Voisun,
March ni 17, 2012 a inthok hin ka ṭong ngei hmangna chanchinbu, ka piengna
Manipur ram sunga ka hnam ṭonga
nitin suok chanchinbu umsun nia ka hriet ka dong ṭan a. Lungril a lawm hle a. Ka khuo
khom a suksawt hle el. Hieng ang chanchinbu hi a sawlpuitu an um ngei ding a
nih ti a chieng a. Tu tu'n am an sawlpui ti lem chu ka la hriet nawha chu hi
chanchinbu sawlpuitu po po hai chunga chun lawm naw thei kan nawh.
Hmasawnna
Thar hi'n a hming hung sukpuitling sien ti hai ka ngaituo a. ṭhangtharhai hmasawnna hmangruo, hnam inpumkhatna
hmangruo ṭangkai tak, hnam ṭong sukvultu le
sukhausatu, chanchin indik tak puongtu, inhrietpawna ṭha, hre lo hai
inhriettirtu, hmu tlat lo hai ta dinga inhmufietirtu, hmathlir nei lo hai
hmathlir fie tak petu, ṭhuoituhai mit
sukvartu, mi sukbengvartu, mawlna khur thima um hai ṭhuoisuoktu, inthima
inthok var inthluntu, khawvar mi inhmutirtu, ram hla taka inthok khoma ka Hmar
nunphung mi'n vong tlattirtu, ‘Ka ram ka piengna ram Hmar ram chu Isarel hai
Jerusalem anga ka Jerusalem a nih’ ti ka buoi ruoi ta hnung khoma mi
inhmufietir nawk hlaktu, chu chu ka ram ka taksa'n ṭulna leia a fesan chu
lungrila fesan ṭhak lo dinga mi khit
tlattu, chu ram ka hnam, hnam lai po pova ka hmangai tak hai lai ka taksa ngei
khawm la ṭhuoilut nawktu ni
tlat raw seh! a mi thlatuhai ṭawng,
ka ṭawng ngeia nitin suok
chanchinbu ‘Hmasawnna Thar’ hi. Kei khom ka theina muol a um chun a ta ding le
a damna ding hin ka’n pei zing. Mang ṭha le damin lo um rawh; ka hnam-ka ram
santu i ni kha. Ka thei ang angin kei khom hnam san tum ka ta. Ruolṭha ei ni chu. Tuta
inthok chu nitin ei inhmu ding an ta chu. Lungngai bok naw rawh. Hmar ka ni hi.
Aw
ka hnam, aw ka ram! Nghil ni i um thei nawh ie. Aw ka Hmar hnam, Aw ka
Hmar ram, Aw ka Jerusalem, ka theinghil che chun ...
Zuk
sak ka tih ie kawr le vai ram ṭawlah,
ka hla thunon hi:
“Babulon vadung
pangahai,
Chutaka chun kan ṭhung a;
A nih, kan ṭap hlak,
Zion kan ngaituoin.
Vadung laia
phahramhaia chun,
Kan ṭingṭanghai kan bang hlak
a.
“Zion hla pakhat mi sakpek ro,” tiin,
Chutaka chun sala mi ṭhuoituhaiin hlasak
dingin an mi phut a:
A mi sukrimsituhaiin hlim dingin an mi
phut bawk hlak sih a.
Mi ramahai chun LALPA
hla iengtin am sak thei kan tih a?
Aw Jerusalem, Ka theinghil che chun,
Ka kut changtieng hin a thil thiem hi
theinghil ve raw se.
Ka hriet zing naw che chun,
Ka lei hi ka dangah kawp tlat raw se;
Ka hlimna tak neka Jerusalem ka dit lem
naw chun.
Aw LALPA, Jerusalem
ni chu Edom thlahai chungah a se tiengin hre zing rawh:
“A lungphum chen
khawmin,
Sukchim ro, sukchim
ro,”
Tituhai kha.
Aw Babulon naunu, sukbohmanga um ding,
Kan chunga i thaw anga,
Thung ding che chu
lawm takin um a tih.
