Inremna Hnot Ei Tiu - Lalsiemlien Pulamte

Ram hmasawn ding chun a sunga chêng mihriemhai lai inremna le inthuruolna a um phot a ṭul a. Ei hnam sunga ei politics khel, ei khawtlâng nun, ei vêngbuk le ei sungkuo haia hin inremnawna le inkhîk-inkhalna’n hmun a khuor nasa êm lei hin ei hnam hmasawnna dinga ei ṭhangruol ding nasa takin an dâl a.

Ei hnama inremnawna intluntu, a kaikuongpa chu ei ‘kohran pawl’ hi a nih ti inla inkhêl kher naw nih. Isu Krista hming ṭhangsana kohran pawl indin ni siin màni pàwl chauh lienna ding, hmasawnna ding, hmingṭhatna ding le ropuina ding zonga ṭhang ei lâk nasat tawl hlak lei hin unau laihrui inzom chen khom kohran khatah an inlawi naw chun inbe theilo le inhmu peilo rakin an hung um hlak. Inkhawmpui pakhatah hlimna a tlung a, nupui pakhatin “Kan hlim taluoa Isu a Isu kan hriet fuk nawh” a ti ang deuin Pathienah hring loa kohran pawlah ei hring taluo tawl tâk lei kuhin Isu a Isu ei hriet fuk tawl ta naw a ni awm ie. Chuleiin, ieng ang thlarauin am a mi chènchil a ni tah ding ti hi ngaituo tham a nih.

Thlarau rama malsawmnahai chàng ding khomin ei unauhai leh inrem a ṭul phot a nih. Sungkuo lai amanih nupa kâr khom inrem lo leia insêl rak hnungah ṭongṭai ieng ang inla khom Pathien Thlarau dong chu a thei naw ang tluk a nih. Mani unau, sungkuo, invêng le khawtlâng leh inrem si loa Pathien leh inrem êm êma ìnhril hih thil awi um lo a nih. Thlarau malsawmna ditum tak tak chang tlàk ding khomin eini tieng bêkah mi leh inrem a Pathien Thlarau zalên theina ding boruok siem a ṭul. Ei Baibul khomin inremna zong a hnot dingin a min fui a. Inremna siemtuhai chu an hamṭha, Pathien nauhai ti an la ni ding a ni si a (Mat 5:9). Chuongchun, inremna le insuksawt tuona thilhai chu theitawpin hnot ei tiu (Rom 14:19). Suol nghatsanin thil ṭha thaw ro, inremna zongin hnot pei ro (I Pet 3:11).

Pentikos nia Thlarau Thienghlim hung tlung ding khom khan ṭhuoihruoi le ringtu hmasa hai kha hmun khata umin an ṭongṭai ruol hlak a. Pentikos ni a hung tlung chun an rêngin hmun khatah an um khawm a nih ti ei hmuh. Thlarau Thienghlim sin thaw ding khom hin lungril hmun khata um hi a lo poimaw ve a nih. Pawl pakhata ei um hin chu lungril khom a lo inmilin a lo inthuruol thei khop el. A tam lem ei kohran pawlhai hi chu thuring inkal khom ei ni naw a, hmun khata um thèi ding chu ei ni tawl ie. Lungril thuhmun amanih pawl khata ei um tlâng thei naw hih thlarau suol ei la pai êm naw khoma inṭhe nuomna le inrem nuom nawna thlarau chu ei kol hrim hrim ning a tih. Chu chu Diabol lawm zawng tak a lo ni si a.

Kohran pawl innghirngona leia ei khawtlâng le ei hnamah inremnawna hung irsuok lei kuhin kohran pawl la um nawna hmun haia bek hin hi hri hi um naw thei sien ei nuom bêk bêk a nih. Chuleiin, vâiram khawpuia Hmar Christian Fellowshipa Pathien ei chawibiek tlàngna hmun haia hin ei rama kohran pawl hriin hmun hung khuor naw sien tiin Fellowship tin hi phuisui le puitling taka siem ei nuom a nih. Pawl dang huphur le theida leia hi thil hi rot ni loin hnam le khawtlâng inthuruolna ei vongṭhat nuom leia hi thurawn hi ei siem lem a nih. Chu lai zing chun kohran pawlin Fellowship umnahai hi an hung ner dêk dêk pei a ang a, hnam pumpui huop ṭangkaipui ding thil, inthuruolna ngaituo nêkin mani ṭânghma seng ei siel a hoi khop el. Chuleiin, vâiram khawpuia umhai hin nasa taka ei ṭhangtlâng a ei inthuruol a ngai a nih. Ei ṭhangtlâng dân ding pakhat chauh hei tarlang ei tih.

