DT Lawrkhawm/Tuolsung 28 Oct. 2012

## One Day Outing: HCFD Naupang Department hai chun One Day Outing programme hlawtling takin zani (inrinni) khan Surajkund, Faridabad hmuna an lo hmangzo tah.

Hi huna hin naupang hotu hai chun naupang hai insukhlimna (Games & Sport) chi tum tum le Quiz & Entertainment dam, Pathienthua inpawltlangnahai nei puiin an hlim tawl hle thu Naupang Hotu Tv. Joshua Thiek-a inthawkin changchin ei lo dawng. Hieng ang Outing programe hi nei rawp hlak chi a ni thu mi ringum tak tak inthawk khawmin thu ei lo dawng bawk. HCFD naupang Hotu hai Pathien ram an inpekna hi inpak an umin a ropui takzet.

## Lawmman lawmna hunser: Liem tah thawtanni zan khan ei unau Mahipalpur/Gurgaon area  (Pastor. Thangngur Group) hai chun 5th Thalai Conference huna an lawmman dawnghai lawmna hunser ropui takin an lo hmang zo ve tah. Hi hun hi Nk. Chingbawi Buhril-in a keihruoia Tv. Robert khawbung-in inkhawmpui report le lawmman inhlanna neiin, insukhlimna chi dang dang Tv. James Tonsing le Nk. Rody Hrangate hai a inthok hmang a nih, chuelkhela Open Challenge Solo competition nei a ni bawk, mi 8 (pariet) zet-el chu inelna a chun an thanga. Lawmman dawngtuhai 1st Prize (Rs. 200/-) Tv. Ngamneivung 2nd Prize (Rs. 150/-) Pu. James Pusing le 3rd Prize (Rs. 100/-) Pu. Lalramsang hai an nih.Chun a  thang taphothai chu huoisen lawmman in Rs. 20/- seng pek an ni bawk. Hi hunser le inkhawp hin Delhi maksan ta ding Pu. Jessai Ralsun hai nupa inthlana nei nghal a ni bawk. Thuhriltawi Rev. R C Varte anthawk ngaithlakna nei a ni a, program hmang zo hin lawmman lawmna ruoipui chu ropui taka kil tlang dum dum a ni thu ei palai anthawk chanchin ei lo dawng.

## Dengue natna anlar: Tulai sik le sa intleng lei am a ni ding natna chi dang dang Viral fever, Malaria, Typhoid, Dengue ti hai hi Delhi Hmar nau hai lai khawm an leng nasa hle. Abikin dengue hi ei tam bik zuol ni in anlang. Ei tuolsunga damnaw ei hang hriet thei hai chu: 1) Pi. Edith Shakum 2) Nk. Sharon Infimate 3) Tv. Mordekai 4)Moses Thuoitulien 5)Gladys khawbung 6) Eli sungte 7)Mercy Lalumpui 8) Rebecca Traite 9)Tv. Joseph pakhuongte 10) Nk. Mary Jone  11) Lalmalsawm hai le mi dang khawm um an tih. Damnaw ser ser khawm ei tam hle ti thu, Tv. Robert Sungte Information Secretary DHWA an thawn chanchin ei lo dawng. Damnaw hai hi ei thei ang anga sawmdawl le tawngtaipui hi ei thaw rawp dinga tha a nih.

## Video album Vol-II tlangzar ding: Hung tlung ding tarik 4 November, 2012 (Pathienni)hin ei inkhawmna hmun R K Puram Sec-IV a hin HCFD Department of Music & Youth Affairs chun Music Video album Vol-II (Kan nghatna lungpui) ti a anbuk chu tlangzar ni tang a tih. Hi music Video album hi HCFD Silver Jubilee 2013 a ding le inzawma buotsai a ni a, hi album a hin hla 13 a um a, Solo pathum le drama/skit/action song am ei ti ding pakhat a thangsa. Drama thawtu hai hi ei suong em em ATM Group hai in hnesaw takin an hung  hawiher kha na, nal rek trei a ti ring a um. Chun hlasak thiem khawm ei pung pei a. Ruotui la tham thak lo, nunghak hlasakthiem Cannan Lalhrietzing,Mercy Lalumpui le Thalai members hlasak thiem ruol umkhawm  hai  khawmin thiem mangkhenga an sakna aum bawk. Chuelkhela music video a lo inlang zeu zeu ta hlak, a thiem chalngeng Tv. Lalngailien Joute @ Eljay Ngaite khawmin Hindi hla mawi em emin a sak bawk. Hi Albun hi Rs. 150/- le a chung tieng ngam zat zat a inchawk thei ning a ta, an hmatienga inchawk vat thang a tih. A lo changnaw pal hai chu an insirna hmakhu sei nuom fet a tih, ti hi mi tam tak ring dan chu a nih.

## Beiruol prokram a la fe zing:

HCFD in September thla a inthawka Beiruol a lo nei tan ta khaa la fe zinga, kar liem tah khan  East Delhi le Noida hmun hai a nei zo a lo ni nawk tah, rem chang thei a ni chun karthar inrinni khin Gurgaon-ah nei  nawk dinga beisei a ni thu ei Upa Dr. Lalsiemlien an thok thu ei lo dawng. Vangduoi thlak takin ei unau Mahipalpur area hai chu mithi ei nei buoi leh prokram dang dang in a chawk buoi leiin nei thei hriloin an um.

## Ticket an lak tan tawl mek:

Kum tawp a hung hnaia Christmas boruok anleng tan nawk met met tah. Biekin tuola inhmukhawm huna khawm veng i suok ding am? ti ri ankat nok nok nawk tah. Delhi boruok khawm anthiengin a dei tan mek, khuo tienga Christmas hmanga suok dinga sukching tahai chun fena ding ticket hai ansuk fel tan mek tah bawk. Suok dinga lungril nei hai chun ticket lak hun lai tak a nih Train lem chu a full tawl vang vang ta a hawi, a tawma buoi rak rak nek khan lo suk fel vathai kha a tha lem hlak. Flight a fe nuom hai chun December thlabul lai vel hin (Delhi-Imphal) indigo a chu Rs.5000/- hnuoi metin hmu thei a la nih. Hienglai zing hin vengtieng suoklo khawmin Delhi hmuna Christmas inhawi takin HCFD huoihotna hnuoiah hmang hlak a ni kha theinghil lo ding aw..