I nau le tehai lakpek cheh a,
Lungpui vuoknaa hmangtu ding chu,
Lawm takin um a tih.” (Psalms 137,
Bible Society of India phek 747)
Aw
ka thla, inpuongsuok raw khai.
Aw
ka taksa, lo inring bok raw khai.
Aw
ka thla le ka taksa, inruolrem takin la zuk sak nawn ro khai;
In
hla a ni tlat si a.
“
… Aw Jerusalem, ka theinghil che chun,
Ka
kut changtieng hin a thil thiem hi theinghil ve raw se.
Ka
hriet zing naw che chun,
Ka
lei hi ka dangah kawp tlat raw se;
Ka
hlimna tak neka Jerusalem ka dit lem naw chun … ”
Aw
ka ram, Aw ka hnam, ka Jerusalem chu nang ngei hi I lo nih.
Aw
ka Jerusalem, i pila siem ka ni tlat leiin i pilah kir nawk mol ka nuom.
Chu
ni ngei chun mi keihnoktu po po a’nthawk zalen ta’ng ka ta.
Chu
Jerusalem pila inthok ngei chun Jerusalem thar tieng pan ka tih.
Chuong
chu i chieng si chun, Aw ka thla, har la, hlimin um rawh.
Chu
chiengna chu hlimpui la
I
lengna thlalera ruok hin chu innuina hmu kher nawng i tih.
Ningintelna
khawvel, lawmna kim thei nawna ram,
Beisei-beidawng-beisei-beidawng
khawvela khom hin,
Lungaina
rama khom hlim la,
Beidong
nia khom beisei tlat la, hlim bok rawh.
Jerusalem
mi i ni khah.
I
thisen kha Jerusalem thisen a ni kha.
Chuleichun,
aw ka thla, inpuongsuok pei raw khai.
Aw
nang ka taksa, ka hla khu sak ta u’m; ka thla le hin inruolrem takin.
A
key huntawk var takin hmusuok hieu bok ro khai:
Aw ka Jerusalem, nang
a inthawka suok ka ni tlat leiin i mi ka nih.
Aw Jerusalem, ka peingna i ni tlat
leiin i mi indik tak ka nih.
Aw Jerusalem, Jerusalem le Jerusalem
kara pieng ka nih hi.
Aw Jerusalem, nanga
pieng ka ni tlat leiin i mi le sa, i sula inthoka suok, i nau ka ni hi.
Aw Jerusalem, ram po po nekin mawi ka
ti che.
Aw Jerusalem, i rama
inchuk kani leiin ka thiemna ka varna hi i ta a ni hi.
Aw Jerusalem, ka hrietna hmanga ka
uiretsan che chun i law law mi law rawh khai
Aw Jerusalem, ṭong dang po po nekin,
kei chun i ṭong ka ngaina lem.
Aw Jerusalem, tlang dang po po nekin
kei chun i tlang ka ngaina lem.
Aw Jerusalem, i tlang
thienghlima inthok mol chun khawvel hi thlir ka tih
Aw Jerusalem, i tlang
thienghlima inthok chun inkhi bawk ka tih.
Aw Jerusalem, i
pilhanga inthoka Khuonu malsawmna faa seilien ka ni hi.
Aw Jerusalem, siktui
ka nia inthoka i zar ka zo hi puong seng naw’ng ka tih.
Aw Jerusalem, ka kuta
thil thiem hi ka ta a ni nawh a, i ta a ni tlat lem.
Aw Jerusalem, ka theinghil che chun ka
kut changtieng hin a thil thiem hi theinghil ve raw se.
Aw Jerusalem, ka
hrietzing naw che chun ka lei hi ka dangah kop tlat raw se;
Aw Jerusalem, hming dang po po nekin i
hming a mawi ka ti lem
Aw Jerusalem, phung dang po po nekin i
nunphung a mawi ka ti lem.
Aw Jerusalem, nanga
inthoka suok hlahai chu i hla an nih.
Aw a mawi ka tih, i hlahai chu.