Hriin thlai a suksiet thei nawna dingin loneituin hieng ang hin ṭhang a lâk hlak a. A tîr chun thlai sukse theitu thilhring amanih natna hrikin a’n nghatna ding le a tlung-in (host) ding a hung zong phot a, chu taka inthok chun ṭhang hung lain thlaihai chu a hung suksiet pei hlak a nih. Chuleiin, loneitu chun chu thlaihrik tlung-in amanih a chongpu (host) chu lo inthiel faiin a lo sukrem hlak a nih. A chongpu ding a um naw chun thlai kha hria inthok a him hlak a nih. Ei taksa khom hi ieng leia natnain a hung bawm hlak am? Natna hrik hung pung le a hung huong intau theina dingin ei taksa ei vong thienghlim ngai naw a, natna hrikin hung ngamin taksa a hung sukchau ta hlak a nih. Chuong ang deu chun eini Delhia inngei diel diela hmun khata inkhawm tlâng hai hin kohran pawl hai ta dinga an chongpu le an tlung-inah insièm inphal nawng ei tiu. Chuonga hma ei lâk chun kohran inṭhe leia khawtlânga inremnawna le innghirngona hai hin Delhi-ah hmun an khuor thei naw ding a nih. Amiruokchu, innghirngona le inremnawna hri hung um thei a ni ti hre zing sia kohran pawlhai ei lo inruolṭhatpui a ni chun ṭhangthar la hung um pei ding hai ṭongse phur ni pal hlau rawi ei tih.

Delhi-a ei um dàn ṭhenkhat khat lei hin ei khawtlângah ‘pawl’ ramri a mi khang pêk met met hlak amani aw tiin ka ngaituo hlak a. HCFD hi thlaraua ei inenkolna le ei châk lâkna ni sia  sawm-a-pakhat le thilpêk dang hmun dangah pêk dai dàm hi kohranah ei hringzie suklangtu a ni el naw ding maw? Ei parent church-a member an ni leia mi ṭhenkhat ei ngainat bìkna lungril hai dàm, ei parent church pastor hmalâk theina dinga ser-le-sâng prokram hrang dai siem nuomna lungril dâm, kohran inkhawm pakhatah ṭhàng tah lei ela HCFD Pathienni inkhawm ngaitha amanih ṭhàng nuom naw hai dàm le thil dang dang hai hi ei khawtlâng inthuruolna suksetheitu an ni thei el naw ding maw? Hieng hai hi mani kohran pawl ta dinga ṭhahnemngaina ni sien khom ei hriet naw kârin ei khawtlângah lungrila inṭhena le insukbingna chi ei lo tu zing a nih ti hriet a ṭha awm de! Delhi tlângah kohran pawl khata inkhawm le biek-in pakhata inlawi ei ni si chun Delhi-a ei mi-le-sa hai laia ei rongbawlna chu HCFD hmingin thaw vong lem inla a ṭha ka ring chu tie. HFCD-a hin rongbawlna ding kot an hong lien a, tùta ei vêngbuk beiruol prokrama pastor ‘po poin’ rongbawla hma an hei làk tlàng dâm hin mipui lungril hmun khatah a m’in luong khawm tir a, a’n thang ri khom a mawi a nih.

Mimal thil leia inremnawna um chu hriet thiem khom a la um a, sienkhom Baibul thu thienghlim bèsana kohran pawl indina inngaia, mani pawl chauh ‘Pathien’ kohran bika ngaina leia khawtlâng le sungkuoah innghirngona le inremnawna hripui tùtu chu Pathien khomin a ngaithiem ring a um nawh. Chu leiin ei hnamin ṭhangmawbawka a nei hiel – ei kohran pawl chauh lienna dinga ṭhahnem ei ngai leia inremnawna le innghîrngona hri inleng ding boruok siemtu, a vaingamtu le a chawmlientu ni naw hram ei tiu. Ei ram tienga ei thawhlapui khi dittawk tâng ei tiu a, Delhi le vâirama umhai hin hi hripuihai hi ṭia invoi lo dingin insie kieng tum seng ei tiu. Inremna zongtu chun Pathien a suklawm a, hnam ta dinga damna intluntu le a tungdingtu a ni bok a nih.