DHPL Day-II Thlirlêtna
Delhi
Hmar Premier League-V : (L) Fimlunghnem Memorial Trophy 2012 ni hnina chu zani
July 21, Inringni khan DDA Sports Complex, Vasant Kunj a zo a lo ni nawk tah.
Mipui
pungkhawm khawm an thahnem hle a,
anhawi rêk dup dup hle. Kar hmasa nêk hmana thlirtu mipui khawm an thahnem lema ngai a nih. HSA chun dâwr
siem nawkin inkhêl en malama chên ding fâk le dâwn chi hrang hrang an zawr nâwk
a. Fâk ding an zawr lai hin kuva a fe tak ni’n ei dâwr nghaktu nunghak hai chun
DT an hung inhriettir hlau.
Kâr
hmasak khan ei tan inhnu met
lei am a ni ding second match kha zo hman lo deuin zan thimin a mi nang hman a.
Zani ruok khan chu match hai inthim hma’n felfai takin ei zo hman ve ve a lâwm
a um khawpel. Organiser le official tieng khawm kâr hmasa nekin an zuon a zâng
ta a, hma ei sâwn pei ti hmu thei a nih. A nâwk tieng khawm hi nêka tha lemin ei la huoihawt pei thei ding
ni’n anlanga lâwm a um takzet.
First
match, Faith United v/s Hmarthlipui FC, chu zantieng dar 5:00 a tan a ni a. Hi team hai hi kâr hmasak
khan hnebanin an lo um ve ve ta leiin a hrat naw lem lem chu final kaina ding chance
an nei ta naw ding a ni bawka an bei nasa. A khaw tieng tieng khawm theitawp
takmeu suoin an thang nasa hle
a. First half po kha chu goal vàng vángin an hmang zo a ni deu tak. Amiruokchu,
Hmarthlipui a inthawka transfer thar Faith United striker Tv. Jonathan
Pakhuongte chun Hmarthlipui captain Tv. Damrawse Sinate hnunga goal sûnga chun
mawi mangkhêngin a pêt lût ta hlau el. Faith United fans hai khêk ri chu a nasa
kher el. Hmarthlipui ha’n nasa nâwk zuolin an hung hnenga chu first half
whistle anri chen chun an si bat an thun thei ta chuong naw a.
Second
half chu an hei tan nâwk ta a.
A thang khawm a na thet ti hmu thei khawpin anlang. Hmarthlipui
FC chun vawi iemani zât an zâwn thel
hnungin an defender Tv. Lalneinghet in mawi takin a hung thun ta el a leh. Hun
a tlawm ta si, hrat lem tumin a khing tieng khing tieng chun tha thara in tan thar ang hlawlin a hnung inhneng nâwk
et et el ta a. A khaw tieng tieng khawm a goal vàng váng deu zing a. Hun bituk
a tâwp tep chun Faith United tadingin Tv.
Jonathan Pakhuongte bawkin a hung thun nâwk ta hlau el a. Inhne tâwk hle hai
sienkhawm a tâwpah chuh Faith United in 2-1 in hratna a lo chang ta a nih.
Second
match, Habakuk FC v/s Khuplal FC, chu an hung tan
nâwk ta a. Anni hi kâr hmasaka hratna chang ta sa ve ve an ni a chuh hi match a hrat nâwk lem lem chuh
August 4 a final khêl dinga lût thei an ni leiin an thang
nasa hle. An inkhêl danah chuh an in hne tâwk hle. Amiruokchu, vawi iemani zât
an goal zâwn hai an hlawtling naw pei a. Puo tienga inthawka thlirtuhai khawm
an vawikhat zawi am an ta ti ding chun Habakuk FC striker Tv. Rochanlien chun
nal takin a hung thun ta a. Khuplal FC hai chuh lunghnuol el lovin an si bat
thung lêt ngei tumin an hung bei lêt ve char char a. Chuong lai zing chun Tv.
Rochanlien bawkin a hung sut goal nâwk zei el a. Hi gaol lei hin ‘sawi neu neu’
a um nuol a pawi ei ti takzet.
Assistant
Referee Tv. Samuel L.Khawbung in foul a lâk chu match Referee Tv. James
Milienropui ngaia chuh foul a loni naw ni ngei a tih. A lâk naw hlau el. Goal
an hung thun nâwk ta si leiin thlirtu mipui le Khuplal FC player hai a’nthawk sawisêl
a hlaw deu hlek ni’n anlang. An sawisêlna ngaituo chun Assistant Referee’n foul
la si a Referee’n a assistant decision a ngaisak naw chuh thil awmlo ni thei a
tih. Amiruokchu, Referee’n hmu sia a lâk naw chun a san a um a ni leiin a tu tu
khawma ei thlirna tukver ei inzau a tul
a. Tukhawm a famkim ei um naw leiin suksuol chuh um thei ngai a nih. Professional
hai hmana suksuol châng an nei chun eini lei lem chuh suksuol um nalawm a tih. Amiruokchu,
ei DHPL thiltum hre zinga hrat le hrat naw ringawt ni lo a inkhêlna a nina ang
taka ei hlim pui seng nuom a um takzet. A thapa
tak ei dit seng lai khawmin ei inkhêlna level in a la phâk naw leiin lungril
lien tak puta ei League sukhmasâwnna dinga thang
ei lak nâwk zuol sau nuom a um takzet.
Second
half an hung tan nâwk chun iemani chen chu Khuplal
FC ha’n an hnaw deu met ni’n anlang a. Tv. Lalramlien chun Habakuk FC tadinga a
goal thumna chuh a hung thun nâwk lem ta pei a. Hun bituk a tâwp tep chun Tv. Lala Buhrilin nal taluo
ringawt in Khuplal FC tadingin si khat a hung pêt lût a. Amiruokchu, goal dang
an thun sap ta chuong naw leiin a tâwpah chuh Habakuk FC ha’n 3-1 in hratna an
chang ta a. Hi hratna hin Habakuk FC hai chuh August 4 a final inkhêl dingin a
lo hlângkâi ta a nih. Anni hi tukum ei DHPL a final kâi chieng hmasa tak an ni
ta a nih.
Tuta
kar hung tlung ding 28 July khin vawikhat ve ve hratna lo chang tah Khuplal FC
le Faith United hai chuh first match a inkhêl an ta. Hi match a hrat lem lem le Habakuk FC hai chun August 4 ah
DHPL-V final an inkhêl ta ding a nih. Second match a ruok chuh final kai ta sa
Habakuk FC hai le final kâina chance nei ta lo Hmarthlipui FC hai inkhêl ve thung
an tih. Inkhêl zât hin inkhêltuhai thang
ana zuol sau a, thlawptu mipuihai rihau khawm ana tel pei bawk. Chuleiin, a tâwp
a hnai deu deu a anhawi deu deu ding khawm ni’n anlang. Lo ral thlir el ta lo
in a ni thumna chu a hmun ngeiah hung ena, DHPL-V fever hi hung intem ve dingin
tiemtuhai po po ka hung fiel thar cheu.
Tu
chena DHPL-V league table chu a hnuoia ang hi a nih:-
TEAM PLAYED
WIN LOSS
GOAL FOR GOAL AGAINST POINTS
Habakuk
FC 2 2 0 6 3 6
Faith
United 2 1 1 4 4 3
Khuplal
FC 2 1 1 3 4 3
Hmarthlipui
FC 2
0 2 2 4 0
faith untd hai hng che ro ei...kan lo tran cheu a ni....
ReplyDelete