CHANCHINTHA LEIA TUOR - Rev. Dr. H.M. Songate

“Ama in ring chau ni lovin, Ama leia in tuor khawm phal anih” Philippi-1:29

Jakarta World Prayer assembly (May 14-18) sung khan foreign delegate mi 4000 beisei an niha. Amiruokchu, mi 9000 neka tam kan fe khawma. A ram mihai leh nitin 10,000 khat neka tam kan inkhawm hlaka.

A ropuiin an hawi em em. Ṭawngṭaina hmun ahla leiin, mikhuol hai buoi nawna dingin Bus pakhat ah leader pakhat an sie senga. Hieng leader hai hi ṭhalai, naupang te te an nih. Keini bus a kan leader nu hming chu Mishella anih. Chinese Indonesian a ni a. Kum 21 mi, college student a nih. A sangpa class six inchuklai leh Pathien thu awi an na, a nu le pa ruok chu Chinese Budhist, khau tak el an nih. A sangpa pawl ruk (Std-6) mi chauin  a unu Pathien thu awina dingin ni 40 le zan 40 a rukin bu ngheiin alo ṭawngṭaia. Chu zar chun testimony ropuitak neiin Isu a hung ring thu bus kan chuong malam in a hrila. Anu le pa haiin nasa takin an suk rimsik dan, an hal dan le an sawisak dan a hril chun a ṭap taha. Chuphing chun, kei tak chu insum zo lovin bus sungah ka hung ṭap suok phut el a. Kan rengin (ramdang mi vawng kan nih) thlarau hmunkhatin ami hung pawla, kan ṭap seng ta a. Bus tlan zing pumin, Mishella chu kan chela kan ṭawngṭai khum mur mur taha. A college kaina car dam apa’n a zawr peka. Admission thawna ding a neinaw leia a ṭawngṭai dan hai dam a hrila. Mihaiin, naupang te a, ‘ama ring chau ni lova, ama leia an tuor dan’ ka hmu in ka na ta em ema. Ei ṭhalaihai inkhawm dingin an pei naw sasa in ei nawra. Anni chu an nu le pahai kut an tuor sasa in an inkhawm ṭal ṭal ka hmuin ka lungril a them em em. A bedroom ah bible a thupa. Lekha tiem hun ah a rukin bible a tiem hlak. Khawm chu, anu le pa in an khat tawkin an hung check hlak! An hringnun kha lungsiet an um em em. Eini rawi ringnaa inti hrat em em si, tuorna neilo ringtuhai ei ni zie dam ka hriet suoka. “Ama ring chau ni lovin, Ama leia tuor khawm phal ani”ti thu hin ami them deu zinga. Chu nia inthawk chun kan rengin Mishella chu kan hmangai ta hle el a. Sum le puon kan phal ang ang kan pek sup supa. Kei khawmin hi nu ta ding hin  ‘special prayer’ hun ka hmang hlaka, a nu le pa khawm Pathien thilthawtheina in a man ngei dingin ka ṭawngṭai hlak. AD 30a inthawk 2000 ringtuhai ngirhmun hieng ang hi anih:

·         AD 33 a inthawka mi pieng popo Maktaduoi 36,673;

·         AD 33a inthawka ringtua laklut popo Maktaduoi 12,105 (population popo ah 33% chau tina anih);

·         AD 33 a inthawka martyr chang popo 69,420,000 (martyr chang popo hi 0.8% chau an nih);

·         Kristien ṭhuoitu martyr chang po po chu 2% an kai

Ei ram kohran ka enin ’Isu hi ring chu ei ring a, lawm khawm ei lawm a, dit khawm ei dit a, amiruokchu, tuorpui ding ruok chun’ ei inphal tak tak nawh. A mawitawka zui le pawm, an hawitawka zui, ei nuom china zui, ei thiem chin le ei pei china zui hi ei la phak tawk a hawi. Ei ram kohran inpumpekna (commitment) hi a tlangpuiin remchangna china inpekna (Convenient commitment) ala ni deu tak. Chuchu Marka 10:17-25a tlangval hausapa ngirhmun kha anih. Ei inphal ang tawk chaua zui lova, Ama mi kona ang chena zui dinga insiem ei hun tah. Chuchu ringtu puitling nun pangai (normal Christian life) ani chau anih

