LAWRKHAWM 6th November 2011

Ei Thuoitu Inzin Suok

Delhi HSA President Tv. James Pusing chu tulna dang dang leiin kar liem ta lai khan Tuithaphai, Manipur tieng panin a lo inzin suok tah. Ieng chen am a cham ding ti chuh ei hriet thei hri naw a nih.

Chun, tuta kar tawp tiengpang khin ei Public Relation Secretary Nk. Thlirnawnmawi Puruolte khawm an khuo Haflong tieng pana Delhi lo suok san ta dingin an buotsai mek. Ama lem hi chuh cham sawng ta dinga inthawk dawk tum niawmin ei palai chun a hril. Hi le inzawm hin HSA, Jt. Hqrs., Delhi chun vawizan hin an office 16/E, CPWD Colony, Vasant Vihar ah inthlana programme hmang an tum ni’n chanchin ei lo dawng bawk.

Vengbuk Beiruol A La Fe Pei

“I Ram Hung Tlung Rawse” ti thupui hmanga hun iemani chen a inthawka ei lo nei tah Vengbuk Beiruol chu tluong takin a la fe mek zing a. Zirtawpni zan le Inrinni khan Munirka Vengbuk ah nei a nih. Hi huna hin Rev. Neilaia Darlong le Rev. J.Thanglur haiin Pathien thucha hrilna an nei. Inkhawma thang hai inhawi an ti in an hlim tlang hle. Kar thar tieng pei khin Safdarjung le vengbuk dang dangah nei sunzawm pei ning a tih. Hi programme a thang ngei dinga lo inpuocha dingin mitin ei fiel thar a nih.

5^th NE Tamchon Tournament Hmang Zo

October 22 a tan lo ni tah 5^th North East Tamchon Football Tournament chu zani, November 5 khan ropui taka hmang zo a lo ni tah. Hi tournament a hin ei team Hmar United chun semi-final chen phakin FC UHNAI hai leh Third Place an inchu a, 4-1 in Hmar United chun hnena an lo chang ta a nih. Lawmmanin Bronze Medals, Certificates le 1 Lakh cash prize an dawng. Ei lawmpui takzet. Closing ceremony ah hnam lam chi hrang hrang hai inentir a ni bakah, abik taka fiel Shillong Chamber Choir hai khawm a mipui an inawi a, hmu nuom an umin na a tlai veng veng kher el! Final match chu Zeliangrong FC le Kangleicha Sanaroi Lup ha’n an inkhel a, additional time chen an khel zo hnung khawma 1-1 a an la’n hnetawk leiin Tie-breaker (Penalty shoot-out) pet a ni a. A tawpah chu KSL in 5^th NE Tamchon Trophy chu an lo lak ta a nih.

Pu Zohranglien Joute Ei Lo The Tah

DHWA member Nk. Lalhrietpui Joute pa, Pu Zohranglien Joute, kum 70 a upa, Thingkal a khawsa mek chu 4^th November khan Lamina Hospital, Hmarkhawlien ah damnawna leiin a mi lo boral san tah. Hi le inzawm hin November 4 zan ma, dar 10:00 pm khan Bethesda Social Service Centre, Mahipalpur ah ralna hunser hmang a nih. Lusun sungkuo hai ei sunpui takzet.