ka lawm. Chuonga phone dam alo um ta chu tiin ka hang bêl chienga, an phone chu Aizawl tienga inthoka intercom an thaw hi alo na, a pulse rate le meter iengkim chu Aizawla inthoka an hung control vong hi a nih.

An bill siemdan hrietthiem theina dingin hieng hin entirna zuk la inla: Patpuihmuna inthokin a bieltu MLA Pu Chalton, State Capital Imphala um hi i lo biek tum ni ta sien, i sêng ding chu ‘Phone Hong Man Rs. 25/- plus call charges’ ning atih. Phone i thaw tuma, a receiver i phawikâng ta hrim hrim chun phone chu i hong tah tina ania, i bill chu Rs. 25/- a tling nghal tah ani chuh. Chuzoah Aizawla umhai kuoma chun MLA-pa number chu hril ita, hung dial pek ding chein i zuk ngên ding anih. An hung diala, line an hung hmu vak chun i vangnei nîng ata, an hmu intak deu chun lung hi ântar nuom sawt thei hle. A meter a lo fe zing ding ani sia. A tawpah an hung hmu ta ngeia, sienkhom MLA-pa alo um remchang naw lai tak ani nawk lem chun lunghnûr deuin phone receiver kha siethlâk naw thei an nawh. I siethlâk zo chun kha phonea inthok bok khan Aizawlhai chu a bill iengzam anih ti zuk indon anta, an hung hril zâtzât kha chu i pek ngeingei a ngai. A meter hlak i hmu phak si nawh. Iengkhom i hril thei naw, ava tam de aw ti naw chuh. A tlangpuiin minute thum/li sung inbiek hin Rs.40/50 vel sêng angai. Chuchu puitling nikhat hlaw suok zât ani chuh. Keikhom ka um sung khan Delhi voikhat ka hung phonea, Rs.200/- tling lo deu ka sêng. Chun hieng tienga inthok hin Patpuihmun ei biek ding nisien ‘A ko man’ an tia, ei biek hai khan voikhat inbiek peia Rs.10/- an lo pek pei angai bok. ‘Unlimited free calls and SMS’ ti le chu an ang ta naw ngei maw! Lalchungsiem of Patpuihmun hin nâ ka tih.

Phone chungchang thua nupui pakhat ka hohlim puinaa a thuhril chun ka lungril a tawk khop ela ka theinghil thei nawh. Hienghin a hrila: “Kan palien (a pasal a upa, Churachandpura um) hin nasatakin a mi hung thrangpui hlaka, ka nauhai popo khom amain school an kai tir vong anih. A damnawa, an rik vieu leiin telephonea inthok bêkin inbiekpui ka nuoma. Voikhat ka hang inbiekpui chu ka phone bill chu Rs.120/- zet alo tling. Sienkhom keiin Rs. 50/- chau ka nei si. Ka nei po chu ka pêka, a dang chu ni dang tienga pêk dingin ka ngên a. Kan palien khom chu kan biekpuia inthok ni 3 hnunga ami boral sana, umna kar a hla si leiin a ruong khom ka hmu phak ta naw a nih. A chunga lawmthu ka hril nuom khom ka hril zo hman naw hi poi ka ti a nih. Kan palien thî hnung chun phone bill Rs.70/- ka la bat chu a thungna dingin phone neitupa Aithîng bil thloah nikhat ka zun hlawa, ka hlawsuok zat chu Rs. 50/- a nia, thung zo hnenaw lang khom phone neitupa chun ami ditsak leiin cheng 20/- chu ami ngaidam a nih” tiin. A biek nuom takin a thisan hnunga, mi loa inhlawa phone bill bat thung chu thil inhawk um chu ani hmel naw khop el. A ngirhmun ding chu ei ngaituo zom dingah sie el inla athra awm ie.

A chunga ei hril ang khi voisun chena Patpuihmun khuoa umhai practical taka anla khawsak dan chu a nih. Ni dang nek khan chu nasatakin hma chu an sawn ta ngei el. Sienkhom state danghai le tekhin chun a lan hnuoi taluo. Lampui thrat naw chu thukhat nisien Manipur sunga na nâ na chu telephone dam hi local call anga thaw thei vong nisien, district hran hrana um hai le khom hin ei inlaichinna hi hnai sot sot ding ana. District tin hin telephone code hran ei nei senga, STD khera inbiek a tul dam hi sukbo thei nisien chu thil thra tak nîng a tih. District pakhat nisi, Imphal le Jiribam tak ngiel khom Local call naran anga an biek el theinaw hi thil buoitlak tak chu a nih.

Ei ram tieng khom mobile phone hung lûtin Private Company-hai khom an hung lut tran mek bok. North East hmun chite po bêk khi chu local call anga inthawtir dân lampui hi a um naw mani maw. Hang thaw thei inla chu eiin unau duok duok tawl el ding ani ti chu hrietsa ani sia.