Give and Pray For Sinlung Hills March

          Mizoram sawrkar chun 25th October, 2011 khan (Memo No. D.32020/24/2010-HMS dt. 21.11.2011) Mizoram a “Hmar Refugee” hai chu Mahatma Gandhi National Rural Employment Gurantee Act (MGNREGA) hnuoia Job Card pek lo ding tiin thusuok a siem a.

Chubakah, Mizoram sunga Hmar pem hai chu House Pass le Ram inhluo/nei tirlo ding; 2012 Electoral Roll Special Revision a khawm ziek lut lo ding tiin thusuok a siemsa bawk a.

Hi le inzawmin May 19, 2012 khan "Peaceful Protest Rally" nei ding ti a ni a; amiruokchu YMA haiin la hraw hri lo dingin an ngen leiin thul hri a nih. Ei lamhraw ding le inzawmin YMA haiin thu an nei ding ani naw lai zingin ei sum ngirhmun leh a lo intuoka a pawinaw lai zingin lung a khei hle. Anni mi khuopde ding a ni naw hrim hrim leiin, Mizoram sorkar thusuok ei ditnaw zie le ei pawmnaw zie tarlangna dingin lamhrawna chu nei ngei dinga ruohman le thutlukna siem a nih.

“Refugee” umzie khawm hreloa, ei hnam sirdena ding ringawta tawngkam an nei vet khawm hi an sim a tul tah. “Refugee” ti umzie chu international boundary pela raltlan hai hrilna a ni lem. Mizoram-a hin khawvel a um sung phawt chu Hmar hai “refugee” ni thei naw ni hai a; ni ngai bawk nawng an tih. Mimal le sungkuo inpem lut hai chu an ram le an inah an kir ani lem.

Hmar tawng hmang leia intuolvuokna le thisen suokna hmun Mizoram a hin, Hmarhai ngirhmun hang intar sawtzie hi hrilin a phak ta nawh. Mingohaiin midumhai an sirde ang hlawl an tah ti inla, ei uor taluo ni naw nih. Hmar hming chawia pawl indin hrim hrim le Hmar tawng ngai thei nawna le Hmar hminga hmalakna hrim hrim inlak hranna le insukbingna anga ngaina a tam. Hmar hai inlakbing niloin Mizo umzie hrelo hai mi lak hrang le mi ende leia hmusitna le endangna ei tuok ani lem. Village Council thenkhatin Hmar pemhai Birth Certificate an pek suok nuom naw leia naupang kum 8/9 khawm Nursery kai tan chauh an tam. India Danpui hnuoiah hieng anga hnam leia inthlier hranna le insawrdena hi phal a ni naw a, Kristien rama insalna ah lem chun thaw a thieng naw hrim hrim.

Hmarhai hin khaw lai hmuna khawm India Danpuiin a phal lo thil an hni ngai naw a, hni an tum ngai bawk nawh. Mizoram hluo hmasatu an ni ang hrimin, Mizoram a political movement an hung tan hlim lai khawma bul tantu pawimaw le a lusa pawl an ni a, thu le hla le sumdawngna tieng iengkima Mizoram le Mizo hnam indintu kut pawimaw an nih. Zo hnathlakhai insuikhawmna thuah a char khawmtu kut pawimaw an nih. Ram buoi laia an unau raltlanhai lo sawmdawltu kut pawimaw an ni bawk a; a hnungah anni laia thenkhatin harsatna an tuok leia Mizoram a chenghaiin an lo sawmdawl ve hi an tha bat an tlakna ve chauh a nih.

Zo hnathlakhai laia a tu hnam khawm hming inhmera inthlier hrangna suklang hi tuta ngir lai Mizoram sawrkar hi a ni a, thil pawi nasa tak a tawk a; Zo hnathlakhai insuikhawmna lampui daltu kut tirdakum a ni leiin, tu khawmin hieng ang thlierkar lungril paituhai hi ram le hnam hmangaitu neka vaw dartu an ni leiin, an thil thaw that naw zie hi dem a, hnawl a, khawvel hrieta an indik nawna hi puong dar a ttul tah.

Chu ding chun Hmar khawpui – Vairengte, Kolasib District-ah sawrkar thusuok ditum lo tak demna ding le hieng ang thil hi inpumkhatna lampui daltu a ni leia bansan dinga nawrna malamin ‘Peaceful Protest Rally’ nei dinga huoihawt a nih. Lam hraw dingin Sinlung Hills le Kolasib district-a khaw hrang hranga inthawkin ei thisen chanpui hai chu hung khawm an tih. Lam kar le lam thatnaw leiin sengso hi a suk tam ding a ni leiin tlawmngaina insangtak insuo a ei lo thang ve chu ei hunin a phut tah. Taksa le thang thei nawhai khawma ei thang thei seng dan chu mani ngam tawk sum thawlawm el bakah tawngtainaa lo san dinga ngen le inhriettir ei nih.

Nang khawm “SINLUNG HILLS MARCH” a ding hin i thei zat zat hung pe/thawlawm ve ding le lungril le titakzeta tawngtainaa lo san dinga ngen i nih. Sum thangpuina chu June 11, 2012 (Thawtanni) annawleh a hma ngeiin hung thaw thei la lawm um hleng a tih. Sum ngirhmunin a zir chun June 13, 2012 khin lamhrawna nei ding ti a nih; ngirhmunin a zir naw chun sawn hla met khawm tul a tih.

Hnam ta dinga in thawpui,

        Sd/-                                                                     Sd/-

(DAVID BUHRIL)                                      (LALREMLIEN NEITHAM)

Chairman                                                            Secretary

SINLUNG INDIGENOUS PEOPLES HUMAN RIGHTS ORGANISATION

truth, justice and peace

Sum thangpuina pe nuom hai chun a hnuoia hai kuoma hin pek thei a nih.

* IMPHAL: Dr. Immanuel Zarzosang Varte (Mobile: 09612655501)

* CHURACHANDPUR: Lalringum Pulamte (Mobile: 09856427340); Buonga (Mobile: 09856336403)

* SHILLONG: Simon L. Infimate (Mobile: 09436729100)

* GUWAHATI: Joseph V. Tuolor (Mobile: 07896419632, 09862339835)

* DELHI & OTHERS: Lalremlien Neitham (Mobile: 09582904655)