Lawrkhawm 22 July 2012

Tribal Hostela Um Thei

Dilshad Garden, East Delhi a um Nehru (Tribal) Hostel a um nuom hai tadingin July 25 chen khin hun a lan hawng.

A bik takin DU a inchuk dinga hung thar hai khan ngaiven vat vat chi a ni hmel. Admission Fee tlawmte ti bak chu sengna ding khawm um lo khawpa rent, fak le dawn hanawtna hlo ti hai chen a thlawnin an dawng vawng hlak niawm a nih. Hieng ang hamthatna hi a mi sawkzangkhaitu a hmang nachang hrie pei inla nuom a um.

Mithi Ralna Nei

Pu Thanghlun Hmar, IRS pa Pu Suma chu July 18, 2012 a Guwahati an pan pui mek lai Lanka (Mir bagan) an hung pel met lai a chatuon ram tieng a mi lo inlawi san tah.

Pu Thanghlun Hmar, Guwahati Hmar Welfare Association a Chairman ni lai mek, a pa ruong hnawta Guwahati pan chu hi zan hin Delhi a hung tlung a. Bethel Guest House, Dwarka ah sunpuina hun lo nei ni’n ei thu dawngna chun a hril. Lusun tuortuhai DT chun a sunpui takzet.

                                                                                                

HPC-D Chairman Delhi ah Man

HPC(D) Chairman Pu H Sangbera chu July 17 khan Imphal a inthawk Delhi pana a hung lai Mizoram Police le Delhi Police thangruolin IGI Airport, New Delhi ah an lo man. (Source: Facebook SinlengNews)

‘Chantawk’ Inchawk Thei Zing A Nih

Sinleng Ruolcham a inthawk lekhabu hmasatak Pu VL Renga Hriler-in a ziek ‘CHANTAWK’ (Sinleng Publication) ti chu nikum Delhi Sikpuiruoi khan release ni ta sienkhawm June thla bul khan Delhi a zawr suok tan a ni chau a. Hmun dang a lem chu tuhin thawn dar mek chau a nih. Family a tiem thei Love Story thienghlim le ngainuom um tak a nih. A lan chaw lo hai chun HCFD inkhawmna a Ushers hai kuoma inthawk inchawk thei zing a la nih.

Nunghak hmeltha le nungchang tha, Hmeithai nau Lalrozam @Zami chu insung khawsak a suk inhawi deu tak duoiin ti beiseina leiin Rengkai a inthawk Delhiah sinthaw dingin a hung a. Sin zawnga an vakvai lai le a sin thawna hmunah Vaihai le mitin mitang lak a inthawk harsatna le thlemna a hmasuon dan hai ngainuomum tak a ziek a nih. Nk. Zami thil tuok ang hi tulai Delhi a cheng haiin a taka ei tuok zing zing a ni el bak ah hi lekhabu a hmun le hmang hai hi phuokfawm um lo, a tak tak vawng a ni leiin tiem a suk hawi zuol.

Delhi khawsak dan hrie hnesaw ding rengin a ziektu Pu VL Renga Hriler hi eini Hmar nau lai chu inchuk zawm dinga Delhi lo bel hmasa pawl a ni a. JNU ah M.Phil. a zo hnungin Civil Service (UPSC) tlingin tuhin Ministry of Defence a Dy. Director sin chel lai a nih. Student a ni lai a inthawk HSA le Delhi Hmar Welfare Association ah nina hran hran lo chel ta hlak niin tu chen khawm hin DHWA a Asst. Secretary sin chel lai a nih. (Source: Facebook SinlengNews)

Mami Sinate Album A La Um

          Nk. Lalengvar @ Mami Sinate Music Video Album “Amen” ti kha a copy tlawmte inchawk theiin a la um a. A dit hai chun Tv. William Darngon kuoma inthawk cheng 150 chau a inchawk thei

 Sin a tinthawk kaisang

           Allahabad Bank a thawk Rose Vannunthar, (Pu Sumtho Hmar, Imphal a naunu) W/o Rofel Hmar, Diphu, tuta Kolkata a posting chu zani khan Manager (MMGS-II) a inthawk Senior Manager(MMGS-III) ah a promotion. Chu khawm chu Merit channel ngat a nih. Hmar nuhmei lai Nationalised Bank a Senior Manager kai hmasa tak a ni el dim ! (Pi Rose Vannunthar hi Pathien thu practical a nun pui hlak tu, mi bau tlai tak nisiin khawsak le changdan a inzaum tak el a nih. Lawmpui a um takzet. Thlalak le ngei hin a muk bik ka ti a, Pu Lalremthang Hmar a thil post ka hung post sawng a nih)