Editorial

Ram Le Hnam Tadinga Tawngtai

            Hun sawt rei ta anthawk khan Delhi tlânga chêng Hmar nauhai chun ei ram le hman invawina nasa tak el ei lo nei ta a.

Hi lai, India khawpui tak Delhi a sawrkar le private a sinthaw dinga lo thlangtla hmasa haia inthawk hrim khan hieng ang lungril hi ei intu sâwng pei khawm ni dingin ring a um. Ei thuoitu hmasa hai khawm kha sin dit um tak tak hai thaw in mani insûng inhawi takin lo khawsa thei hai sienkhawm, ei insiengna ram, ei chipuihai chêngna ram tieng an ngha pha pha lung a dam thei ngai thlawt naw chu ni ngei a tih. Khawvel nun zie le khawsak hmu le intem phak hai thlirna tukver a inthawka thlir le thingtlângpa’n tapte bul tukvera inthawka a thlirna chu an ang ta naw hi ni ngei bawk a tih.

            Chu taka inthawk pei chun, ram le hnam tadinga mani theina kawnga thei tâwpa thang lâk el khelah, ei khawtlâng run mektu suol thilthawtheina palai chi hrang hrang a’nthawka ei intâl suok theina dinga Pathien buon khawm chu an lo tan pei a. Ei Pastor Lalditsak in a hril dàn chun kum sawmpathum lai thlakip deuthaw in tawngtai khawvar in Pathien an lo buon hlak a. Hun iemani chen kha sunzawm ta lo angin a re vang vang a. Amiruokchu, hi hun sûng khawm hin thalai thenkhat hmalakna in tawngtaina hun chu a fe thei pei a; chu chu vawisun ni chen hin sukhringin a la um pei a nih.

            HSA thuoituhai chun ei tulai boruok enin Pathienah ngawt naw chuh beisei le inhnemna ding ei nei tâk naw zie an hmu thar a. June 1, Zirtâwpni zân khan “Ram Le Hnam Tadinga Tawngtai” khawvar chu an lo rawt ta a nih. Hi program buotsaina leinzawm hin thenkhat chun bau ei lo phawng sap sap hman rêk a. Ei ngâidân chu a iengpo khawm lo nisien, a rawttuhai le a tawngtaia thang ha’n a thiltum le a pawimaw zie an hriet phawt chun hi kawnga hma la dinga invawina neilo hai kha chu lo indâk naw in la a suolna um chuong dingin ring a um nawh. Mani remhriet dân senga ram le hnam invawina leia hma ei lâk hrim hrim chun lawmuma ngâi phawt el chi ni’n anlang.

            Hi zan hin pâwl hrang hrang hnuoia ei Ram le Hnam le khawtlang thuoituhai tadinga tawngtai a ni bakah ei chansietna le chanthatnahai khawm Pathien kuomah intlun thar na nei a nih. Assam, Manipur, Mizoram, Meghalaya le hmun hrang hranga ei ngirhmun hai hril tlangin, sipaite hai chungthu dam, politics, sakhuona le khawsakna kawnga ei ngirhmun hai a zau thei ang a thlirin a tul dân izir peiin tawngtaina nei a nih. Hi hi HSA tading khawma mellung pawimaw tak, inchik tlat tlak a tling hle. Hieng ang hun ei hmang pei theina dingin ei thuoituhai khawma hma hung la pei hai sien nuom a um takzet a. Pathien khawma malsawm ngei a tih ti chu ei beisei tlat a nih.

            “Aw Pathien kan pêk che, Kan ram lungmâwl intim hi;

            I var mawi chun hung suk var la, mal mi hung sâwm pêk raw aw.”

Kar Thupui

Dangchâr taphot hung unla, Tui hi hung dawn ro;

Poisa nei nawhai khomin, A thlawnin bu hung fa ro!