Editorial: Thang ruolin, lung ruolin

Tulaia ei hnam sunga ei chai luoi luoi le ei khûkpui nasa tak chu ‘HPC(D), YMA le Mizoram sawrkar’ ti hi ni ngei a tih. Ei ni Delhi khawtlanga um, Hmar nau hai ngei khawm a ral a inthawkin hi thu le inzawma chanchin tharhai ngaivenin ei nahai ei sit dêk zing a. Tulaia ding chun um bum le inhrawl khawm ni khuo a ei thu lum tak khawm ni mei a tih.

Hi thu le inzawma tulaia ei ngirhmun hi enin zawna tam tak um thei mei a tih. Sinlung Hills ngirhmun le inzawma buoinahai hi Hmar hnam pum huop zo ‘issue’ tling tak takah ei ngai a ni chun mipui le hnam sunga pawl hai hin ieng hmalakna am ei nei ta a? HPC(D) kutah ei sie ringawt el ding am a nih? Mizoram sung le puotienga um Hmarnau hin Sinlung Hills ADC hih puitling dinga dit a, hma lak ei nuom tak tak am? Ni danga ‘ram le hnam’ ti a ei so pui rak rak hlak boruokhai ang khan ei lungrilah ei invawi am?  Iengpokhawm ni sien, Sinlung Hills hi Hmarhai Jerusalem ni mek le la ni pei dinga ei bel a ni chun thanghar a hun takzet tah. Ei umna ram hi mipui ro relna ram a ni a. Mipui rawl neka hrat le thilthawthei lem a um nawh. Ieng pawl khawm ngirin, ieng silai khawm chawi inla mipui rawl le thlawpna thang der lo chun sawrkar na hi ver a harsa hle a nih. Tharum ringawt hmanga sawrkar nawr chu sawl tlawnna chau a ni thei tlat bawk. Sawrkar lukhaitu hai chuh mipuiin ei thlang tling MLA le MP hai hi an ni tlat leiin mipui rawl bawk hin thil a lo thaw thei ti hi ei hriet tlat nuom a um.
Mipuihai chun iengtinam inhnikin thlawp thei an ta? Sinlung Hills Autonomous District Council hi lo pieng ta sien Hmarhai hi ieng ram am mi peng a ta? Sinlung Hills sung le puo tienga um Hmarnau hai hin ieng hmasawnna am intêl suok ei ta? Hieng zawna hai dawntu ding chu tuhai am ni tang an ta? Hieng zawna hai hi mipui hriet dinga dawntu ding le mipui lungrila sielût theitu ding pawl le thuoitu tha ei pawimaw hle. Hi kawnga hin mitin ei thei ang senga hma la a, ei thangruol a pawimaw hle. Inrem taka um a, thukhat vuo tlat thei dingin ei thiltum-ah ei chieng a pawimaw hle bawk. 

Ei hnam damna dingin mipui le pawl, silai chawi pawl hai ngei khawm ei inthuruol a ṭul a nih. Chu ding chun ei thiltum hi pakhat – Hmar hnam damna ti a hin chieng tlang senga, ei theina zawn sengah, a chin a lien, a tam a tlawm hril lova thang ei lak a tul. Chu chun ei hnam hin lu inghatna ding a nei chau ding a nih ti hi hre thar nawk zuol seng inla nuom a um takzet. Thangruolin, lungruolin hnam tadin’ fêng ei tiu.

Hmar hnam dam sien, Hmar nauhai lien raw hai seh.