Aw sak pei ka tih i
hlahai chu.
Aw Jerusalem, nanga
inthoka suok thuhai chu i thu an nih.
Aw mi hril pei rawh, chuong thuhai chu.
Aw Jerusalem, i tlangkhuo chu ka suokna
a nih.
Aw Jerusalem, i
ringna chu pom tlat ka tih.
Aw Jerusalem, chu pomna
chun himna mi pe ngei a tih, chatuon chenin.
Aw an hnik ka tih i fak
le dawn hai chu.
Aw a mawi ka tih i
sil le bil puonhai chu.
Aw a thlum ka tih, i
tui ngei chu.
Aw a mawi vong ka
tih, nanga suok hrim hrim chu.
Aw Jerusalem, nghil
ni i um nawh ie!
Khuonu zar zo pei la,
A malsawm tlak i ni tlat leiin.
Aw khawvel, mi lo chokbuoi
naw ta khai.
Aw ka tisa, mitenum
pa, nang khom chintawk lo hre raw khai.
Jerusalem nau ka ni hi.
Aw kor le vai hai,
nangni khom lo to chip phot ro khai.
Aw sappui run
remtuhai, sukhmu lo ding mi sukhmu naw ro khai.
Ka thi el ding a nih.
Ka thi chun Jerusalem iem chang a ta?
Chu chu in uksak ta awm si nawh a.
Ka Jerusalem thi ni
chun in ṭap ve awm si nawh a.
Ka Jerusalem thi ni chun ka thidang ve
el awm hi.
Chuleiin mi chokbuoi
der naw ro khai.
Sukhmu lo ding in
misukhmu khan umzie nei ṭhak naw nih.
Kan inhning nawh,
Jerusalem nauhai.
Hlem ruol kan ni nawh.
Jerusalem vara kap eng kan ni tlat
leiin.
Aw
Jerusalem, thlamuong takin um rawh khai! Thlamuong raw khai.
Indin
thar in’ ta hi.
Aw
ka thla, ka taksa leh titakzetin, Jerusalem thlamuongna dinga ka hla
thlang
khu zuk sak nawk ro khai:
“Lalpa inah feng ei tiu,”
Ka kuoma an ti lai khan ka lawm a.
Aw Jerusalem, i kul kawtkhar sungah,
Ka kehai chu an ngir ta hi.
Jerusalem, khawpui
indin thar,
Detindo taka rem chu.
Lalpa hming inpak
dingin,
Chutaka chun hnamhai chu an hang fe
hlak,
Lalpa hnamhai chu,
Israelhai kuoma thuinhriettirna
dingin.
Chutaka chun rorelna
dingin ṭhungphahai
daw a ni sih a,
David sunghai lalṭhungphahai chu.
Jerusalem thlamuongna
ding hnipek ro,
Nangma ngainatuhai
chu thawveng an tih.
I kul sunga chun thlamuongna um sien
la,
I lal inhaia chun thawvengna um raw se.
Ka unau le ka ruolhai leiin,
“I sungah thlamuongna um raw seh” ting
ka tih.
Lalpa ei Pathien in lei chun,
I ṭhatna ding zawng ka
tih.
(Psalms 122, Bible Society of India phek 747)
Aw
Jerusalem, i ṭhatna ding zong pei
ka tih.
Zong
mol ka tih.
Aw
Jerusalem, ka theinghil che chun;
Aw
ka thla, aw ka taksa a ruolin tawp phot ro khai. To chip ro.
Ka
hla hi hla tawp thei lo a ni tlat leiin sak tawp chuong hliek naw’ng in tih.
Ka
Jerusalem hla hi ka tawp hma chu sak tawp hliek bok nawng in tih.
Jerusalem
thar ka lut hma pova in sak tlat hla a ni leiin dittawk ro khai, dittawk ro.
Ri
bova ka damlai ni tawp hmakhata ei hla a ni lem sih a.
Aw
Jerusalem, ka theinghil che chun. Aw Jerusalem … Aw …
No comments:
Post a Comment