We miss not, missed- L.Keivawm - Darsanglien Khawbung

Changer 16 zing dar 5:30 a.m  hin ka phone hi a hung in ri ral rala, in hma ka la ti em lei chun laknaw el ding am a ni, ka ti lai chun, ka ruolpa ( MLA khawm lo in candidate ta) Ngura alo ni zinga, “I tho ta am?” a mi hung ti malam chun, “Pu, L.Keivawm kha va hmu inla” tiin a mi hung hril thar nawka.

Chuleiin, kei khawm chu, phur takin, zingbu khawm in-ah fa hman lovin, ka thuom fakimin kan thuoma, ka hei suok ta a. Asanchu, hung kira in-a va fe nawk ding chun, ka sin thawna tieng kan hnu ding ti ka hriet lei a nih bawk.

Chanmari chen chu Taxi-in ka hei fe a, ka ruolpa Ngura chu City Bus-in a hung chu kalo nghaka, kan hei inhmu chun, “Pu, L.Keivawm chu ,Ramhlun-a, Pu, L.H. Thanga in-a  tlung a nih” ti a hril zo chun, Bus chuongman an hung khawna kan pek ta a. Kan tum ram kan hei tlung chun, phur takin kan hei in chawm thla a. Khartung chu kan hei kik a, kan hei lut ta a. Kan mi hmu nuom tak chu, alo um naw thu sungpuinu’n a mi lo hrila, zing inhma taka, Bawngkawna, Pu, Berema in-a an leng ti thu a mi hrila. A phone number kan nei naw leiin, chu tieng chun va hmu el chu kan tum nawk ta a. Ke in kilometer khat chen ding chu kan hei fe a, motor-a chuong ka rawt a chu, ka ruolpa a nuom naw leiin, kan lawn tlung rak el a nih.

Chun, kan hmu ngei kan inring ta leiin, phur fe hin khartung chu kan hei kik nawka, sungpuinu chau bawk chu alo um nawka, Pu, L.Keivawm kan hmu nuom ti kan hei hril chun, “minutes nga vel liem ta khan ansuok ta” ti thu kan dawng nawka. Khawtieng am an fe? Ti a kan indawn chun, “Ramhlun tieng” tiin a mi hrila. E… eilo nghak naw a nih, fe nawk ei tih, tum ta laklaw kan ti a. Kan hungna lampui tieng bawk chun, inhmaw le inrangin, Bus a chun kan lut a, Ramhlun tieng chu kan pan nawk ta a. A hmun kan tlung chun, aum ngei ta ding nia kan hriet leiin, Kan zawng kan zawng che a, khawlai am I thlan kuol vel li ti ding a ni, kan ti a, kan innui a, khartung chu kan hei kik nawk ta a, sungpuinu bawk chun, “anla hung tlung naw” alo ti nawka. Chu phing leh hmu talovin kan kirsan ta a nih.

A thuhrima, ka ruolpa Ngura’n a ngaisang em em a nih ti le kei khawm ka bang bîk nawh, ti hih mi hrie sien chu, ama’n ami zawng ka ring lem rum rum hiel a! ‘Sinlung Express’ chanchinbu khawm Issue tin deuthaw a hin, Quiz kan zepsa a,  chutaka chun Pu, L.Keivawm hi; inchuon naw lai hi anei naw ti lang khel chu ka hril tlawm hle ka ring. Amiruokchuh,Pu, L.Keivawm hih khawlai mitak am! Amilo inbîk hmangsan ti khawm hriet antak ta deu. Kan ruolpa chu nisien, zawng ngai lovin, kan in-ah a hung innghat ve el ding a na!! Kan zawng tuk khan chu, kan hnawt kuol nasa bawk, dâwinei nita kha ka nâp. A tawp na di’n, Aizawl-a ahung nawk pha kan lo hnawt nawk ding an leiin, in bîk bîka mi thawpui ta naw sien kan nuom tak zet zet  a nih. Asanchuh, kan zawng naw natieng tieng alo in bî hmang nawk pei hlak leiin kan hmu thei naw……