LAWRKHAWM 13 November 2011

Pasal Nei Thar

Zani November 12, 2011, Inrinni khan Nk. Laltanpui chun Sielmat, Churachandpur hmunah Pathien le kohranhai hrietpuiin damsunga dingin thenaw biethu an lo in tiem tah.

Ama hi ei hriet lar em em phir hlasakthiem ‘Biete Sisters’ a Puii Hmar kha a nih. Pasal tha tak el a hmu hi DT chun ei lawmpui takzet a, sungkuo hlim tak hung ni dingin ditsakna ei inhlan nghal bawk a nih.

Pasal Nei Ding Inthla

HSA Jt. Hqrs., Delhi a Public Relation Secretary ni lai mek Nk. Thlirnawnmawi Puruolte khawm November 11 zan khan an khuo Muolhoi, Haflong tieng panin Delhi a lo suok san tah. Chanchin ei dawng danin ama khawm hi December thla vela ‘Aw, ka’n tiem’ ti ve ta dinga inpuocha dinga suok a lo ni ve der el tah. Delhi lai khawm nisien, ei khawtlanga a thawk hlawk zie ei ngaituo in DT chun ei inpam hle a. Delhi Thurawn Editorial Board a khawm hun iemani chen a lo thang ve ta a nih. Malsawmna tam tak dawnga a hringkhuo sei mawl dingin ditsakna ei inhlan.

Hmar United Playerhai An Inlawi

Tukum Tamchon a Hmar United hminga inkhel dinga player incha a um hai khawm an khuo le tui tieng panin November 11 zan khan Delhi an lo suok san tah. Sum le pai beiseina lei ringawt ni lo a, ei hnam hming chawia theitawp suo a hi chen rama football inkhela hung hai hi ei suong takzet a. Hlawtlingna le vangneina insang lem changa hringnun hmang pei dingin ditsakna ei inhlan nawn a nih.

Damdawi Inenkawl Dinga Hung

Ei Thalai Chairman Tv. Jessai Shakum le Pu Lalkhawnvar hai pate, Pu Lalhrietthang Shakum chu a lung tiengpang infuk naw inenkawl dingin kar hmasak lai khan a naupa Tv. Lalhratthang Shakum leh Delhi an lo hung chuongkai a. An hung tlung ruol ruolin AIIMS panpui a ni a, operation khawm thaw zo a lo ni ta a. Tuhin Pu Lalkhawnvar hai in a inthawk an la’n enkawl sunzawm pei a nih. That tieng a pan pei a, a hung dam fel vat ei beisei. Tawngtaina’n lo san zawm pei ei tiu.

Kar thar Thalai Inkhawm Programme

Kar thar November 18, 2011 zan a Thalai Inkhawm programme ding chu hieng ang hi ning a tih:- Conductor-Tv. Roland Tuolor; Tantu-Nk. Laltharmawi; Special No.-Tv. Robullien; Sharing-Tv. Joseph Pakhuongte. Hi inkhawma hung thang ding hin mitin, abikin thalaihai kha, fiel ei nih.

Sikpui Sports Indoor Games

Tukum ei Sikpui Sports le inzawma vengbuk nrang hranga Carrom le Playing Cards inkhela um mek chu tluong takin a la fe pei a. Vawizan 8pm hin Munirka Area hai po Pu RH Hminglien Hmar a quarter, Sector-3, RK Puram ah inkhel nawk an tih. Hi le inzawma thuchieng lem hre nuom hai chun Tv. Lalneilien Inbuon le Tv. Phlegon Chiru contact thei ning an tih.