Ka office thingpui inlumtu dinga ka lak nu hi nuhmeite kum 20 la tlinglo ana, Muslim convert anih. Ka staff Nepali haiin anu ringtu ah an mana, arukin a zui char chara. A pasal in a hriet phing leh nasatakin a vuok hlaka. Nau paruk an neia, a nauhai povin Pathien an ring phing leh a zamsan tawl ta anih. A testimony hieng ang hin mitthli tla pumin ahril “Bu fai 4 kg neka tam ka la hmu ngai nawh, tuhin chu Pathien zarin NEICORD  a ka um hnungin bufai a bag in ka hmu tah” tiin. Chu tuk chun mitthli suk thamral theilo iemani zat kan um! Tuhin tlawmte hlaw in ka sawra, zing 6 ah school kan kai tira, dar 9 ah a ṭina, dar 9.30 anthawk dar 5 chen office a kai pumin a sunghai a enkawl. Pathien an ring leiin nau fahra an ni pha anih. Lungsiet an um em em. A sanghai tution fee ding dam ka staff haiin an tum pek hlaka. A mobile handset ding chen an pek. Tuorna hi midang tading chau an nawha, eini rawi tading khawm ani ve. Isu ringtuhai ta dinga thil pawimaw ‘thuo li’ (four stages) hieng ang hin an hril hlak:

·         Chanchinṭha hriet le inchuk chau hi a huntawk nawh (Just to know and learn the Gospel is not enough)

·         Chanchinṭha puongdar hi a ṭha thova chu ahun tawk nawh (Just to preach the Gospel is not enough, though good)

·         Chanchinṭha hringpui hi a ṭha thova chu ahun tawk nawh (Just to live the gospel is not enough, though good)

·         Chanchinṭha leia tuor hi ani lem, ami kona chu (but to suffer for the sake of the gospel is what we are called for)

Ei kohran ṭawngṭaina subject hai khawm hi inzau deu a ṭha. Mani kohran chite sunga mihai hming ei lam ei lama, an thaw hriet khawp bek nilo. General takin ‘chuong hai sung ta dingin’ eita! Zuk ṭawngṭai pek ngaina khawm aum nawh. North Korea rama ringtu hai, missionary hai, Sudan rama Pastor le ringtuhai, Nigeria rama mihai, Laos hai, ei panthlang el Bhutan a ringtuhai dam an chanchin lak khawma ṭawngṭai ei ngai anih. Ei hmu tlawma, ei thlirna a zim bawk leiin ei zingkar ṭawngṭai inkhawm ramri hai hi a chin em em a, ami sukhrat zo nawha, mal sawmna khawm ei dawng sap thei naw anih. Ringtu ni leia tuor a ṭul hai khawm ei hriet phak naw anih

Eini rawi hi chu a chunga pali hai lai ei ṭhang ve naw a hawi. Chanchinṭha a lawma lawm dingin ei inchuktira. Lam dingin ei infuia, hlim hrim hrim dingin ei inchuktira, a thupek zawm le tuor tieng pang chu ei bawkan vawng. Mi sangtam takin an lo tuor in anlo thipui taha. Mi sang tamtakin nitin sukdudana le rinumna hrilsenglo an lo tuor taha. Vawisun ni chenin khawvel hmun hran hran ah, India ngei khawm ṭhangsain ringtu tiemsenglo haiin Chanchinṭha leiin an la tuor zing. Indonesia rama kan umlai khawm biekin iemani zat chu suksie pek  dingin an inṭhi zing. Ṭhalai le vanglai hai lekhathiem le la hung thiem mek dinghai kuomah thucha ka siem nuom. Company sin, private farm a sin le sawrkar sinhai zawngin in theitawp in suoa, lawm a um tho. Amiruokchu, Ama leia tuor ngam ve ding le a chang chang changpui ngam dingin, Lalpa grep huona sin thaw dinga inpe dingin ka fiel cheu anih. Lalpa thupek fielna zawmtu le zuitu ei tam po leh, ei ram, ei hnam le ei kohranin Pathien malsawmna danglam takin a dawng ding anih. Chuleiin, eini khawm, a thuo li na (fourth stage) ah hin ei hringnun khal ngam dinga thu tlukna siem a hun tah. “Ama leia tour khawm phal ani si a”. Amen