THUNAWI - Lala Khobung

Ei pi le pu hai khah an damnaw changin Thiempu an pan a, a lo thawi hlak a, a dam muol muol khom an um hlak. Iemani chen hnungah Compounder ei hang nei a, an ni khah Pathien tluk deuthawa ngaiin natna tinrengah ei rawn hlak.

Ka nu mi hril danin a nunghak lai Khawlien-ah Compounder Pu Savoma (A poi taluo siel le salam ti hla phuoktu Monggan Pu) a hang inzin trumin natna nei tinrengin an pan a. Ama khan stethoscope (inngaina) khan a ngai pei a, natna nei naw hai khom khan inngaitir an tum tawla. Ama chun “Hun tawk ta raw seh, ka nakuo a na zo tah” a ti hiel.

Stethoscope hei ti tak zara chun Compounder Pu. Darchunghnung Mao-Marama a um laiin papui pakhat hi a khupah savom-in a se a, an hung zawn a. Ama chun damdawi hai nalin thra takin a tuom zovin an intieng an zawn a. Zanril lai chun ama pa khan “Daktor khan in ngaina in a mi ngai nawh” tiin a lung a awi thei tlat naw leiin raw sur hnuoiah Pu Dara umna tieng chun a la hung zawn a, ama chun a khup chuh stethoscope-in a lo ngai a, chu zoah ngai thra takin an in tieng an zawn kir nawk a, a dampui an ti chuh!.

Dr.Laltuoklien Sinate B.Sc., MBBS a hung suok hlim lai dam khan ei ngaisangin ei ring zo em em. Sielmat Christian Hospital khah ei hang tran a. Compounder Lalnghak khah Vellore-ah Laboratory Technician training zo a ni bok a. Ek le thisen exam khah ei hei thaw tran a. Khang laia thil tlung threnkhat hai:-

1. Papui pakhat chu Doctor-in a en zo khan a ek exam a trula an hriet lei khan ek hung chawi dingin an ti a. Ama chuh ek-inah a hang fe a, ek-in khura mi ama ek khom ni lo khah a hang lak a, an ekzamtir.

2. Pa pakhat chu a zing ek hung chawi dinga an ti leiin a zingkar ek po, bufun tiet lol el a hung chawi.

3. Saikota Laithrieng khan Dr. L.Sinate a zu pan ve a, ama ngai dan chun Doctor chun lo en a ta, i chu lai, i khalai chuh a na, tiin a damdawi ding chuh a lo pek el ding a sawn a. Amiruokchuh Daktor khan a natna hai a lo indon lem el chuh a ngaidan ni ta lo. Laithrieng chun “Daktor Tuoklien ka zu pan a, ka natnahai a mi lo indon a, keiin ka hril lem vong a nih, ka natna hai chuh ama nek dai in ka hriet” a tih. – Sunzawm ding…