PA..PA.. - Rev Van Lalnghakthang

           Naupang pasalte ka ni lai hriechiengtu hai chun ka pa ka ngaizie hi an la hril rawp hlak. PAPA ka ti fel thei hma a’nthawka, ka pa ko hi kan hawk tak ani leiin, “BABA’ ti’n ka ko hlak a.

Ka ṭawng fie thei hma a Pa ka kona kha ka ruolhaiin mi kona takin an hmang a, vawisun chen hin ka ruolṭha thenkhat lem chun ‘BABA’ ti’n an mi la ko zing. Kan zapui chuong nawh, PAPA ti kha inhawi ka ti a, ka pa ko kha kan zapui nawh a, ka la’n zapui naw zing a, la’n zapui naw pei bawk ka tih. Lydia M Child, U.S lekhaziektu pakhat chun ‘Rawl in no taka, Pa ti a kotu ding nei chuh mi vangnei anih’ alo ti hiel anih.

        Pa hai Ni hi kumzabi sawmhnina bul tieng a’nthawk ta khan khawvel rambung hran hranah an lo inser ṭan a. Pa hai Ni inser ṭan dan le inserna hmasatak thuah ngaidan tamtak um sienkhawm, Kristien hai in ei zui tlangpui deu chuh June chawlni vawithumna hi alo nih. Pa hai Ni hi June 19, 1910 khan Ms. Sonora Smart Dodd (Mrs. John B. Dodd ti a hriet) hmalakna in Spokane, Washingtonah inser ṭan alo nih. Ms Sonora pa William Jackson Smart (American Civil War Veteran ti a hriet lar) hin a nuhmeiin an nau 6na ding a neinaah, vangduoi thlâk takin a thisan thut el a. Nuhmei dang khawm nei ta chuong lovin naute sen ṭhangsain nau 6 zet ṭhatakin a enkawl puitling  vawng el chu a naunu Sonora chun ropui ati em em a. Kum1909 Nuhai Ni an hmang hun a, Anna Jarvis in a nu chawimawina a pek leia khawvel pumpuiin Nu hai ni a hung hmang ṭan dan thu Pastorin a hril chun Sonora lungril chuh nasatakin a tâwk hle ni ding ana,a nu um ta naw hnunga a pa’n hmangaitaka enkawla, an rimpuina le a sawlpuina hai a ngaituo chun a pa chawimawi nuomna lientak a hung nei ta peia,  inkhawm ṭin chun Pastor kuomah June 5 a pa piengchampha a, Pa hai Ni inser pui dingin rawtna ava siem a, amiruokchuh Pastor chun inbuotsaina ding hun a tawi em, ti’n, Sonora rawtna chuh pawimaw tak a ngaipek zingin, June 19, 1910 khan Pa hai Ni hmasatak chuh Spokane, Washingtonah inser alo ni tah. (Silver Anniversary Book on Father’s Day, Published in 1935)

            Papui ruol suksuol lientak ni a ka hriet chuh Nau in Nu cho a pawimawa ei ngaivet hi anih. Nau hin Pa hih an pawimaw hle anih ti hrie thar ei tiu. Clarence Budington Kelland chun, ‘Ka pa’n um dan ding a bau in ami hril ngai nawh, a nun in a mi’n chuktir hlak’ alo ti hi indik ka ti ngawt el. Pathienni tûkkhat chuh naupang pakhatin a pa inkhawm dingin a fiel a, a fiel pawp hlawl nawh. A naupa beidawng in ‘pa i hniekhnung ka hung zui ding anih’ a hang ti chun, hun sawtnawte hnungin a pa khawm a piengthar pha hiel anih. Pa hai, nau haiin ngai an nghawk tak chuh ei thaw lo, thaw dinga ei inchuktir hi anih. Pasal tamtak hin inza hlaw ei nuom a, nuhmei le nau hin ei thu ang ang zawm dingin ei beisei hlak hi ei insuksawl thlawn mei mei ka tih. Chun, Pa hai hih vengtu ei ni leiin, insung po po kha himtak le hadamtaka a um theina dinga vengtu ṭha ‘Pa’ ei ni a ṭul anih. Chubakah, Pa tling chun a nuhmei le a nau lungril le nuom zawng a hriet ding anih. Theodore Hesburh in “Pasalin a nauhai a thawpek thei pawimaw tak chuh annu a hmangaina hi anih’ ati angin in ti pa loin nuhmeihai hmangai ngawi ngawi ding ei na, Nauhai nêl zawnga um ding ei ni bawk anih.

             Nau le Nu hai khawmin, Pa ṭhatak Pathienin a mi pek leiin lawmthu hril rawp ding ei nih. Pa hai hadamna ding ṭawngbau ṭha insuo rawp ei ta, ei pa hai hi khawvel Pa po po a Pa ṭhatak an nih ti hi pawm hmin hmak ei tiu!!